وڭتۇستىك ءوڭىر ۋاق مالعا باي. سونىڭ ىشىندە اسىل تۇقىمدى مالدىڭ ۇلەسى از ەمەس. وبلىستا 120 شارۋا قوجالىعى اسىل تۇقىمدى قوي وسىرۋگە ەرەكشە باسىمدىق بەرىپ وتىر.

بۇگىندە وبلىستا  4 111،4 مىڭ قوي مەن ەشكى بار ەكەن. البەتتە، بۇل  شارۋالاردىڭ ەرەن ەڭبەگى مەن مەملەكەت تاراپىنان بەرىلگەن قارجىلاي كومەكتى ءتيىمدى پايدالانۋدىڭ ارقاسى. ءتورت تۇلىكتىڭ ىشىندە قوي شارۋاشىلىعىندا اسىلداندىرۋ جۇمىستارىنا كوبىرەك ءمان بەرىلگەن. بۇعان شارۋالاردىڭ وزدەرى قىزىعۋشىلىق تانىتىپ وتىر. مۇنداعى ماقسات - از شىعىن جۇمساپ، كوپ ءونىم الۋ.

وڭتۇستىكتىڭ ماقتانىشى - «ورداباسى» اتتى اسىل تۇقىمدى قوي ءتۇرى. بۇل - وڭتۇستىك عالىمدارىنىڭ 21 جىلدىق ەڭبەگىنىڭ جەمىسى. ءبىر اتالىق مال باسى 120 كگ دەيىن ەت بەرەدى. بۇگىندە ەل اۋماعىنا تارالعان ەت باعىتىنداعى اتالمىش قوي تۇقىمىنا كورشى مەملەكەتتەر دە قىزىعۋشىلىق تانىتىپ وتىر. ويتكەنى، جاڭا تۇقىمدى قويلار ىستىق پەن سۋىققا ءتوزىمدى، شولگە شىدامدى. ءجۇنى مەن مايى از، ەتى مول. ءتورت ايلىق قوزىنىڭ ورتاشا سالماعى 40 كەلى تارتادى. ءىرى، ساقا ساۋلىقتاردىكى - 70-90، ال قوشقارلارىنىڭ سالماعى شامامەن 95-تەن 120 كەلىگە دەيىن جەتەدى. ەتتىلىگىنە بايلانىستى مۇنداي قوي تۇقىمى ءقازىردىڭ وزىندە اسا ءوتىمدى. قازاقى قويدىڭ تاعى ءبىر ەرەكشەلىگى - بارلىق جەردىڭ تابيعاتىنا تەز بەيىمدەلەدى. ءتوزىمدى، جەر تاڭدامايدى، جىلدام جەتىلىپ، تەز قوڭدانادى. 

بۇگىندە وبلىستا 70 مىڭ باس «ورداباسى» قويى بار. نەگىزىنەن، بۇل قوي تۇقىمىنىڭ باسىن كوبەيتۋدى ورداباسى، قازىعۇرت، سارىاعاش، وتىرار جانە سايرام اۋداندارىنىڭ شوپاندارى مىقتاپ قولعا العان. ماسەلەن، ورداباسى اۋدانىنداعى «سەرالى» شارۋا قوجالىعى بۇل قويدى 20 جىلدان بەرى ءوسىرىپ كەلەدى. «ءقازىر ۇساق مالدىڭ ماي ەمەس، ەت بەرۋ ونىمدىلىگىنە ەرەكشە ءمان بەرىلەدى. بۇرىن كەرىسىنشە ەدى. سول سەبەپتى، بۇل قويلاردىڭ بويىنا ماي ەمەس، ەتتى كوپ جينايتىندىعى كوپشىلىكتى قىزىقتىرادى. بيىلدىڭ وزىندە الماتى، جامبىل، قىزىلوردا وبلىستارىنا 2500 ساۋلىق پەن تۇساق ساتتىق»، - دەيدى شارۋا قوجالىعىنىڭ باسشىسى سەرالى ءابجانوۆ.

بۇگىندە «سەرالى» شارۋاشىلىعىندا 8 مىڭعا جۋىق «ورداباسى» قويى بار. وتكەن جىلى مەملەكەتتەن 5 ملن 200 مىڭ، بيىل 5،5 ملن تەڭگە الىپ، يگىلىكتى ىسكە جۇمساپتى. تاياۋدا اۋدانعا ساپارلاپ كەلگەن وبلىس اكىمى ب. اتامقۇلوۆ وسى شارۋاشىلىققا ارنايى سوعىپ، مال جايىمەن تانىسىپتى.

وڭتۇستىك قازاقستان وبلىستىق اۋىل شارۋاشىلىعى باسقاراماسىنىڭ ءبولىم مەڭگەرۋشىسى ورازتاي ناۋات ۇلىنىڭ ايتۋىنشا، بيىل «ورداباسى» تۇقىمى جەرگىلىكتى مالداردى ۇرىقتاندىرۋعا قولدانىلۋدا. «سەبەبى، مەملەكەت تاراپىنان اسىل تۇقىمدى قوشقارلاردى جالپى شارۋاعا بىردەي ەتىپ، انالىق باستارىن تەگىن قاشىرتۋعا كومەك بەرىلىپ وتىر. بارلىق شىعىنداردى مەملەكەت كوتەرەدى. قازىرگى تاڭدا 80 مىڭداي مالدى ۇرىقتاندىرۋ جۇمىستارى ءجۇرىپ جاتىر» دەيدى مامان.

ءبولىم مەڭگەرۋشىسىنىڭ ايتۋىنشا، اعىمداعى جىلى «التىن اسىق» باعدارلاماسى اياسىندا 40 مىڭعا جۋىق تۇساق ساتىپ الىنعان. مەملەكەتتەن بەرىلەتىن سۋبسيديا دا شارۋالارعا از كومەك ەمەس. ايتالىق، قويدىڭ انالىق باسىنىڭ ساۋلىعىنا 1500 تەڭگەدەن سۋبسيديا بەرىلەدى. مالدى اسىلداندىرۋ ءۇشىن ساتىپ الىناتىن ءبىر باس مالدىڭ سۋبسيدياسى - 8000 تەڭگە.

دەرەككوز: قازاقپارات