فرانسۋز رەسپۋبليكاسىندا رەسمي ساپارمەن جۇرگەن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ كەشە شتاب-پاتەرى پاريج قالاسىندا ورنالاسقان يۋنەسكو-نىڭ 38ء-شى باس كونفەرەنسياسىنا قاتىستى. بۇل كونفەرەنسيانىڭ اتالعان حالىقارالىق ۇيىمنىڭ 70 جىلدىق مەرەيتويىمەن سايكەس ۇيىمداستىرىلعانىن ايتا كەتكەن ابزال.
يۋنەسكو – بىرىككەن ۇلتتار ۇيىمىنىڭ ءبىلىم، عىلىم جانە مادەنيەت ءجونىندەگى قۇرىلىمى. ول 1945 جىلى 16 قاراشادا قۇرىلعان، شتاب-پاتەرى، جوعارىدا ايتقانىمىزداي، فرانسيانىڭ استاناسىندا ورنالاسقان. يۋنەسكو-عا 195 مەملەكەت مۇشە بولسا، 9 مەملەكەت سەرىكتەس مۇشە سانالادى. وعان مۇشە ءاربىر ەلدىڭ ۇكىمەتى وسى حالىقارالىق ۇيىممەن جۇمىس ىستەيتىن وزدەرىنىڭ ۇلتتىق كوميسسيالارىن قۇرادى. قازىرگى كۇنى وسىنداي 198 ۇلتتىق كوميسسيا بار. ۇيىم جانىندا 184 مەملەكەتتىڭ تۇراقتى وكىلدىگى جۇمىس ىستەيدى. قازاقستان تاراپىنان وسىنداي قىزمەتتى ۇزاق جىلدار بويى ولجاس سۇلەيمەنوۆتىڭ اتقارىپ كەلگەنى بەلگىلى. 2013 جىلدان باستاپ بۇل مىندەتتى قازاقستاننىڭ فرانسياداعى ەلشىسى نۇرلان دانەنوۆ اتقارۋدا.
سونداي-اق، يۋنەسكو قۇرامىنا الەمنىڭ تۇكپىر-تۇكپىرىندە ورنالاسقان 50-دەن استام بيۋرو مەن بولىمشەلەر كىرەدى.
يۋنەسكو-نىڭ باس كونفەرەنسياسى ونىڭ جوعارى باسقارۋ ورگانى بولىپ تابىلادى. ول ەكى جىلدا ءبىر رەت شاقىرىلادى. ءاربىر مۇشە مەملەكەت باس كونفەرەنسياداعى داۋىس بەرۋ كەزىندە ءبىر داۋىسقا يەلىك ەتەدى. كونفەرەنسيا يۋنەسكو-نىڭ باعدارلاماسى مەن بيۋدجەتىن بەكىتەدى. ماڭىزدى ماسەلەلەر جونىندە شەشىمدەر قابىلدايدى.
يۋنەسكو-نىڭ حح عاسىرداعى اسا ءماندى جوبالارى مىنالار: ەكىنشى دۇنيەجۇزىلىك سوعىس جىلدارىندا اسكەري ارەكەتتەردەن زارداپ شەككەن كىتاپحانا جانە مۇراجاي قورلارىن قالپىنا كەلتىرۋ؛ ازيادا، افريكادا، لاتىن امەريكاسىندا باستاۋىش ءبىلىم بەرۋ جۇيەلەرىن دامىتۋ؛ قۇندى ەڭبەكتەردى اۋدارۋ، تىكەلەي بايلانىستار ورناتۋ ارقىلى باتىس پەن شىعىستىڭ اراسىندا مادەني الماسۋدى دامىتۋ؛ دامۋشى ەلدەردەگى ساۋاتسىزدىقتى جويىپ، «نەگىزگى ءبىلىم بەرۋ» جۇيەسىن قالىپتاستىرۋ (وقۋ ورتالىقتارى كامبودجادا، ءۇندىستاندا، تايلاندتا، وڭتۇستىك كورەيادا، ليبەريادا، تۇركيادا، سونداي-اق، ءبىرقاتار لاتىن امەريكاسى ەلدەرىندە، تاياۋ شىعىس ەلدەرىندە ورىن تەپكەن)؛ وركەنيەت ەسكەرتكىشتەرىن ساقتاۋ.
