ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆ تەرروريزمگە قارسى ورتالىقتىڭ كەزەكتى وتىرىسىندا ەلىمىزدە تەررورلىق شابۋىلعا توسقاۋىل قويىلعانىن ايتتى.

وتىرىستا ەلدەگى ماڭىزدى قوعامدىق-ساياسي ءىس-شارالاردىڭ قاۋىپسىزدىگىن قامتاماسىز ەتۋ شەڭبەرىندە مەملەكەتتىك ورگانداردىڭ ءوزارا ءىس-قيمىلىن كۇشەيتۋ شارالارى تالقىلانعانى ايتىلدى.

"سونىمەن قاتار، ۇقك بيىلدان باستاپ قازاقستاندا 1 تەررورلىق شابۋىلدىڭ الدىن الىپ، 26 ادام تەرروريستىك جانە ەكسترەميستىك قىزمەتى ءۇشىن سوتتالعانى اتاپ ءوتىلدى. ەكسترەميزم مەن تەرروريزمگە قاتىسى بار 151 شەتەلدىك ازاماتتىڭ ەلگە كىرۋىنە جول بەرىلمەدى. رەسپۋبليكاعا تىيىم سالىنعان ءدىني ادەبيەتتەردى اكەلگەنى ءۇشىن 19 شەتەلدىك جاۋاپقا تارتىلدى.

سونداي-اق 356 تەرروريزمگە قارسى وقۋ ءىس-شارالارى وتكىزىلدى"، - دەلىنگەن حابارلامادا.

ءىىم جانە ۇقك كۇشتەرىمەن تەرروريستىك تۇرعىدان وسال نىسانداردىڭ، ونىڭ ىشىندە ادامدار كوپ جينالاتىن ورىنداردى 3 مىڭنان استام تەكسەرۋ جۇزەگە اسىرىلعان.