يراكتا دايش سودىرلار ۇيىمىنىڭ لاڭكەستەرى قولىنان جارتى جىلدا 13 جۋرناليست قازا بولدى. بۇل تۋرالى «قامشى» پورتالى "شەكاراسىز رەپورتەر" حالىقارالىق ۇيىمىنا سىلتەمە جاساپ حابارلايدى. 

لاڭكەستەر مەملەكەتتىڭ سولتۇستىك ايماعىندا ورنالاسقان موسۋل قالاسىن 2014 جىلدىڭ ماۋسىمىندا باسىپ العان بولاتىن. اتالعان جۋرناليستەر وسى قالادا ازاپتالىپ ولتىرىلگەن. ۇيىمنىڭ ايتۋىنشا، سودىرلار موسۋل قالاسىنىڭ تەلە-راديو ستانسيالارىن ءوز باقىلاۋىندا ۇستاپ وتىر. سونداي-اق، «يسلام مەملەكەتىنىڭ» سودىرلارى تۇتقىنعا العان 10 ب ا ق وكىلىنىڭ تاعدىرى ءالى كۇنگە دەيىن بەلگىسىز دەيدى ولار.

ARA News سيريالىق اگەنتتىگىنىڭ مالىمەتىنشە، دايش وزدەرى باقىلاۋعا العان ايماقتاردا ورىن الىپ جاتقان جاعدايلاردى جاريالايتىن جۋرناليستەردىڭ بارلىعىنا ءقاۋىپ توندىرەدى. ماسەلەن، اعىمداعى جىلدىڭ تامىز ايىندا موسۋلدا Saladin TV ءجۋرناليسى ادەل ساەف پەن ونىڭ اكەسىن اتىپ ولتىرگەن بولاتىن. ال، بۇعان دەيىن ءدال وسى قالادا جۋرناليست ساماح مۋحاممەد پەن فوتوگراف ۆاليد ابدۋللا اتىلدى. ال، وسى جىلدىڭ قىركۇيەگىندە سيريا ۇكىمەتىنىڭ 56 اسكەرىن، مامىر ايىندا پالمير قالاسىندا 217 ادامدى ولتىرگەن بولاتىن. ونىڭ جارتىسىنان كوبى بەيبىت تۇرعىندار.