يۋنەسكو-نىڭ قامقورلىعىمەن 1959 جىلدان باستاپ مادەني قۇندىلىقتاردى ساقتاۋ جانە قالپىنا كەلتىرۋ بويىنشا حالىقارالىق كوميتەت جۇمىس ىستەپ كەلەدى.
يۋنەسكو-نىڭ نەگىزگى ماقساتى – بەيبىتشىلىك پەن قاۋىپسىزدىكتى، ەلدەردىڭ ءبىلىم، عىلىم جانە مادەنيەت سالالارىنداعى ىنتىماقتاستىعىن دامىتۋ، بۇۇ قاۋلىسىندا ايتىلعانداي، جالپىعا بىردەي قۇرمەتپەن قاراپ، ادام قۇقى مەن بوستاندىقتار نەگىزىندە تۇرى-تۇسىنە، جىنىسىنا، ءتىلى مەن دىنىنە قاراماستان، بارلىق ەلدە ادىلەتتىلىك پەن زاڭدىلىقتىڭ ورىندالۋىن قامتاماسىز ەتۋ.
ال قازاقستان مەن يۋنەسكو اراسىنداعى ىنتىماقتاستىق ماسەلەسىنە كەلسەك، 2012 جىلدىڭ مامىرىندا يۋنەسكو-نىڭ باس ديرەكتورى يرينا بوكوۆا ەلىمىزگە العاش رەت رەسمي ساپارمەن كەلدى. يۋنەسكو باسشىسى الەمدىك جانە ءداستۇرلى دىندەر ليدەرلەرىنىڭ كەزەكتى سەزىنە قۇرمەتتى قوناق رەتىندە قاتىستى. سونىمەن قاتار، ساپار بارىسىندا ي.بوكوۆانىڭ قازاقستان رەسپۋبليكاسىنىڭ پرەزيدەنتى ن.ءا.نازاربايەۆپەن، پارلامەنت سەناتىنىڭ سول كەزدەگى ءتوراعاسى – سەزد حاتشىلىعىنىڭ باسشىسى قايرات ماميمەن، سول كەزدەگى سىرتقى ىستەر ءمينيسترى ەرجان قازىحانوۆپەن جانە سول كەزدەگى ۇلتتىق كوميسسيانىڭ ءتوراعاسى، استانا قالاسىنىڭ اكىمى يمانعالي تاسماعامبەتوۆپەن كەزدەسۋلەرى ءوتتى. وسى كەزدەسۋلەردىڭ بارلىعىندا قازاقستاننىڭ يۋنەسكو-مەن ىنتىماقتاستىعى جانە ونىڭ الداعى ۋاقىتتا بارلىق باعىتتار بويىنشا دامۋ پەرسپەكتيۆالارىنا جوعارى باعا بەرىلدى.
06-11-03-03
2012 جىلعى قىركۇيەكتە ەلوردادا ۇلتتىق كوميسسيانىڭ جانە استانا قالاسى اكىمدىگىنىڭ قولداۋىمەن تۇركسوي مۇشەلەرىنىڭ يۋنەسكو ىستەرى جونىندەگى ۇلتتىق كوميسسيالار مەن كوميتەتتەرىنىڭ ءۇشىنشى وتىرىسى وتكىزىلدى. وتىرىس «استانا – تۇركى الەمىنىڭ مادەني استاناسى» اتتى جىلدىڭ اياسىندا وتكىزىلدى.
