وتكەن تاۋلىك ىشىندە قازاقستاندىق شەكاراشىلار مەملەكەتتىك شەكارانى زاڭسىز كەسىپ وتپەك بولعان 9 ازاماتتى ۇستادى، دەپ حابارلايدى «قامشى» پورتالى ق ر ۇقك شەكارا قىزمەتى باسپا ءسوز قىزمەتىنە سىلتەمە جاساپ.

اتاپ ايتقاندا، ەلىمىزدىڭ وڭتۇستىگىندە ورنالاسقان سارىاعاش شەكارا وتريادىنا قاراستى «دارحان» شەكارا زاستاۆاسىنىڭ (قازاق-وزبەك شەكاراسى) ناريادى شەكارا قورشاۋىن بۇزىپ، وزبەكستان جاققا وتۋگە ارەكەتتەنىپ جاتقان 1 ازاماتتى بايقايدى. ونىڭ ىزىنە ءتۇسىپ ۇستاعان كەزدە، تاعى دا 7 سىبايلاسى تىم-تىراقاي قاشا جونەلدى. «زەتتا» دەگەن ءيتتىڭ كومەگىنىڭ ارقاسىندا الگىلەردىڭ 4-ەۋى قولعا ءتۇستى. ال ۇشەۋىن وزبەك شەكاراشىلارى ۇستادى.

ەكى ەل شەكاراشىلارىنىڭ وسىلاي بىرلەسە قيمىلداعان ءىس-شاراسى ءساتتى اياقتالدى. ۇستالعانداردىڭ بارلىعى وزبەكستان ازاماتتارى بولىپ شىقتى.

اتالعان دەرەك بويىنشا ماتەريالدار سارىاعاش اۋدانىنىڭ ىشكى ىستەر بولىمىنە بەرىلدى.

مەملەكەتتىك شەكارانى ءوزىنىڭ قالاۋىنشا كەسىپ وتپەك بولعان تاعى ءبىر وقيعا قوستاناي شەكارا وتريادىنا قاراستى «قايراق» شەكارا زاستاۆاسىنىڭ (قازاق-رەسەي شەكاراسى) اۋماعىندا ورىن الدى. 1984 جىلى تۋعان وتانداسىمىز مەملەكەتتىك شەكارا سىزىعىنان 50 مەتر جەردە شەكاراشىلاردىڭ قولىنا ءتۇستى. تەكسەرە كەلەگندە، «ۆلاديمير» ەسىمدى ازاماتقا رەسەيگە بارۋعا جول جابىق ەكەندىگى بەلگىلى بولدى. سول سەبەپتى، ول كىسى وسىلايشا ارەكەت ەتۋگە ءماجبۇر بولىپتى.

وعان ق ر اكىمشىلىك-قۇقىق بۇزۋشىلىق كودەكسىنىڭ 514 بابىنىڭ 1 تارماقشاسى بويىنشا ايىپپۇل (5 ايلىق ەسەپتىك كورسەتكىش) كولەمىندە سالىندى.