الماتى قالاسى ناۋرىزباي اۋداندىق سوتىندا ءتورت ايلىق بالانى باسىپ ولتىرگەن كولىك جۇرگىزۋشى-ايەلدەردىڭ ۇستىنەن ءوتىپ جاتقان سوت پروسەسىندە بىرنەشە بۇقارالىق اقپارات قۇرالدارى وكىلدەرىنىڭ ديكتوفوندارى جوعالدى، - دەپ حابارلايدى «قامشى» اقپاراتتىق پورتالى Today.kz-كە سىلتەمە جاساپ.

سوت وتىرىسىنان سوڭ جۋرناليستەردىڭ زالدان ديكتوفوندارى جوعالعانى بەلگىلى بولادى. ءبىراز ۋاقىتتان سوڭ ديكتوفوندار تۇسىنىكسىز جاعدايدا يەلەرىنە قايتارىلعانىمەن، ىشىندەگى ماتەريالداردىڭ ءوشىرىلىپ تاستالعانى انىقتالدى. تoday.kz، informburo.kz اقپاراتتىق سايتتارى مەن "ۆرەميا" گازەتىنىڭ جۋرناليستەرى وسىلاي ماتەريالدارىنان ايىرىلىپ قالدى.

• ءبىز سوت باستالعاندا ديكتوفوندارىمىزدى قوسىپ، كۋاگەرلەر سويلەيتىن مىنبەرگە قويدىق تا، جۋرناليستەر ءۇشىن بەلگىلەنگەن ورىندارىمىزعا جايعاستىق. قىرىق مينۋتتاي ۋاقىت وتكەن سوڭ سۋديا ەسبەرگەنوۆ بىزگە كەلىپ، جۋرناليستەردىڭ وزىمەن بىرگە سىرتقا شىعۋىن سۇرادى. دالىزدە 15 مينۋت تۇرعاننان سوڭ سوت زالىنا قايتا كىردىك، دەيدى «ۆرەميا» گازەتىنىڭ ءتىلشىسى ەكاتەرينا تيحونوۆا. سونىمەن قاتار، سۋديا جۋرناليستەردى جابىق تالقىلاۋ كەزىندە دە زالعا كىرگىزبەگەن.

وتىرىس بىتىسىمەن جۋرناليستەر ديكتوفوندارىنىڭ جوعالعانىن ءبىلىپ، زالداعى بەينەكامەرا جازبالارىن قاراۋدى سۇرايدى. سوت حاتىشىسى جۋرناليستەرگە جابىق تالقىلاۋ كەزىندە كامەرالاردىڭ ءوشىرىلىپ تاستالعانىن ايتقان. ءبىراق، كوپ ۇزاماي ديكتافوندار تابىلدى. الايدا، ولاردىڭ ىشىندەگى جازبالاردى بەلگىسىز بىرەۋ تۇگەل ءوشىرىپ تاستاعان.

تoday.kz پورتالىنىڭ ءتىلشىسى وسى وقيعا تۋرالى بوستاندىق اۋداندىق ىىب-نە شاعىم ءتۇسىردى.