2013 جىلعى تامىزدا استانا قالاسىندا بۇۇ باس اسسامبلەياسىنىڭ 67-سەسسياسىندا قازاقستاننىڭ باستاماسىمەن قولعا الىنعان 2013-2022 جىلدارعا ارنالعان مادەنيەتتەر جاقىنداستىعىنىڭ حالىقارالىق ونجىلدىعىن ۇلىقتاۋعا بايلانىستى حالىقارالىق فورۋم وتكىزىلدى. فورۋمنىڭ قۇرمەتتى قوناقتارىنىڭ قاتارىندا يۋنەسكو باس ديرەكتورى يرينا بوكوۆا، بۇۇ باس حاتشىلىعىنىڭ وركەنيەتتەر اليانسىنىڭ جوعارى وكىلى ناسير ابدۋلازيز ال-ناسسەر، تۇركسوي باس ديرەكتورى دۇيسەن قاسەيىنوۆ، بۇۇ ءبىلىم الۋعا قۇقىق جونىندەگى ارنايى بايانداماشىسى ك.سينگح، لاتىن مادەنيەت اكادەمياسىنىڭ باس حاتشىسى ك.مەندەس، 1986 جىلعى ادەبيەت جونىندەگى نوبەل سىيلىعىنىڭ لاۋرەاتى، نيگەريالىق جازۋشى ۆ.شويينكا بولدى.
سونىمەن قاتار، يۋنەسكو باس ديرەكتورى ي.بوكوۆانىڭ قازاقستانعا ساپارى شەڭبەرىندە قازاقستاندىق بوكسشى، وليمپيادا چەمپيونى س.ساپييەۆكە «يۋنەسكو-نىڭ سپورت سالاسى بويىنشا ىزگى نيەت ەلشىسى» اتاعىن بەرۋ، ل.ن.گۋميليەۆ اتىنداعى ەۇۋ-دە يۋنەسكو-نىڭ تولەرانتتىلىق جونىندەگى كافەدراسىن اشۋ سالتاناتى وتكىزىلدى.
2013 جىلعى قاراشادا يۋنەسكو باس كونفەرەنسياسىنىڭ 37-سەسسياسى بارىسىندا كازاقستاننىڭ كانديداتۋراسى 2013-2017 جىلدارعا يۋنەسكو-نىڭ ءبۇكىلالەمدىك مۇرا كوميتەتىنە، حالىقارالىق ۇيلەستىرۋ كەڭەسىنىڭ «ادام جانە بيوسفەرا» (ماب) باعدارلاماسىنا جانە ۇكىمەتارالىق كەڭەسءتىڭ كوممۋنيكاسيالاردىڭ دامۋى حالىقارالىق باعدارلاماسىنا سايلاندى. سونىمەن قاتار، باس كونفەرەنسيا 2014-2015 جىلدارعا رەجيسسەر جانە ءارتىس ءشاكەن ايمانوۆتىڭ تۋعانىنا – 100 جىل (2014 ج.)، جازۋشى ءى.ەسەنبەرليننىڭ تۋعانىنا 100 جىل تولۋىنا وراي بۇل شارالاردىڭ يۋنەسكو-نىڭ ەستەلىك جانە مەرەيتويلىق داتالار كۇنتىزبەسىنە ەنگىءزىلۋىن بەكىتتى.
وسى جولعى ساپارىندا قازاقستان باسشىسى يۋنەسكو-نىڭ باس ديرەكتورى يرينا بوكوۆامەن كەزدەستى. كەزدەسۋ بارىسىندا مادەني جانە تاريحي مۇرالاردى ساقتاۋ ىسىندە، ءبىلىم جانە عىلىم سالاسىندا حالىقارالىق بايلانىستار اياسىن كەڭەيتۋدەگى قازاقستان مەن يۋنەسكو-نىڭ ءوزارا ىقپالداستىعى ماسەلەلەرى تالقىلاندى.
ەلباسى قازاقستاننىڭ يۋنەسكو-نى قولدايتىنىن جانە بەلسەنە ىنتىماقتاسىپ كەلە جاتقانىن ايتتى. ن.نازاربايەۆ ي.بوكوۆانىڭ 2012 جىلى استاناعا ساپارى اياسىندا الەمدىك جانە ءداستۇرلى دىندەر ليدەرلەرىنىڭ سەزىنە قاتىسۋىنىڭ ماڭىزدىلىعىن اتاپ ءوتتى. «يۋنەسكو-مەن ءبىزدىڭ ارامىزدا جاقسى قارىم-قاتىناس ورنىققان. «ادامزاتتىڭ ار-ۇجدانى» اتالعان بۇل ۇيىم داستۇرلەر مەن مادەني قۇندىلىقتاردى قورعايدى. قازاقستان مادەنيەتىنىڭ كوپتەگەن ايشىقتى داتالارى يۋنەسكو-دا اتاپ ءوتىلدى»، – دەدى قازاقستان پرەزيدەنتى.
