وتكەن اپتادا «وتاندىق «اسىل ارنا» ءدىني-تانىمدىق تەلەارناسى شەتەلدىك ۇيىمدار تاراپىنان قارجىلاندىرىلۋى مۇمكىن» دەگەن اقپارات قىلاڭ بەردى. وعان ءبىرقاتار اقپارات قۇرالدارىندا ۆيكيليكس سايتىندا ساۋد ارابياسىنىڭ باسشىلارى اراسىنداعى حاتتاردىڭ جاريا بولعاندىعى، ول حاتتاردا وسى ەلدىڭ مادەنيەت مينيسترلىگى قىزمەتكەرلەرى «اسىل ارناعا» قاراجات ءبولۋ ماسەلەسىن تالقىلاعاندىعى ايتىلدى.

ۆيكيليكستەگى حاتتان باستالعان اڭگىمە قوعامدا ءبىراز ءسوز بولىپ، ءتىپتى، پارلامەنت تورىندە دە كوتەرىلگەن. ءماجىلىس دەپۋتاتى ايقىن كوڭىروۆ ب ا ق –تا جارىق كورگەن اقپارات ارنانى تەكسەرۋگە تولىق نەگىزدەي الادى دەپ ەسەپتەيدى. «مەملەكەتتىك ورگاندار باق-تا قىزۋ تالقىلانىپ جاتقان بۇل جاعدايعا ءمان بەرۋى ءتيىس. ولاردىڭ نە تۋرالى ايتىپ، قانداي اقپارات تاراتاتىندىعى تۋرالى  ساراپتاما جۇرگىزۋ كەرەك. مەنىڭ بىلۋىمشە، بۇنداي ارنانى تىركەۋ مەن تاراتۋ وڭاي شارۋا ەمەس. ارنا تىركەلۋ الدىندا ءوزىنىڭ كونتەنتى تۋرالى باعدارلاما جاساپ وتكىزدى دەپ ەسەپتەيمىن. مەن ءوزىم ب ا ق سالاسىندا قىزمەت اتقارعانمىن، سوندىقتان بارلىعىن باقىلاپ وتىراتىن مامانداردىڭ بار ەكەنىن بىلەمىن. بۇل نە ادامي فاكتور، نەمەسە جيناقتالعان «سىندارلى توپتىڭ» اسەرى. مەن وسى ەكى نۇسقانى ۇسىنا الامىن»،- دەپ ءوز ويىن ورتاعا سالعان. 

ال،  ءماجىلىس دەپۋتاتى  اسحات بەكەنوۆ «اسىل ارنانى» ۋاقىتى بار كەزدە قارايتىنىن، ءبىراق ارنادان ەشقانداي ۇگىت-ناسيحات ۇلگىلەرىن بايقاماعاندىعىن ايتتى.  «بۇل ارنانى شەتەل قارجىلاندىرادى دەگەندى ەستىمەپپىن. اتالمىش ماسەلەگە بايلانىستى قۇقىق قورعاۋ ورگاندارى تەكسەرىس جۇرگىزۋى ءتيىس. ءسالافيزم مەن ۆاحاببيزم يدەياسى ءبىزدىڭ قوعامدا باياعىدا-اق بەلەڭ الىپ كەتكەن. ءتىپتى وسى يدەولوگيانى ۇستاناتىندار دا ارتىپ كەلەدى. ءبىراق ول ءبىزدىڭ ۇستاناتىن ءداستۇرلى يسلامىمىزعا قايشى كەلەدى»،-دەپ ەسەپتەيدى بەكەنوۆ.

اقپارات قۇرالدارىندا ءدىني باسقارما مەن وسى سالانى ۇيلەستىرۋشى مەملەكەتتىك مەكەمەلەردىڭ دە رەسمي ۇستانىمدارى بىرىنەن سوڭ ءبىرى جارىق كورۋدە. ق ر مادەنيەت جانە سپورت مينيسترلىگى ءدىن ىستەرى جونىندەگى كوميتەت ارنا جۇمىسىنا بايلانىستى مىنانى ايتادى:

• تەلەارنا مازمۇندىق جاعىنان قازاقستان مۇسىلماندارى ءدىني باسقارماسىمەن تىعىز بايلانىستا جۇمىس ىستەيدى. ءتىپتى، ارنا، قمدب جانە ءدىن ىستەرى كوميتەتى اراسىندا ارنايى مەموراندۋم دا بار. وندا قازاقستان حالقىنىڭ ءداستۇرلى ءدىني تانىمىن ناسيحاتتاۋ ماقساتىندا باعدارلامالار بىرلەسە ازىرلەنەدى. «اسىل ارنا» ستۋدياسىندا قمدب-نىڭ ءبىر وكىلى رەداكتور رەتىندە جۇمىس ىستەيدى. ارنا باعدارلامالارىنىڭ مازمۇنى قازاقستان زاڭدارىنا قايشى كەلمەيدى.

