«قازاۆتوجول» ۇلتتىق كومپانياسى» اق «استانا – اتباسار» جانە «قىزىلوردا – شىمكەنت» ۋچاسكەلەرىندە اقىلى قوزعالىس ەنگىزبەك. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

كەشە «قازاۆتوجول» ۇك» اق-ى ديرەكتورلار كەڭەسىنىڭ وتىرىسى ءوتتى، وندا قازاقستانداعى جول-كولىك ينفراقۇرىلىمىن ۇستاۋ جانە دامىتۋ بويىنشا قوعامنىڭ ودان ءارى قىزمەتىنىڭ وزەكتى ماسەلەلەرى مەن سەنارييلەرى قارالدى. 

ينۆەستيسيا جانە دامۋ ءبىرىنشى ۆيسە-مينيسترى جەڭىس قاسىمبەكتىڭ ءتوراعالىق ەتۋىمەن وتكەن كەڭەس اقىلى اۆتوموبيل جولدارىن دامىتۋ سەنارييىن، «قازاۆتوجول» ۇك» اق تاۋارلارى، جۇمىستارى، كورسەتىلەتىن قىزمەتتەرىن ساتىپ الۋ قاعيداسىنا ەنگىزىلگەن تولىقتىرۋلاردى، 2014 جىلعى ىشكى اۋديت قىزمەتىنىڭ جىلدىق ەسەبى جانە قوعامنىڭ باسقا دا ماڭىزدى ماسەلەلەرىن قارادى.

اتاپ وتسەك، كەڭەستە «قازاۆتوجول» ۇك» اق 2014 جىلعى ىشكى اۋديت قىزمەتىنىڭ جىلدىق ەسەبى بەكىتىلىپ، 2014 جىلعى اۋديت ناتيجەلەرى بويىنشا قابىلدانعان شارالار تۋرالى قوعام باسقارماسىنىڭ ەسەبى ماقۇلداندى. وسى ماسەلە بويىنشا ديرەكتورلار كەڭەسى قوعام باسقارماسىنا ق ر زاڭناماسىنىڭ، قوعامنىڭ ىشكى قۇجاتتارىنىڭ ساقتالۋىن، تۇزەتۋ شارالار جوسپارىنىڭ ورىندالۋىن باقىلاۋدى كۇشەيتۋدى تاپسىردى.

سونىمەن قاتار، كەڭەس 2016 جىلعى 2 كەزەڭدە «استانا - اتباسار» جانە «قىزىلوردا - شىمكەنت» ۋچاسكەلەرىندە اقىلى قوزعالىستى ۇيىمداستىرۋ مۇمكىندىگىن تالقىلادى. باسقارۋدىڭ ءتيىمدى جۇيەسىن قالىپتاستىرۋ ماقساتىندا «KazToll» ج ش س ەنشىلەس كومپانياسىن قۇرۋ ۇسىنىسى قوزعالدى، وعان اقىلى قوزعالىستى ۇيىمداستىرۋ جانە رەسپۋبليكالىق ماڭىزى بار اقىلى اۆتوموبيل جولدارىن دامىتۋ جونىندەگى وكىلەتتىكتەر بەرىلەدى.

ەستەرىڭىزگە سالر بولساق، 27 قازاندا مەملەكەت باسشىسى «قازاقستان رەسپۋبليكاسىنىڭ جول-كولىك ينفراقۇرىلىمىن، كولىك لوگيستيكاسىن جانە اۆياتاسىمالدى دامىتۋ ماسەلەلەرى جونىندەگى كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. وسىلايشا، زاڭعا سايكەس «قازاۆتوجول» ۇك» اق ۇلتتىق وپەراتورىنا جاڭا وكىلەتتىكتەر بەرىلدى، قازاقستانداعى جول-كولىك ينفراقۇرىلىمىن ۇستاۋ جانە دامىتۋ جونىندەگى جالعىز وپەراتور بولىپ جاريالاندى.