4 مىڭنان استام ۇلەسكەردىڭ اقشاسىن جيناپ الىپ، قاشىپ كەتكەن "ازبۋكا جيليا" قۇرىلىس كومپانياسىنىڭ جەتەكشىسى اۆستريادا جاسىرىنىپ ءجۇر ەكەن. بۇل تۋرالى «قامشى» پورتالى 31.kz-كە سىلتەمە جاساپ حابارلايدى.

ماجىلىستە دەپۋتات بولعان ەرقانات تايجانوۆ تۋرالى بۇل مالىمەتتى استانا قالاسىنىڭ پروكۋرورلارى رەسمي راستادى. سويتە تۇرا، قۇقىق قورعاۋ ورگانى قۇرىلىس كومپانياسىنىڭ باسشىسىن ەلگە الىپ كەلۋ تۋرالى سۇرانىس جاساماعان ەكەن. ەلورداداعى ۇلەسكەرلىك ماسەلەسى بويىنشا باسپا ءسوز قۇرالدارىن جيناعان پروكۋرورلار ەڭ الدىمەن قالاداعى جالپى احۋالعا توقتالدى. الايدا، تىلشىلەرگە قۇرعاق بايانداما ەمەس، حالىقتى الداعانداردىڭ زاڭ الدىندا جاۋاپ بەرگەنى تۋرالى ناقتى اقپاراتتار قىزىقتى بولدى. اسىرەسە، 4 مىڭعا جۋىق ۇلەسكەرى ۇيىنە جەتە الماي جۇرگەن "ازبۋكا جيليا" كومپانياسىنىڭ باسشىسىنا قاتىستى سۇراق كوپ قويىلدى. بۇعان دەيىن ەكس-دەپۋتات ەرقانات تايجانوۆتىڭ شەتەلدە جاسىرىنىپ جۇرگەنى تۋرالى قاۋەسەتتەر تاراعان بولاتىن. اتالعان جيىندا بۇل بولجامدى رەسمي ورگان راستادى.

– تايجانوۆتى قاماۋعا الۋ تۋرالى سىرتتاي شەشىم شىعارىلعان. وعان حالىقارالىق ىزدەۋ جاريالاندى. كۋاگەرلەردىڭ جاۋاپتارىنا سۇيەنسەك، تايجانوۆ اۆستريادا، ۆەنا قالاسىندا دەگەن بولجام بار، – استانا قالالىق پروكۋراتۋراسى باسقارماسىنىڭ پروكۋرورى تيمۋر كوپبوسىنوۆ

ازىرگە 27 ميللياردتى جىمقىردى دەلىنگەن كۇدىكتىنىڭ قايدا ەكەنى بەلگىلى. ءبىراق ونى ەلگە اكەلۋگە ءالى ەرتە سياقتى. ويتكەنى، قازاقستان مەن اۆستريا اراسىندا ەكستراديسيالاۋ تۋرالى كەلىسىم جوق ەكەن. ونىڭ ۇستىنە ەرقانات تايجانوۆقا قاتىستى تەرگەۋ ءالى اياقتالماعان.