توقسانىنشى جىلداردىڭ سوڭى... ءبىر توپ قازاقستاندىقتار ەۋروپانىڭ تورىنە، نەمىس جەرىنە تابان تىرەدىك. دەلەگاسيا قۇرامىندا كىمدەر جوق دەيسىز؟ اق ساقالدى اكادەميك تە، قىرما ساقال كاسىپكەر دە، ءدىنى بەرىك ءدىندار دا، كۇمىس كومەي ءانشى دە، ءتىپتى "جالاڭاياق" جۋرناليست تە بارمىز. اتتارىن اتاماي-اق قويايىن، ونى سالدەن سوڭ وزدەرىڭىز دە تۇسىنەسىزدەر. حوش، سونىمەن مەيمانحاناعا ورنالاسىپ جاتىرمىز. وپەراتور حاسەن ومارقۇلوۆ ەكەۋمىزگە اتشاپتىرىم ەكى بولمەلىك نومەر بۇيىردى. كارى قۇرىلىققا العاش تابانى تيگەن بىزدەر ءۇشىن ءبارى تاڭسىق. توڭازىتقىشتا ءتىزىلىپ تۇرعان نەشە ءتۇرلى سۋسىندار، پۋلتپەن ىستەيتىن جەلدەتكىش، ءتىپتى ەسىكتىڭ ءوزىن ماگنيت كارتەشكەمەن اشۋدىڭ ءوزى تاڭ قالدىرىپ جاتتى. حاسەن باتىر التى ادام ەركىن اۋنايتىن الىپ توسەككە جاتا قالىپ تەليەۆيزوردى قوسپاي ما...اناۋ جاقتان جالاڭاش ايەل ەركەگىمەن جارق ەتە تۇسكەندە كوزىمىزدىڭ بۇلدىراپ كەتكەنىن نەسىن جاسىرايىن. الگى بالەسى جالت-جۇلت ەتتى دە جوق بولدى. ورنىنا نەمىسشە ءبىر جازۋلار قايتا-قايتا جىلتىڭداپ شىعا بەرىپ، جىنىمىزعا ءتيدى. حاسەكەڭ مۇندايدا پىسىق. نەمىسشەسى جوق بولسا دا جۇگىرىپ كەتىپ، "جەردەن جەتى قويان تاپقانداي" قايتا ورالدى. -ە، ءبىلدىم،-دەيدى،-مىنا ءپۋلتتىڭ مىنا ءبىر نۇكتەسىن باسا قويساڭ، جاڭاعىنى قالاعانىڭشا كورە بەرەدى ەكەنسىڭ. تەك ەرتەڭ تاڭەرتەڭ "رەسەپشىنگە" اقشاسىن تولەسەڭ بولعانى... ...حاسەن قويمادى. مەن دە كوپ قارسىلىق بىلدىرمەدىم عوي دەيمىن. ايتەۋىر بىر-ەكى ساعات كورگەنىمىز ەسىمدە. ەڭ قيىنى تاڭەرتەڭ بولدى. اقشا تولەيتىن جەرگە بارۋعا جۇرەك داۋالاماي، ءبىراز تولقىعانىمىز راس. از دا بولسا ۇياتتىڭ بولعاندىعىنان عوي دەيمىن. تولەمەسەڭ تاعى بالە. ۇيالا، ۇيالا "رەسەپشىنگە" كەلسەك... بۇكىل دەلەگاسيا وسىندا. اق ساقالدى اكادەميك تە، قىرما ساقال كاسىپكەر دە، ءدىلى بەرىك ءدىندار دا، كۇمىس كومەي ءانشى دە...وعان جالاڭاياق جۋرناليستەر قوسىلدىق. ءدال بىردەڭە ءبۇلدىرىپ قويعانداي، بىر-بىرىمىزگە تۋرا قاراۋعا تايساقتاعانىمىزدى ايتساڭىزشى ، سوندا...نەمىس حالقىنىڭ دانىشپاندىعىنا تاڭ قالىپ ەدىم سوندا. ءبىزدى ەشكىم قيناعان جوق. كورمەسەڭ كورمەي-اق قوي... ءولىپ بارا جاتساڭ اقشاسىن تولە دە كورە بەر! وتە دۇرىس پرينسيپ... ...كەشە تۇندە كەزەكتى سەنارييىمدى ءبىتىرىپ، ءتۇن ورتاسىنان اۋىپ كەتسە دە تەليەۆيزوردى قوسا قالعانىم بەكەر بولدى-اۋ... الگى ستۆ ارناسىنان جالاڭاش قىزداردى كورىپ شالقامنان ءتۇستىم. نەمىستەر سەكىلدى ەمەس. قانشا كورەم دەسەڭ دە كورە بەر. ءتىپتى تەلەفونىن ۇسىنىپ، وڭاشادا ويىڭنان شىعاتىندىعىنا كەپىلدىك بەرىپ جاتىر. اۋ، مۇنىڭ بارلىعىن ون بەس جىل بۇرىن ءوتىپ كەتىپ ەدىك قوي! ستۆ-نىڭ ەسى دۇرىس ەمەس! اق ساقالدى، قىرما ساقالدى كوكەلەر! سەنبەسەڭىزدەر بۇگىن تۇندە ستۆ-نى قوسىڭىزدار! نەمەرەلەر ۇيىقتاپ قالادى ول كەزدە... تەك، تاڭەرتەڭ بىر-بىرىمىزدەن ۇيالىپ جۇرمەيىك...
ءتۇيىن: بۇل زاڭ بۇزۋشىلىق بولىپ سانالادى. ق ر ب ا ق تۋرالى زاڭىنىڭ، 25 باپ، 2-1 تارماعىنا سايكەس زورلىق جانە پورنوگرافيالىق اقپارات ءۇشين ستۆ ارناسى زاڭ الدىندا جاۋاپ بەرۋگە ميندەتتى.
ارمان سقابىل ۇلى
پىكىر قالدىرۋ