ورالداعى №37 مەكتەپتىڭ 7 «ا» سىنىپ وقۋشىسى ءدىلناز ءادىلوۆا اناسىمەن بىرگە جوعالىپ كەتتى دەپ حابارلايدى «قامشى» پورتالى «ۋرالسكايا نەدەليا» باسىلىمىنا سىلتەمە جاساپ.
«بۇل وقيعا وقۋشىلاردىڭ كۇزگى دەمالىسىندا بولدى. 7 «ا» سىنىبىندا وقيتىن ءادىلوۆا ءدىلنازدىڭ ءداستۇرلى ەمەس ءدىني باعىتتى ۇستاناتىن اناسى باقىتجامال حاسانعالييەۆامەن بىرگە ءىز-تۇسسىز جوعالىپ كەتۋى ءبىزدى قاتتى قىنجىلتۋدا. 4 قاراشادا كۇزگى دەمالىسقا كەتىپ، 12 قاراشا كۇنى ساباققا كەلمەگەن ءدىلنازدىڭ اناسىمەن سىنىپ جەتەكشىسى حابارلاستى. الايدا، ەكەۋىنىڭ دە تەلەفونى ءسوندىرۋلى بولدى. قىزدىڭ اكەسى جەڭىس حاسانعالييەۆ اتىراۋدا ۆاحتالىق ادىسپەن جۇمىس ىستەيتىن ەدى. 13 قاراشا كۇنى اكەسى مەكتەپكە كەلىپ، قىزى مەن ايەلىنىڭ جوعالىپ كەتكەنىن ايتىپ، ەتەگى جاسقا تولىپ جىلاپ، بىزدەن كومەك سۇرادى. ءبىز بقو ىشكى ىستەر دەپارتامەنتىنە حات جازىپ، وقۋشىمىزدىڭ جوعالىپ كەتكەنىن حابارلاپ، ىزدەۋ سالۋىن سۇرادىق. ولاردىڭ انىقتاۋى بويىنشا، كۇنى بۇگىن ءدىلنازدىڭ اناسىمەن بىرگە قازاقستان اۋماعىنان شىعىپ كەتكەنى بەلگىلى بولىپ وتىر. ءبىراق قاي ەلگە كەتكەنى بىزگە بەلگىسىز. بۇل وقيعا ءبىزدى قاتتى الاڭداتادى”، — دەدى مەكتەپ ديرەكتورى تامارا مۇسا قىزى مەكتەپتە وتكەن «وتباسى، مەكتەپ جانە قوعامنىڭ ۇرپاق تاربيەسىندە يگىلىكتى بولاشاق جولىنداعى ءوزارا ىنتىماقتاستىعى» تاقىرىبىندا وتكەن دوڭگەلەك ۇستەل بارىسىندا.
№37 مەكتەپتە 1200 وقۋشى ءبىلىم الۋدا. سونىڭ 39-ى – ءداستۇرلى ەمەس ءدىني باعىتتى ۇستاناتىن وقۋشىلار (اتا-انالارىنىڭ سانى – 24). ولاردىڭ ىشىندە 14 قىز بالا حيدجاب جامىلادى.
“مەن اتا-انا رەتىندە قاتتى الاڭداۋلىمىن. قوعامدا بولىپ جاتقان نەشە ءتۇرلى سوراقى جاعدايلاردى ەستىپ تە، كورىپ تە وتىرمىز. دىلنازبەن قىزىمىز ءبىر سىنىپتا وقىدى. ءدىني اعىمداعى ول قىزدىڭ مەنىڭ قىزىممەن حابارلاسىپ، وعان كەرى اسەر ەتپەسىنە كىم كەپىل؟ بالالار عالامتور ارقىلى حابارلاسىپ جاتادى. ءدىلنازدا بارلىق سىنىپتاسىنىڭ تەلەفون ءنومىرى بار. ول قىزىما، الدە باسقا سىنىپتاسىنا سكايپ ارقىلى شىعىپ، «مىندا كەرەمەت» دەپ سۋرەتىن جىبەرىپ، كوڭىلدەرىن بۇزىپ، الاڭداتسا قايتەمىز؟ قىزىم ءدىلنازدىڭ جوعالىپ كەتكەنىن جۇرەگىنە اۋىر الدى. «ماما، ءدىلناز جوق، جوعالىپ كەتىپتى» دەپ مەكتەپتەن ۋايىمداپ كەلدى. بۇل وقيعا جالعىز وعان ەمەس، بارلىق سىنىپتاستارىنا قاتتى اسەر ەتىپ وتىر. قىزىمنىڭ تەلەفونىن تەكسەرىپ، كىمدەرمەن سويلەسكەنىن باقىلاپ وتىرامىن. الايدا اتا-انالاردىڭ كوڭىلىندە ۇرەي، قورقىنىش باسىم”، – دەيدى ايىمگۇل قازييەۆا ەسىمدى اتا-انا.
جيىندا ءتارتىبى، وقۋ ۇلگەرىمى جاقسى وقۋشىسىن جوعالتىپ وتىرعان ۇستازدار قاۋىمىمەن قوسا اتا-انالار دا بۇل وقيعاعا قاتتى الاڭدايتىندىقتارىن ءبىلدىردى.
كەيىن قۇقىق قورعاۋ ورگاندارى باقىتجامال حاسانعالييەۆا قىزىمەن بىرگە ماسكەۋ ارقىلى سيرياعا ءوتىپ كەتكەنىن انىقتادى دەپ جازادى «ۋرالسكايا نەدەليا».