ي.بوكوۆا ءوز سوزىندە قازاقستان يۋنەسكو-نىڭ ەڭ بەلسەندى ءارى ىلكىمدى سەرىكتەسى سانالاتىنىن ايتا كەلىپ، سوعان بايلانىستى ۇيىمنىڭ 70 جىلدىعىندا ونىڭ باس كونفەرەنسياسىنىڭ نۇرسۇلتان نازاربايەۆسىز ءوتۋىن ەلەستەتۋ مۇمكىن ەمەستىگىنە نازار اۋداردى. يۋنەسكو باس ديرەكتورى قازاقستاننىڭ مادەنيەتتەردى جاقىنداستىرۋعا بايلانىستى ۇسىنعان باستامالارى مەن جوبالارىنىڭ الەمدەگى كەلىسىمدى نىعايتۋ ىسىندە زور ماڭىزى بار ەكەنىن دە اتاپ ءوتتى.
ەلباسى ۇيىمنىڭ باس كونفەرەنسياسىنا قاتىسۋى بارىسىندا ءسوز سويلەدى. نۇرسۇلتان ءابىش ۇلى باستان-اياق مەملەكەتتىك تىلدە سويلەدى. قازاقستان پرەزيدەنتى ءوزىنىڭ سوزىندە بىرىككەن ۇلتتار ۇيىمى جۇيەسىندەگى يۋنەسكو-نىڭ الاتىن ورنى ايرىقشا ەكەنىن، وسىدان 70 جىل بۇرىن قۇرىلعان بۇل ۇيىم «ادامزاتتىڭ ار-ۇجدانى» دەپ اتالاتىنىن اتاپ ءوتتى. سونداي-اق، ۇيىمنىڭ ادامزاتتىق تاريحي-مادەني مۇرالاردى ساقتاۋ ىسىنە، ءبىلىم، عىلىم، كوممۋنيكاسيا سالالارىنداعى حالىقارالىق بايلانىستار اياسىن كەڭەيتۋگە زور ۇلەس قوسقاندىعىنا توقتالدى. قازاقستاننىڭ يۋنەسكو-نىڭ قىزمەتىن تولىق قولدايتىنىن ايتتى.
«بۇل ۇيىمنىڭ نەگىزگى باسىمدىعى بىرىككەن ۇلتتار ۇيىمىنىڭ ورنىقتى دامۋ ماقساتىنىڭ ماڭىزدى باعىتى بولىپ سانالادى. مەن وسى مىنبەردەن 20 جىل بۇرىن، تاۋەلسىزدىگىمىزدىڭ ءتاڭسارى شاعىندا جاس مەملەكەتتىڭ ءماقسات-مىندەتتەرى تۋرالى بايانداعان ەدىم. بۇگىندە ءبىز بىرىككەن ۇلتتار ۇيىمىنىڭ مىڭجىلدىق دامۋ ماقساتتارىنىڭ كوبىنە قول جەتكىزدىك»، – دەدى نۇرسۇلتان نازاربايەۆ.
قازاقستان پرەزيدەنتى ەتنوسارالىق، مادەنيەتارالىق، ءدىنارالىق نەگىزدە وركەنيەتتەردىڭ كۇيرەۋى مەن قاقتىعىسى ۋشىعىپ كەتكەنىنە ارنايى توقتالدى. «بىرىككەن ۇلتتار ۇيىمى باس اسسامبلەياسىنىڭ مەرەيتويلىق 70ء-شى سەسسياسىندا وتكەن دەباتتار الەم دامۋىنىڭ جاڭا پاراديگماسىن ازىرلەۋ قاجەتتىگىن ءدالەلدەپ بەردى. قازاقستاننىڭ حالىقارالىق باستامالارى وسى ماڭىزدى مىندەتتى ورىنداۋعا باعىتتالعان. ءبىز «جاھاندىق ستراتەگيالىق باستاما-2045» جوسپارىن ۇسىنامىز. ونىڭ ءمانىسى – سوعىستار مەن قاقتىعىستاردىڭ تۇپكى سەبەپتەرىنە جول بەرمەيتىن بۇكىلالەمدىك دامۋ ستراتەگياسىن جاساۋ»، – دەدى مەملەكەت باسشىسى.
