مەملەكەت باسشىسى قاسىم-جومارت توقايەۆ بيىل ءساۋىر ايىندا ماڭعىستاۋ وبلىسىنا جۇمىس ساپارى اياسىندا قارىزداردى سۋبسيديالاۋ باعدارلامالارى شەڭبەرىندە ونەركاسىپ، تۋريزم جانە اگروونەركاسىپ كەشەنىندەگى ينۆەستيسيالىق جوبالاردى ىسكە اسىرۋعا «بايتەرەك» ۇلتتىق باسقارۋشى حولدينگى» اق-نىڭ قارجىلاندىرۋ كولەمىن ۇلعايتۋدى تاپسىرعان بولاتىن. اتالعان تاپسىرماعا سايكەس وبلىس اكىمدىگى جەڭىلدەتىلگەن نەسيەلەۋ تەتىكتەرىن ەنگىزۋ بويىنشا بەلسەندى جۇمىس جۇرگىزۋدە، دەپ حابارلايدى قوعامدىق كوممۋنيكاسيا ورتالىعى.

اتاپ ايتقاندا، شاعىن جانە ورتا بيزنەس سۋبەكتىلەرىنە 200 ملن تەڭگەگە دەيىن نەسيە بەرۋدى قاراستىرىپ، قارىز الۋشىلار ءۇشىن جىلدىق سىياقى مولشەرلەمەسى - 12،6% دەڭگەيىندە بەكىتىلدى.

باعدارلاما ەكونوميكانىڭ باسىم سالالارىندا ياعني ونەركاسىپ، كولىك جانە لوگيستيكا، تۋريزم، ءبىلىم بەرۋ مەن مەديسينا باعىتتارىندا كاسىپكەرلىكتى ىنتالاندىرۋعا باعىتتالعان.

سونداي-اق، ونەركاسىپ جانە تۋريزم سالاسىنداعى جوبالاردى قارجىلاندىرۋ ماقساتىندا «ورلەۋ» كاسىپكەرلىكتى قولداۋ باعدارلاماسى ىسكە قوسىلدى. باعدارلاما اياسىندا جالپى 750 ملرد تەڭگە كولەمىندە قاراجات قاراستىرىلعان. ونىڭ ىشىندە 300 ملرد تەڭگە - «دامۋ» كاسىپكەرلىكتى دامىتۋ قورى ەسەبىنەن، 450 ملرد تەڭگە - ەكىنشى دەڭگەيلى بانكتەر تاراپىنان بىرلەسىپ قارجىلاندىرىلادى.

«ورلەۋ» باعدارلاماسى كاسىپكەرلەرگە ۇزاقمەرزىمدى ءارى قولجەتىمدى قارجى الۋعا مۇمكىندىك بەرەدى. بۇل ءوز كەزەگىندە جاڭا ءوندىرىس ورىندارىن اشۋعا، ەكسپورتتىق الەۋەتتى ارتتىرۋعا جانە ءوڭىر ەكونوميكاسىن ءارتاراپتاندىرۋعا ىقپال ەتەدى.

سونىمەن قاتار، اگروونەركاسىپ كەشەنىندەگى جوبالاردى نەسيەلەندىرۋ باعدارلاماسى دا جۇزەگە اسىرىلۋدا. باعدارلاما جاڭا نەمەسە جۇمىس ىستەپ تۇرعان ءسۇت-تاۋار فەرمالارىن، ەت باعىتىنداعى قۇس فابريكالارىن، مال شارۋاشىلىعى كاسىپورىندارىن، كوكونىس جانە جەمىس ساقتاۋ قويمالارىن، ونەركاسىپتىك جىلىجاي شارۋاشىلىقتارىن اشۋعا نەمەسە كەڭەيتۋگە باعىتتالعان.

ءبىر جوباعا بەرىلەتىن ەڭ جوعارى نەسيە سومماسى 5 ملرد تەڭگەدەن اسپايدى.

جاڭا قارجىلاندىرۋ جۇيەسى كاسىپكەرلەرگە بيزنەس جوبالارىن ۇزاقمەرزىمدى پەرسپەكتيۆادا ىسكە اسىرۋعا، ءوندىرىس كولەمىن ۇلعايتۋعا جانە جاڭا جۇمىس ورىندارىن قۇرۋعا مۇمكىندىك بەرەدى.