2016 جىلدان باستاپ قازاقستاندا قوعامعا شىن پايداسىن تيگىزگەن ۇكىمەتتىك ەمەس ۇيىمدار سىياقى الادى. بۇل تۋرالى بۇگىن ورتالىق كوممۋنيكاسيالار قىزمەتىندە  مادەنيەت جانە سپورت ۆيسە-مينيسترى مارات ءازىمحانوۆ ءمالىم ەتتى.

«ۇكىمەتتىك ەمەس ۇيىمداردىڭ قىزمەتى تۋرالى» جاڭا زاڭ ارقىلى  ۇكىمەتتىك ەمەس ۇيىمدار ءۇشىن سىياقىلار بەرۋ ماسەلەسى قاراستىرىلىپ وتىر. 2016 جىلدان باستاپ جىل سايىن ەڭ ۇزدىك، قوعامعا پايدالى قىزمەت اتقارعان ۇكىمەتتىك ەمەس ۇيىمدارعا وسىنداي سىياقىلار قاراستىرىلاتىن بولادى»، - دەپ حابارلادى م.ءازىمحانوۆ.

ۆيسە-مينيستردىڭ ايتۋىنشا، جاڭا زاڭ تاعى ءبىر جاڭالىق ەنگىزىپ وتىر. ەندى قازاقستاندا ۇكىمەتتىك ەمەس ۇيىمداردىڭ دەرەكقور بازاسى قۇرىلادى.

«جانە تاعى ءبىر باعىت - ۇكىمەتتىك ەمەس ۇيىمداردىڭ دەرەكقور بازاسىن قۇرۋ جونىندەگى جۇمىستار.  ول بازا وكىلەتتى ورگاننىڭ جانىنان قۇرىلاتىن بولادى جانە بارلىق ۇكىمەتتىك ەمەس ۇيىمداردىڭ اتقارعان جۇمىستارى، اتقارىلاتىن جۇمىستارى جانە جوبالارى جونىندە اقپارات وسى دەرەكقورعا ەنگىزىلەدى. نەگىزگى ماقسات - قوعام ءۇشىن، ازاماتتار ءۇشىن، ۇكىمەتتىك ەمەس ۇيىمداردىڭ اشىقتىعىن قامتاماسىز ەتۋ. بۇل دا الەمدىك تاجىريبە»، - دەدى ول.

ءقازىر وسى زاڭعا تاۋەلدى گرانتتاردى ءبولۋ، سىياقىلار ءبولۋ، وپەراتوردىڭ جۇمىسى تۋرالى زاڭنامالىق اكتىلەر دايىندالۋدا. «البەتتە بۇل قۇجاتتار ۇكىمەتتىك ەمەس ۇيىمدارمەن بىرگە تالقىلانىپ، دايىندالىپ جاتىر»،-دەدى ۆيسە-مينيستر.