اعىمداعى جىلدىڭ سوڭىنا دەيىن ەلدە بەرىلىپ جاتقان يپوتەكالىق نەسيەنىڭ 75 پايىزىنا يەلىك ەتىپ وتىرعان «ءتۇرعىن-ۇي جيناق بانكىنىڭ» باقىلاۋشى پاكەتى جاڭا ينۆەستورلارعا ساتىلادى، - دەپ حابارلايدى «قامشى» پورتالى Total.kz-كە سىلتەمە جاساپ.
«بۇگىندە شەتەلدىك ءتۇرعىن-ۇي نارىعىندا ءبىرشاما تاجىريبەسى بار نەمىس، اۆستريا بانكتەرى بار. سولار ءبىزدىڭ بانككە قىزىعۋشىلىق تانىتىپ جاتسا، بانكتىڭ باقىلاۋشى پاكەتى، ياعني 50-51 پايىز كولەمىندەگى اكسيالارى ساتىلماقشى»، - دەيدى بانك باسقارما ءتوراعاسىنىڭ ورىنباسارى ەربول قۋانىشبايەۆ.
ونىڭ ايتۋىنشا، بانك جاڭا ينۆەستورلارعا ساتىلسا دا، ءتۇرعىن-ۇي جيناقتاۋ قىزمەتى تۋرالى زاڭنامالارعا سايكەس، وسى باعىتتا عانا جۇمىس ىستەيتىن بولادى. باعا ساياساتى دا زاڭمەن رەتتەلىپ وتىرماق.
ە. قۋانىشبيەۆ ناقتى قانداي قارجى ۇيىمدارىمەن كەلىسسوز جۇرگىزىلىپ جاتقانى تۋرالى ءتىس جارمادى. بۇدان ەكى ماسەلەنى اڭعارۋعا بولادى. ءبىرىنشىسى – بانككە يەلىك ەتەتىن جاڭا ينۆەستورلاردىڭ ەسىمدەرى بەلگىلى. تەك، راسىمدەۋ پروسەدۋرالارى اياقتالعانشا ولاردى جاريالاۋعا بيلىك قۇلىقسىزدىق تانىتىپ وتىر. ەكىنشىسى – بانك پەرسپەكتيۆالارى ىشكى نارىقتا دا، شەتەلدىك ءىرى قارجى ۇيىمدارىنىڭ دا قىزىعۋشىلىعىن تۋدىرىپ وتىرعان جوق. قالاي بولعاندا دا، باس ۋايىمى باسپانا بولعان بىلايعى حالىق جاڭا ينۆەستوردىڭ ەسىمىن جۋىق ارادا بىلە قويمايدى.
