رەسپۋبليكالىق «تازا قازاقستان» اكسياسى اياسىندا بەسقاراعاي اۋدانىندا چەللەندج ءوتتى. چەلەندجدە اۋدان باسشىلىعىنىڭ وكىلدەرى، بەلگىلى سپورتشىلار، جاستار، دەپۋتاتتار، جەرگىلىكتى تۇرعىندار جاڭادان سالىنىپ جاتقان ورتالىق ساياباقتا 6 ءتۇرلى اعاش كوشەتتەرىن وتىرعىزدى. 

جاس سپورتشى نۇرىم نۇربەك چەللەندج وتەدى دەگەندى ەستىگەن ساتتەن باستاپ وعان قاتىسۋدى ۇيعارعانىن، سەبەبى ءوزىنىڭ باستى ۇستانىمى باۋىرلارىنا، دوستارىنا ۇلگى بولۋ ەكەنىن ايتادى.

اتا-انامىز «ءبىر تال كەسسەڭ، ون تال ەك»، «اتادان مال قالعانشا، تال قالسىن» دەگەن حالقىمىزدىڭ ۇلاعاتتى ءسوزىن ءاردايىم ەسىمىزگە سالىپ، ءبىزدى تابيعاتقا قۇرمەتپەن قاراۋعا تاربيەلەگەن. بارشاڭىزدى اكسياعا بەلسەنە اتسالىسۋعا شاقىرامىن، - دەيدى نۇرىم نۇربەك. ورتالىق ساياباققا اعاش وتىرعىزۋعا كەلگەندەردىڭ اراسىندا يزمايلوۆتار جاس وتباسى دا بار.

— مەملەكەت باسشىسىنىڭ باستاماسىمەن ءوتىپ جاتقان «تازا قازاقستان» ەكولوگيالىق اكسياسىنان تىس قالماۋدى ءجون كورىپ، سەنبىلىكتەرگە قاتىسىپ جاتىرمىز. وتباسىمىزبەن كەلىپ، جاڭا ساياباققا جاس اعاش وتىرعىزدىق. ءبىز وتىرعىزعان اعاش وتباسىمىزبەن بىرگە وسەتىن بولادى. بولاشاقتا وسىندا دەمالۋعا كەلگەندە، ۇرپاقتارىمىزعا كورسەتىپ، ولاردى دا تابيعاتتى سۇيۋگە تاربيەلەسەك دەيمىز، - دەيدى السۋ يزمايلوۆا.

اكسيا سوڭىندا اكىم باستاعان اۋدان تۇرعىندارى چەللەندجدى اباي اۋدانىنا جولدادى.