بوداندىق قاي ەلدى وڭدىردى دەيسىز... ءيا، ءبىزدى دە وڭدىرمادى. ءدىلىمىز، ءدىنىمىزدى ۇمىتتىق. ءاتا-داستۇر الاستاتىلدى.
ارتىنشا ءتاۋ ەتكەن تاۋەلسىزدىگىمىز كەلدى. ءبىراز داستۇرلەرىمىزدى قايتاردىق. «مەن كىممىن؟» دەگەن ساۋالعا اۋىز تولتىرىپ جاۋاپ ايتا الاتىن بولدىق. تامىرىمىزدى تەرەڭگە جايىپ، حاندىعىمىزدىڭ 550 جىلدىق مەرەيتويىن تويلاتىپ جاتىرمىز. قۇتتى بولسىن!
ءبىراق، اڭگىمەنىڭ ءالقيسساسى باسقادا. بوداندىقتىڭ بۇلتى تارقادى دەگەندە، بوستاندىقتىڭ دا بۇلىنگەن بۇرىشى كورىنە باستادى. بىزگە باتىستىڭ بولماشى داستۇرلەرى، اۋەنى، مەنتاليتەتى كىرە باستادى. ونى جاسىرۋ مۇمكىن ەمەس. ايتا-ايتا اۋىزدان دۋا كەتتى. ءبىراق كەيبىر دۇنيەنى ەلەمەي ءوتۋ ەسسىزدىڭ عانا قولىنان كەلەدى. ماسەلەن، ءتىل مەن ءدىل ماسەلەسى...
ءدىل دەمەكشى. تاياۋدا ءبىر دوسىم سىرىمەن ءبولىستى.
-..."دوسىم حابارلاستى"،- دەپ باستادى ول اڭگىمەسىن، - نەگىزى زاتى قازاق، جۇما كۇنى حابارلاسىپ تۇر. كەشكىسىن "دەمالايىق" دەيدى. تاحۋا بولىپ جۇرگەنىمىز شامالى، ءبىراق جۇمادا انامىز شەلپەك پىسىرگەن شاڭىراقتان شىققانىمىز بار. زارە-قۇتىم ۇشىپ كەتتى. «نە دەپ وتىرسىڭ؟»،-دەدىم. بۇگىن جۇما ەكەنىن ايتتىم.
ول ماعان: "ەرتەڭ سەنبى عوي. بۇگىن پياتنيسا. پياتنيسا-پيانيسا ەمەس پە؟"،- دەپ تاڭدانا قارادى.
اپتا اۋىر بولعانىمەن، ءدىن جاعىن قوزعاماساق تا، جۇمادا دۇعا وقيتىن قازاق ەدىك. بۇل تەگىن دۇنيە ەمەس دەگەن وي كەلدى. ۇرپاقتى دىلدەن، دىننەن ايىرۋ - بارىپ تۇرعان ۇلتقا دەگەن قاستاندىق"،- دەپ دوسىم اڭگىمەسىن اياقتادى .
...مۇندايلاردىڭ قولىن كەسىپ، باسىن جۇلۋ كەرەك دەپ وتىرعانىمىز جوق. ءبىراق وسى تۇرعىدا مەملەكەتتىك پەن قاتار ۇلتتىق يدەيانىڭ تۋىن قاتار ۇستاۋ كەرەك سياقتى. ماعجان سەنگەن، قاسىم تاڭدانا قاراعان قازاق جاستارىنىڭ بۇل كورىنىسى جۇرەكتى قانجىلاتادى. قۇل بولساڭ توبەڭدە، ۇل بولساڭ قولىڭدا وينايدى ءدۇر قامشى. ساپ، ۇلتتىڭ ۇپايىن تۇگەندەيىك.
ايان مەيراش
