«شىمكەنتتىڭ تۋريستىك الەۋەتىن ارتتىرۋ ءۇشىن كاسىپورىندارىمىز باسەكەگە قابىلەتتى بولۋى قاجەت»

«RIXOS Khadisha Shymkent» قوناق ۇيىندە «شىرايلى شىمكەنت 2015» تۋريستىك جارمەڭكەسىنىڭ سالتاناتتى اشىلۋ ءراسىمى ءوتتى. جارمەڭكەنىڭ باستالۋىندا شىمكەنت قالاسىنىڭ اكىمى عابيدوللا ءابدىراحىموۆ ءسوز سويلەپ، تۋريستىك كورمەنىڭ لەنتاسىن قيدى.

بۇل تۋرالى شىمكەنت قالاسى اكىمى اپپاراتىنىڭ باسپا ءسوز قىزمەتىنەن حابارلادى.

«شىمكەنت - جىبەك جولى بويىندا ورنالاسقان ەجەلگى قالا. ەرتەدە مۇندا ءتۇرلى مادەنيەتتەر توعىسقان. بۇگىندە، «باتىس ەۋروپا-باتىس جۇڭگو» كولىك ءدالىزى بىزدەن وتۋدە. ازيا مەن ەۋروپانى جالعاپ جاتقان بۇل قۇرلىقتىق كولىك ءدالىزىنىڭ شىمقالامىز ءۇشىن ەكونوميكالىق پايداسى مول. سوندىقتان، قالامىزدىڭ تۋريستىك الەۋەتىن ارتتىرۋ ءۇشىن ءبىزدىڭ تۋريستىك كاسىپورىندارىمىز باسەكەگە قابىلەتتى بولۋى قاجەت»، - دەپ اتاپ ءوتتى  شىمكەنت قالاسىنىڭ اكىمى عابيدوللا ءابدىراحىموۆ.

تۋريزم – كەز كەلگەن ەلگە ەكونوميكالىق احۋالىنا، تابيعي بايلىقتارىنىڭ كولەمىنە قاراماي تابىس اكەلەتىن سالا. ەكونوميكانى ديۆەرسيفيكاسيالاۋ باعىتىندا دا بۇل سالا ماڭىزعا يە. سونىمەن قاتار، تۋريزم بىرنەشە جاناما سالالاردىڭ دامۋىنا دا جول اشادى. اتاپ ايتقاندا، تاسىمال، ساۋدا-ساتتىق، قىزمەت كورسەتۋ سالالارىنىڭ تىنىسى اشىلا تۇسپەك. سول سەبەپتى دە ءتۋريزمنىڭ ءوڭىر الەۋەتىن ارتتىرۋداعى ءرولى ەرەكشە دەپ زور سەنىممەن ايتۋعا بولادى.

بۇل شاراعا شاھاردىڭ 7 تۋريستىك فيرماسى، 5 ءقوناقۇيى، 36 جەكە قولونەر شەبەرلەرى قاتىستى. وسى كورمە ارقىلى استانادا وتەتىن «EXPO-2017» حالىقارالىق مامانداندىرىلعان كورمەسىنە ءوڭىردىڭ ەڭ ۇزدىك كاسىپورىندارى مەن ونىڭ ساپالى ونىمدەرى تاڭداپ الىنباق. قالانىڭ بەلگىلى كاسىپورىندارى مەن قولونەر شەبەرلەرىنىڭ ونىمدەرىن تانىستىرعان شارانىڭ ماقساتى قالانىڭ ىشكى ءتۋريزمىن دامىتۋ جانە شەتتەن ينۆەستورلار مەن تۋريستەر تارتۋ بولىپ تابىلادى.   

دەرەككوز: قازاقپارات