قازاقستان پرەزيدەنتى قازىرگى الەمنىڭ ماقساتى يادرولىق قارۋسىز الەمدى ورنىقتىرۋ ەكەنىن، سول ءۇشىن بۇۇ يادرولىق قارۋدان ادا الەمگە قول جەتكىزۋ جونىندەگى جالپىعا ورتاق دەكلاراسيا قابىلداۋدى ۇسىناتىنىن ايتتى. «2016 جىلى مەنىڭ سەمەي يادرولىق پوليگونىن جابۋ تۋرالى جارلىققا قول قويعانىما 25 جىل تولادى. بۇل الەمدىك قوعامداستىقتىڭ يادرولىق قارۋسىز الەمگە قول جەتكىزۋ جولىندا كۇش جۇمىلدىرۋى ءۇشىن ماڭىزدى سەبەپ بولا الادى»، – دەدى نۇرسۇلتان نازاربايەۆ.
مەملەكەت باسشىسى تەرروريزم مەن ءدىني ەكسترەميزمگە قارسى ءبىرتۇتاس حالىقارالىق مايدان اشۋ ماسەلەسىنە دە توقتالدى. «الەمدىك وركەنيەتتەر مەن نەگىزگى دىندەردىڭ بەسىگى بولعان ەجەلگى مەسوپوتاميا جەرى بۇگىندە اياۋسىز ءبۇءلىنىپ، توناۋعا ءتۇستى. «يسلام مەملەكەتى» دەگەن اتتى جامىلعاندار تاياۋ شىعىستىڭ بىرەگەي تاريحي-مادەني مۇراسىنا ورنى تولماس زيان كەلتىرۋدە. قازاقستان تەرروريزم مەن ەكسترەميزمنىڭ كەز كەلگەن كورىنىسىن باتىل ايىپتايدى. ءبىز ءبىرىككەن ۇلتتار ۇيىمىنىڭ قولداۋىمەن حالىقارالىق تەرروريزم مەن ەكسترەميزمگە قارسى ارەكەتتىڭ الەمدىك ءبىرىڭعاي جەءلىءسىن قۇرۋدى ۇسىنامىز»، – دەدى قازاقستان پرەزيدەنتى.
يسلام راديكاليزمىمەن كۇرەس كەزىندە ونى بەيبىتسۇيگىش يسلاممەن شاتاستىرىپ الماۋ ماڭىزدى ەكەنى، ال ەكسترەميزمگە تەك مادەنيەتارالىق جانە ءدىنارالىق ءۇنقاتىسۋلار نەگىزىندە عانا قارسى تۇرۋعا بولاتىنى دا اتاپ ءوتىلدى. نۇرسۇلتان نازاربايەۆتىڭ ايتۋىنشا، ءبىزءدىڭ ەل ۇسىنعان «يسلام تەرروريزمگە قارسى» اتتى فورۋم ناق وسى ماقساتقا باعىتتالعان.
نۇرسۇلتان نازاربايەۆ قازاقستان الەمدىك جانە ءداستۇرلى دىندەر ليدەرلەرىءنىڭ بەس سەزىن وتكىزگەنىنە، وندا ءتۇرلى كونفەسسيالاردىڭ وكىلدەرى بەيبىتشىلىك پەن كەلىسىمگە، زورلىق-زومبىلىق قولدانباۋعا شاقىراتىنىنا نازار اۋداردى.