مۇسىلماندار ءدىني باسقارماسى دا ارنامەن تىعىز ارىپتەستىك بايلانىس ورناعانىن راستاپ وتىر. قوس تاراپ يسلام ءدىنىنىڭ قۇندىلىقتارىن ءابۋ-حانيفا ءمازھابى ۇستانىمدارىنا ساي ناسيحاتتاۋدا بىرلەسە جۇمىس ىستەيدى دەلىنگەن ءمۇفتيات تاراتقان حابارلامادا.

ەلەكتروندى اقپارات قۇرالدارىنىڭ جۇمىسىن ۇيلەستىرۋشى تاعى ءبىر سالالىق ورگان ينۆەستيسيا جانە دامۋ جونىندەگى مينيسترلىكتىڭ بايلانىس، اقپاراتتاندىرۋ جانە اقپارات كوميتەتى دە ارنا جۇمىسىندا «تەلاراديوتاراتۋ» تۋرالى زاڭ تالاپتارىنىڭ بۇزىلۋى انىقتالماعانىن ايتىپ وتىر.

ال، ارنا باسشىسى، اقىن مۇحامەدجان تازابەكوۆتىڭ ءوزى Total.kz اگەنتتىگىنە بەرگەن جاۋابىندا:

«بار جاۋاپكەرشىلىكپەن مالىمدەيمىز: «اسىل ارنا» ەشۋاقىتتا ساۋد ارابياسى ۇكىمەتىنەن دە، بۇل ەلدىڭ وزگە وكىلدەرىنەن دە، ودان باسقا شەت مەملەكەتتەردەن دە قارجىلاي كومەك العان ەمەس. حاتتاعى جاعدايعا كەلەتىن بولساق، بىزگە كەلەسى جايت بەلگىلى: 2007 جىلى «اسىل ارنا» دەرەكتى فيلمدەر تۇسىرەتىن ستۋديا رەتىندە قالىپتاسقان كەزدە، اتالمىش تۇلعا بۇرىنعى كسرو ەلدەرىنە تارالاتىن «مەككە» اتتى ورىس ءتىلدى تەلەارنا اشپاق بولعان. ونىڭ شتاب-پاتەرى ەر-ريادتا ورنالاسادى دەپ جوسپارلانعان. ءوز كەزەگىندە ارنا ۇجىمى شەتەلدەن قارجىلاندىرۋ مۇمكىندىگىنە دە، وزگەلەردىڭ ارنا يدەولوگياسىنا اسەر ەتۋ مۇمكىندىگىنە دە ستۋديا رەتىندە قالىپتاسقان ساتىنەن باستاپ، ەشۋاقىتتا جول بەرمەۋ كەرەكتىگىن جاقسى تۇسىنەدى. بۇگىندە ارنانىڭ ۇستاناتىن جالعىز يدەولوگيالىق باعىتى مەملەكەتىمىزدىڭ ساياساتى مەن ءمۇفتي ەرجان قاجى مالعاج ۇلى باسشىلىق ەتەتىن قازاقستان مۇسىلماندارىنىڭ رۋحاني باسقارماسىنا (قمرب) عانا سۇيەنەدى”، – دەيدى.

PS.: سونىمەن، ەلدەگى ءدىني-تانىمدىق باعىتتاعى جالعىز تەلەارنا تۋرالى قاق ايىرىلعان پىكىرلەردىڭ ۇزىن-ىرعاعى وسىنداي. ءبىز ەكى تاراپتىڭ دا تۋىنداعان ماسەلەگە وراي ۇستانىمدارىن بولە-جارماي ۇسىنۋعا تىرىستىق. اقپارات قۇرالدارىندا ءسوز بولعان كۇدىكتى جايتتارعا قاتىستى وي قورىتۋدى وقىرماننىڭ ءوز ەركىنە قالدىردىق.

دارقان مۇقان