كەشە پارلامەنت ماجىلىسىنە بارىپ، دەپۋتاتتارعا ەلدىڭ ەكونوميكالىق الەۋەتى تۋرالى ەسەپ بەرگەن ۇلتتىق بانك ءتوراعاسى قايرات كەلىمبەتوۆ بانك سەكتورى مەن قۇرىلىس سالاسىنا دەمەۋ بەرۋ ءۇشىن قازاقستاندىقتاردىڭ زەينەتاقى قورلارىنداعى جيناقتارىن پايدالانۋ مۇمكىندىكتەرىن قاراستىرىپ جاتقانىن مالىمدەدى.

بيىك مىنبەردەن سەنىمدى تۇردە مالىمدەنۋىنە قاراعاندا حالىقتىڭ جيعان-تەرگەن اقشاسى قايدا، قالاي جۇمسالاتىنى بۇگە-شىگەسىنە دەيىن ويلاستىرىلىپ قويعان سىڭايلى.

«ۇكىمەتپەن بىرلەسىپ ەكونوميكانى نەسيەلەندىرۋ جايى قاراستىرىلۋدا. ءبىرىڭعاي جيناقتاۋشى زەينەتاقى قورىنداعى قاراجات وسى ماقساتقا جۇمسالاتىن بولادى. ءبىرىنشى كەزەكتە بۇل قاراجات بانك سەكتورى مەن ءتۇرعىن-ۇي قۇرىلىسىنا باعىتتالادى. بىزدە بۇل باعىتتا ەشقانداي ماسەلە جوق» دەگەندى قايرات نەمات ۇلى ءماجىلىس دەپۋتاتتارىنا جەردەن جەتى قويان تاپقانداي جەتكىزدى. باستاما يەسى حالىقتان العان قاراجاتتى كەرى قايتارۋدىڭ مەحانيزمدەرى تۋرالى جاق اشپادى. باس بانكيردىڭ سوزىنە قاراعاندا ەل ەكونوميكاسىن شىنىمەن دە ۇلكەن داعدارىس كۇتىپ تۇرعان سىڭايلى. دۇرىسى ۇكىمەت ەكونوميكالىق قيىندىقتاردى شەشۋدە دارمەنسىزدىك تانىتىپ وتىرعانداي. بۇعان جاقىنداعى ەلباسىنىڭ ۇلتتىق قورداعى قاراجاتقا ۇقىپتىلىقپەن قاراپ، شىعىنداردى ازايتۋ تۋرالى ايتقانى تاعى ءبىر دالەل بولا الادى.

دەپۋتاتتارعا حالىقتىڭ زەينەتاقى قورىن قايداي جۇمسايتىنىن جاريالاعان ق. كەلىمبەتوۆ دەپۋتاتتارعا الداعى ۋاقىتتا تاڭعاجايىپتارعا سەنبەي، مۇناي باعاسى قۇلدىراپ تۇرعان مىنا ەكونوميكالىق جاعدايدى دۇرىس باعالاۋ كەرەك دەگەن «اقىلىن» دا ايتتى. 

ماجىلىستەگى ۇكىمەت ساعاتىندا ۇلتتىق ەكونوميكا ءمينيسترى ەربولات دوسايەۆ كاسىپكەرلىكتى قولداۋ ءۇشىن حالىقارالىق قايتا قۇرۋ جانە دامۋ بانكىنەن 40 ميلليون اقش دوللارى كولەمىندە قارىز الۋ تۋرالى كەلىسىمدى ماقۇلداۋدى سۇرادى. بۇل ۇسىنىسقا دا جاقتىرماعان كەيىپ تانىتقانمەن دەپۋتاتتار قارسى بولمادى.

بۇگىندە ءبىرىڭعاي زەينەتاقى جيناقتاۋشى قورىندا 10 ميلليوننان اسىپ جىعىلاتىن سالىمشىنىڭ 4 تريلليون تەڭگەدەن استام قاراجاتى بار. ايىپپۇلدى ءوسىرىپ، مەملەكەت مەنشىگىندەگى 200-دەن استام نىساندى ساتۋ دا ەكونوميكالىق قيىندىقتاردى شەشۋ ءۇشىن ءبىزدىڭ بيلىككە جەتكىلىكسىز كورىنىپ وتىر.  ونسىز دا زەينەتاقى قورىنىڭ باسقارۋشىلار كەڭەسى بانكتەردەگى نەسيەلەۋ جۇيەسى ارقىلى وزىمىزگە جوعارى پايىزبەن نەسيە رەتىندە ۇسىنىپ، شاعىن توپتىڭ مۇددەسىنە قىزمەت ەتىپ وتىرعان اقشا ەندى تاعى دا بولاشاعى بۇلدىر، قايتارىمى كۇماندى جوبالارعا سالىنباقشى. ۇكىمەتتىڭ ءۇمىت ۇزدىرەتىن وسىنداي قىلىقتارىنا قاراپ وتىرىپ، حالىقارالىق «كريزيس» ءسوزىن تىلدىك قورىمىزداعى توقىراۋ، شاراسىزدىق ماعىناسىنا جاقىن «داعدارىس» دەپ اۋدارعان تىلشىلەرىمىزدىڭ تالانتىنا تاڭ قالاسىڭ.

دارحان مۇقان