قازاقستان پرەزيدەنتى بەيبىتشىلىك پەن حالىقارالىق تۇراقتىلىقتى قامتاماسىز ەتۋ بارىسىندا يۋنەسكو-نىڭ الەۋەتىن كەڭىنەن پايدالانۋ قاجەتتىگىنە توقتالا وتىرىپ، ۇيىم جانىنان بەيبىتشىلىك پەن ورنىقتى دامۋدى قولداۋ جونىندەگى حالىقارالىق اكادەميا قۇرۋدى ۇسىندى. «اكادەميا وزىق الەمدىك تاجىريبەگە سۇيەنە وتىرىپ، بەيبىتشىلىك پەن ورنىقتى دامۋدى قولداۋ جونىندە پروگرەسسيۆتى يدەيالار مەن ءتيىمدى شارالار ازىرلەي الار ەدى. يۋنەسكو-نىڭ «بەيبىتشىلىك مادەنيەءتى» تۇجىرىمداماسىن جۇزەگە اسىرۋ ارقىلى قاقتىعىستاردىڭ ەرتەرەك الدىن الۋ جولىن ىزدەستىرۋدىڭ ەرەكشە ماڭىزى بار. اتالعان تۇجىرىمداما قاعيداتتارى قازاقستاننىڭ بۇۇ قولداۋىمەن «جاڭا بولاشاق» تۇجىرىمداماسىن ازىرلەۋ جونىندەگى باستاماسىمەن ۇندەسەدى»، – دەدى نۇرسۇلتان نازاربايەۆ.
قازاقستان باسشىسى فرانسۋز موناحى گيلوم رۋبرۋك XIII عاسىردىڭ ورتاسىندا حريستيان، بۋددا، مانيحەي جانە مۇسىلمان قاۋىمى تاتۋ تىرشىلىك كەشكەن قازاقتىڭ كونە قويلىق قالاسىندا بولعانىن ەسكە سالدى. «بىلتىر قازاقستان، جۇڭگو جانە قىرعىزستاننىڭ باستاماسىمەن يۋنەسكو-نىڭ دۇنيەجۇزىلىك مۇرالارى تىزىمىنە ۇلى جىبەك جولىندا ورنالاسقان سەگىز ارحەولوگيالىق نىسان ەنگىزىلدى. بۇل تىزىمدە تولەرانتتىلىقتىڭ، ءدىني توزىمدىلىك پەن دوستىقتىڭ سيمۆولى – قويلىق قالاسى دا بار. ەلىمىز تاياۋدا قازاق حاندىعىنىڭ 550 جىلدىعىن اتاپ ءوتتى. ءبىز ۇلى دالانىڭ تاريحي-مادەني مۇراسى مەن رۋحاني قۇندىلىقتارىن جاڭعىرتىپ جاتىرمىز. يۋنەسكو-نىڭ الدىن الا ەسەپكە الۋ تىزىمىندەگى ەسكەرتكىشتەر مۇقيات قورعالۋدا. ولاردىڭ قاتارىندا وتىرار، تۇركىستان، ساۋران جانە سىعاناق بار»، – دەدى قازاقستان پرەزيدەنتى.
ەلباسى ءوز سوزىندە ۇلى جىبەك جولى داستۇرلەرىن جاڭعىرتۋدىڭ ايرىقشا ماڭىزدىلىعىن اتاپ ءوتتى. «ونىڭ تاريحىنا قاراپ، تىعىز ىنتىماقتاستىق پەن ءوزارا مادەني بايلانىس بۇكىل ادامزات ءۇشىن بەيبىتشىلىك پەن دامۋ نەگىزى ەكەنىنە كوز جەتكىزەمىز. يۋنەسكو-نىڭ اتاۋلى داتالار كۇنتىزبەسىنە جىبەك جولىنىڭ جەتىسۋ بولىگىندەگى توعىسۋ ورتالىعى بولعان الماتى قالاسىنىڭ 1000 جىلدىعى ەنگىزىلگەنىن ريزاشىلىقپەن اتاپ وتكىم كەلەدى»، – دەدى نۇرسۇلتان نازاربايەۆ.
سونىمەن قاتار، نۇرسۇلتان ءابىش ۇلى ءىس-شاراعا قاتىسۋشىلارعا قازاقستاننىڭ يۋنەسكو-عا ءبىزدىڭ ەل باستاماشىلىق ەتكەن 2013-2022 جىلدارعا ارنالعان ءمادەنيەتتەر جاقىنداستىعىنىڭ حالىقارالىق ونجىلدىعىن جۇزەگە اسىرۋ ءىسى بويىنشا قولداۋ كورسەتىپ وتىرعانى تۋرالى دا ايتىپ بەردى.
