تالاس اۋدانىندا جامبىل وبلىسى قحا عىلىمي-ساراپتامالىق توبىنىڭ «وڭىرىمىزدەگى ەتنوستاردىڭ ءبىرتۇتاستىعىن ساقتاۋ جانە نىعايتۋ» تاقىرىبىنداعى كەڭەيتىلگەن وتىرىسى ءوتتى.
وتىرىستىڭ ماقساتى – عىلىمي-ساراپتامالىق توپ مۇشەلەرىنىڭ قوعامدىق كەلىسىم مەن جالپىۇلتتىق بىرلىك سالاسىنداعى مەملەكەتتىك ساياساتقا سايكەس ءوڭىر تۇرعىندارى اراسىندا بىرلىك پەن بىرەگەيلىكتى ناسيحاتتاۋ، جاس ۇرپاقتى تاربيەلەۋدەگى وزىق تاجىريبەلەردى تاراتۋ.
اۋەلى جيىندا ۇلتتىق قۇرىلتايدىڭ ءۇشىنشى وتىرىسىندا كوتەرىلگەن باستى ماسەلەلەر مەن ۇسىنىستار نازارعا الىنىپ، جيىنعا قاتىسۋشىلار ءار ءتۇرلى سالالار بويىنشا وي-پىكىرلەرىمەن ءبولىستى.
سونداي-اق، جۋىردا قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسى وتكەن بولاتىن. وندا مەملەكەت باسشىسى قاسىم-جومارت توقايەۆ «باستى مىندەتىمىز – قوعامدا بىر-بىرىمىزگە دەگەن ءوزارا قۇرمەت پەن سەنىمدى نىعايتىپ، ءدىني، ايماقتىق نەمەسە الەۋمەتتىك-ەكونوميكالىق الشاقتىقتى بولدىرماۋ ءۇشىن بارشاعا ورتاق جاڭا قاعيداتتار مەن ۇستانىمدار ويلاستىرۋ قاجەت» – دەگەن ەدى.
باسقوسۋدا م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ «فيلوسوفيا جانە ساياساتتانۋ» كافەدراسىنىڭ اعا وقىتۋشىسى، وبلىستىق قحا جانىنداعى عىلىمي-ساراپتامالىق توبىنىڭ مۇشەسى رەجەپ باياريسوۆ «ەتنوستار بىرلىگىن ساقتاۋدا قازاق حالقىنىڭ توپتاستىرۋشىلىق الەۋەتىنىڭ ماڭىزى» تاقىرىبى توڭىرەگىندە بايانداما جاسادى: – قازاق ەلىنىڭ تاعدىرى تاۋقىمەتكە تولى بولعانمەن، ەشقاشان وزگەنى وزەگىنەن تەپپەگەن. ەلىمىزدە ەتنوسارالىق جانە كونفەسسياارالىق ىنتىماقتاستىق، كەلىسىم مەن ساياسي تۇراقتىلىقتى ساقتاۋ ىسىنە ءجىتى كوڭىل بولىنۋدە. قازاق حالقى قاي زاماندا دا ەلدىككە، سونىڭ ىشىندە ەل بەرەكەسىنىڭ تۇراقتى بولۋىنا ۇلكەن نازار اۋدارعان. سوندىقتان دا بولار، ەل اۋزىندا: «بىرلىك بار جەردە تىرلىك بار»، «بىرلىكسىز ەل توزادى، بىرلىكتى ەل وزادى» دەگەن ناقىل سوزدەر قالدى. بۇل –بۇگىنگى تاۋەلسىز قازاقستاننىڭ باستى قاعيداسىنا اينالدى جانە تاۋەلسىزدىكتىڭ نەگىزى، – دەدى رەجەپ ورازباي ۇلى ءوز بايانداماسىندا.
بۇدان كەيىن ءسوز العان تاراز قالالىق وزبەك ەتنومادەني بىرلەستىگىنىڭ ءتوراعاسى، وبلىستىق قحا اقساقالدار كەڭەسى ءتوراعاسىنىڭ ورىنباسارى، توپ مۇشەسى ابدىراحمان زاينۋتدينوۆ ايماقتاعى ەتنوسارالىق ساياسي احۋال تۋرالى كەلەلى ويلارىن ورتاعا سالدى. قاتىسۋشىلار مەملەكەت باسشىسى ق.توقايەۆ ءوز سوزدەرىندە قوزعاعان ماڭىزدى باعىتتار بويىنشا وي-پىكىرلەرىمەن ءبولىستى.
پىكىر قالدىرۋ