الماتىدا اكىم اۋىسا سالىسىمەن ەسكى اكىم احمەتجان ەسىموۆتىڭ بۇرىنعى ورىنباسارلارى دا بىرىنەن سوڭ ءبىرى قىزمەتتەرىنەن بوسادى. جاڭا اكىم باۋىرجان بايبەك اپپارات جەتەكشىسىنەن باستاپ، بارلىق ورىنباسارلارىن جاڭالاپ الدى. ەسىموۆتىڭ ەسكى كولوداسىنداعى لاۋازىم يەلەرى قايدا كەتتى؟ قىزمەتسىز قالعاندارى بار ما؟ سوڭعى تاعايىنداۋلارعا ءبىر كوز جۇگىرتىپ وتسەك.

2008 جىلى الماتىعا كەلگەندە ا. ەسىموۆتىڭ بىردەن قىزمەتىن جوعارىلاتقان ادامى ەربول شورمانوۆ ەدى. قالالىق كاسىپكەرلىك جانە ونەركاسىپ باسقارماسىن باسقاراتىن ونى ا. ەسىموۆ كەلە سالىسىمەن اكىم اپپاراتىنىڭ جەتەكشىسى ەتىپ تاعايىندادى. ءبىر جىلدان سوڭ ەربول اكىم ورىنباسارى ورىنتاعىنا اۋىسقان بولاتىن. باس قالادا اكىم اۋىسقاندا ول احمەتجاننىڭ ارتىنان كەتكەندى ءجون سانادى. بۇگىندە «استانا ەكسپو-2017» ۇلتتىق كومپانياسى باسقارما ءتوراعاسىنىڭ، ياعني، تاعى دا ا. ەسىموۆتىڭ ورىنباسارى. الماتىدا جەتى جىل اكىمدىك ەتكەندە جانىنان تاستاماعان شورماننىڭ ەربولى ەسىموۆكە استانادا دا سەرىك بولماق.

احمەتجان اكىمدىكتەن تۇسە سالا قىزمەتىن وتكىزگەن شەنەۋنىكتىڭ ءبىرى – سەرگەي كۋيانوۆ. الىپ شاھار اكىمىنىڭ كەڭەسشىسى ءھام ءباسپاسوز-حاتشىسى قىزمەتىن قاتار اتقارعان س. كۋيانوۆ مىرزا دا ا. ەسىموۆتىڭ ەتەگىنە وراتىلىپ استانا استى. بۇل مىرزانىڭ اكىمدىكتەگى لاۋازىمدى قىزمەتتى سوڭعى ەكى جىلدا جەرگىلىكتى «الماتى» تەلەارناسىنىڭ باسشىلىعىمەن قوسا الىپ جۇرگەنى دە كوپتىڭ ەسىندە. سول كەزدە كۋيانوۆتىڭ قۇقايىن كورگەن ءبىر توپ جۋرناليست ۇيىمداسقان تۇردە تەلەارناداعى قىزمەتتەرىنەن ءوز ەرىكتەرىمەن شىعىپ كەتكەن بولاتىن. 

سونىمەن، سەرگەي مىرزا قىزمەت تاپپاي سەرگەلدەڭگە ءتۇستى دەي المايمىز. ول بۇگىن – 2017 جىلعا دەيىن «حيت-كومپانيا» مارتەبەسىنە يە «استانا ەكسپو-2017ء-نىڭ» قوعاممەن بايلانىس دەپارتامەنتىندە ديرەكتور.

ا. ەسىموۆتىڭ ورىنباسارلارىنىڭ ىشىندە ءبىر جالعىز ايەل بولعان. ءيا-يا! ىشكى ساياسات سالاسىنا جاۋاپتى زاۋرەش امانجولوۆانى ايتىپ وتىرمىز. ول كىسى دە اكىمدىكتە قالا المادى. ءبىراق، ب. بايبەكتىڭ «نۇر وتانداعى»، ياعني، پارتيا قالالىق فيليالى ءتوراعاسىنىڭ ورىنباسارلىعىنا تاعايىندالدى.

اكىم ورىنباسارلىعىنان سوڭعىلاردىڭ ءبىرى بولىپ بوساعان – يۋريي يلين مىرزا ايدى اسپانعا شىعاردى دەسە دە بولادى. يۋ. يلين مىرزانىڭ قالا دەڭگەيىندەگى نەمەسە الدەبىر كومپانيالاردىڭ قۇرامىنداعى «كەزەكشى» لاۋازىمدارعا ەمەس، اقورداعا ءبىراق بارۋى، پرەزيدەنت اكىمشىلىگىنىڭ مەملەكەتتىك ينسپەكتورى بولىپ تاعايىندالۋى اكىمدىك دالىزىندەگى ساۋەگەيلەر دە، كوك بازارداعى كورىپكەلدەر دە كۇتپەگەن جاعداي بولعان سياقتى.

ەندى ول جەر-جەردەگى اكىمدەردىڭ ەلباسى تاپسىرمالارىن ورىنداۋ جۇمىستارىنا باقىلاۋ جاسايتىن بولادى.

ا. ەسىموۆتىڭ ەسكى ورىنباسارلارى وسىنداي قىزمەتتەرگە جايعاستى. ايتسا دا، قالالىق اكىمدىكتە قارجى سالاسىنا جاۋاپتى بولعان مۇرات قۇدىشيەۆتىڭ قايدا تاعايىندالعانى ازىرگە بەلگىسىز بولىپ وتىر. ەسكى قىزمەتىندەگى ەسەپ-قيسابىندا قاتەلىكتەر بولماسا، كوپ ۇزاماي ول كىسى دە جايلى ورىنداردىڭ بىرىنە جايعاسار دەپ ويلايمىز.

دارحان مۇقان