قازاقستان پرەزيدەنتىنىڭ باسپا ءسوز قىزمەتى ەلباسى نۇرسۇلتان نازاربايەۆتىڭ فرانسيانىڭ «لە فيگارو» گازەتىنە سۇحبات بەرگەنىن حابارلادى.
قازاقستان پرەزيدەنتى فرانسيانىڭ ءىرى باسىلىمىنىڭ ءبىرى – «لە فيگارو» گازەتىنىڭ ءتىلشىسى رەنو جيرارۋعا سۇحبات بەردى. مەم­لەكەت باسشىسى ەلىمىزدىڭ يادرولىق قارۋدى تاراتپاۋ سالاسىنداعى ءىس-قيمىلى تۋرالى اڭگىمەلەپ، ۋكرايناداعى قازىرگى احۋال تۋرالى جانە سونىڭ توڭىرەگىندەگى وقيعالارعا قاتىستى، سونداي-اق، سيريا تۇيتكىلىن شەشۋ جولدارى جونىندە پىكىرىن ءبىلدىردى.
اتاپ ايتقاندا، قازاقستاننىڭ اتوم ەنەرگياسىن بەيبىت ماقساتقا پايدالانۋ باعىتىنداعى باستامالارىنا قاتىستى نۇر­سۇلتان نازاربايەۆ يادرولىق قارۋدان باس تارتۋ رەسپۋبليكامىزعا ايتارلىقتاي كولەمدە شەتەلدىك ينۆەستيسيالار اكەلۋگە جانە ەكونوميكانى جاڭعىرتۋ ءۇشىن جاعداي تۋعىزۋعا سەپتىگىن تيگىزگەنىن اتاپ ءوتتى.
مەملەكەت باسشىسى قازاقستاندا از بايىتىلعان ۋراننىڭ حالىقارالىق قورىن قۇرۋ ءتۇرلى ەلدەردىڭ اتوم ەلەكتر ستانسالارى ءۇشىن سەنىمدى وتىن كوزىن قامتاماسىز ەتەتى­ءنىن، وسىلايشا اسا بايىتىلعان ۋران الۋ مۇمكىندىگىن جانە ونىڭ اسكەري ماق­سات­تا قولدانىلۋ ءقاۋپىن ازايتاتىنىن ايتتى.
وسى ورايدا، قازاقستان پرەزيدەنتى بۇل جوبانىڭ كوممەرسيالىق پايدا تابۋعا ارنالماعانىنا نازار اۋداردى. «ەڭ باستىسى، بۇل – قازاقستاننىڭ يادرولىق قارۋدى تاراتپاۋ ىسىنە قوسقان كەزەكتى ۇلەسى»، – دەدى مەملەكەت باسشىسى.
مينسك ۇدەرىسى اياسىنداعى ءتۇرلى تاراپ­تاردىڭ ارەكەتتەرىنە تۇسىنىكتەمە بەرە وتىرىپ، نۇرسۇلتان نازاربايەۆ فرانسيا پرە­زيدەنتى ف.وللاندپەن كەزدەسۋدىڭ نەگىز­گى تاقىرىبىنىڭ ءبىرى ەكىجاقتى ىنتى­ماق­­تاستىق ماسەلەلەرىمەن قاتار، ۋكراينا داعدارىسى بولعانىن ەسكە سالدى. قازاقستان پرەزيدەنتى فرانسۋز باس­شىسىنىڭ ساپارى الدىندا ۋكرايناداعى قاقتىعىس ءورشي تۇسكەنىن، ءبىراق بۇل كەزدە ونى رەتتەۋ ءۇشىن ناقتى ديپلوماتيالىق قادامدار جاسالماعانىن ايتتى.
نۇرسۇلتان نازاربايەۆ مينسكىدە وتكەن بىرلەسكەن كەزدەسۋدى ۇيىمداستىرۋ ءمۇم­كىن­دىگىن تالقىلاۋ ءۇشىن كەزەگىمەن گەرمانيا، ۋكراينا جانە رەسەي باسشىلارىمەن كەزدەستى. قازاقستان پرەزيدەنتى تۇيتكىلدىڭ ءتۇيىنى بۇگىنگى تاڭدا ءالى شەشىلمەگەنىن، ءبىراق «مينسك-2» كەلىسىمىندە رەسەي مەن ۋكراينا تاراپىنىڭ بارلىق ءىس-قي­مىلدارى ايقىن جازىلعانىن ايتتى. نۇرسۇلتان نازاربايەۆ سونداي-اق، رەسەيگە قاتىستى سانكسيالار ايتارلىقتاي ناتيجە بەرمەگەنىن اتاپ ءوتتى.
«بۇل سانكسيالاردان ۋكراينا داع­دارىسىنا ەش قاتىسى جوق ادامدار – رەسەيلىك شاعىن جانە ورتا بيزنەس وكىل­دەرى، فرانسۋز فەرمەرلەرى جاپا شەگۋدە. ساياساتتى ەكونوميكادان بولەكتەگەن ءجون. فرانسيا قاقتىعىس اۋماعىنداعى شيەلەنىستىڭ ۋشىعۋىنا جول بەرمەۋ جانە سانكسيالار قاتايماۋى ءۇشىن ءبارىن جاساۋعا ءتيىس. وسى داعدارىستى شەشۋ ءۇشىن ديپلوماتيالىق قادامداردى جالعاستىرۋ قاجەت»، – دەدى قازاقستان پرەزيدەنتى.
سيرياداعى احۋالعا قاتىستى مەملەكەت باسشىسى بوسقىندارعا بايلانىستى بۇگىنگى داعدارىس وسى ەلدىڭ ىسىنە وزگە مەملەكەتتەردىڭ بارلىق حالىقارالىق ۋاعدالاستىقتارعا قايشى كەلە وتىرىپ، ورىنسىز ارالاسۋىنان تۋىنداعانىن اتاپ ايتتى. نۇرسۇلتان نازاربايەۆ وسىنداي ارەكەتتەردى دوعارۋ بۇل ماسەلەلەردى شەشۋگە مۇمكىندىك بەرەدى دەگەن پىكىر ءبىلدىردى.
بۇل رەتتە، ەلباسى استانا ءبىزدىڭ وڭىردە ديپلوماتيالىق حاب بولۋ ءۇشىن بارلىق مۇمكىندىككە يە بولىپ وتىرعانىنا نازار اۋداردى. مىسالى، قازاقستان ازياداعى ءوزارا ءىس-قيمىل جانە سەنىم شارالارى جونىندەگى كەڭەس شاقىرۋعا باستاماشى بولدى، ول جۇڭگو، ءۇندىستان جانە پاكىستاندى قوسقاندا، ازيانىڭ 30 ەلىن بىرىكتىرەدى. سونداي-اق، قازاقستاننىڭ ەلورداسىندا ەلىمىز باستاماشىلىق ەتكەن الەمدىك جانە ءداستۇرلى دىندەر ليدەرلەرىنىڭ سەزدەرى تۇراقتى وتەدى. مۇندا ەقىۇ جانە يىۇ سامميتتەرى دە ۇيىمداستىرىلدى.
«ءيا، ءبىز وسى باتىس پەن شىعىستىڭ اراسىنداعى شەكارادا، مازاسىز وڭىردە ديپ­لوماتيالىق حابقا اينالعىمىز كەلەدى»، – دەدى مەملەكەت باسشىسى.

"قامشى "سىلتەيدى

دەرەككوز: ەگەمەن قازاقستان