سوڭىندا قازاقستان پرەزيدەنتى ەلىمىزدەگى ءبىلىم بەرۋ سالاسىندا جۇرگىزىلىپ جاتقان رەفورمالارعا جانە استانادا ەكسپو-2017 حالىقارالىق كورمەسىن وتكىزۋگە دايىندىق بارىسىنا توقتالىپ، بارشا دەلەگاتتاردى وسى كورمەنى كەلىپ كورۋگە شاقىردى.
نۇرسۇلتان نازاربايەۆ كونفەرەنسيادا ءسوز سويلەگەننەن كەيىن جۋرناليستەرمەن كەزدەسىپ، فرانسياعا جاساعان رەسمي ساپارىنىڭ قورىتىندىسىنا ارنالعان بريفينگ وتكىزدى.
قازاقستان پرەزيدەنتى بريفينگتە ساپارىنىڭ جوعارى دەڭگەيدە وتكەءنىن جانە فرانسۋز تاراپى ايرىقشا قوناقجايلىق كورسەتكەنىن، بۇل ەكى ەلدىڭ تىعىز سەرىكتەستىك ورناتىپ وتىرعانىنىڭ ايعاعى ەكەنىن اتاپ ءوتتى. «ءبىز فرانسيانىڭ بۇرىنعى باسشىلىعىمەن ستراتەگيالىق سەرىكتەستىك تۋرالى ۋاعدالاسقان ەدىك. بۇگىندە 34 ءىرى جوبا ىسكە اسىرىلدى، 24ء-ى جۇزەگە اسىرىلۋ كەزەڭىندە تۇر، كەشەگى بيزنەس-فورۋمدا جاسالعان كەلىسىمشارتتار مەن كەلىسىمدەرگە سايكەس تاعى ونداعان جوبا بولاشاققا جوسپارلانعان»، – دەدى نۇرسۇلتان نازاربايەۆ.
قازاقستان پرەزيدەنتى فرانسيانىڭ ەۋروپا ارەناسىندا سالماقتى ورنى بار ەل ەكەنىنە، ەكونوميكانىڭ كوپتەگەن سالالارىندا، اسىرەسە، اۋىل شارۋاشىلىعى سالاسىندا الدىڭعى قاتاردا كەلە جاتقانىنا نازار اۋداردى. نۇرسۇلتان نازاربايەۆ اگرارلىق سەكتورداعى بىرلەسكەن جوبالار جونىندە جاسالعان ۋاعدالاستىقتاردىڭ ءبىزدىڭ ەل ءۇشىن زور ءمانى بار ەكەنىن دە ايتتى. «ءبىز ماشينا جاساۋ، حيميا يندۋسترياسى، ەنەرگەتيكا، ءبىلىم بەرۋ جانە مەديسينا سالالارىندا دا ىنتىماقتاساتىن بولامىز. يندۋستريالىق جانە ينفراقۇرىلىمدىق باعدارلامالاردى جۇزەگە اسىرۋ ىسىنە ۇلىبريتانيانىڭ دا، فرانسيانىڭ دا اتسالىسقانى ءبىز ءۇشىن اسا ماڭىزدى. وسى ساپار جانە ونىڭ بارىسىندا وتكەن كەلىسسوزدەر ەلدەرىمىزدىڭ اراسىنداعى ىنتىماقتاستىقتى بۇرىنعىدان دا جوعارى دەڭگەيگە كوتەردى»، – دەدى مەملەكەت باسشىسى.
سونىمەن، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ كارى قۇرلىقتىڭ باستى مەملەكەتتەرىنە جاساعان جانە ماڭىزدى حالىقارالىق ۇيىمنىڭ باس كونفەرەنسياسىنا قاتىسقان بۇل جولعى ساپارى ۇلكەن تابىسپەن قورىتىندىلاندى. الداعى ۋاقىتتا ۇلىبريتانيا مەن فرانسيادان كەلەتىن جاڭا ينۆەستيسيالار بۇل ساپاردىڭ قۇندىلىعى مەن ماڭىزىن ارتتىرا بەرەدى دەگەن سەنىمدەمىز.
"قامشى"سىلتەيدى
دەرەككوز: ەگەمەن قازاقستان
