يراك پەن سيريا اۋماعىندا ارەكەت ەتىپ جاتقان «دايش» لاڭكەستىك ۇيىمى سودىرلاردىڭ سانى وتكەن جىلدان ەكى ەسەگە ارتتى. اراب مەملەكەتتەرىنىڭ بارلاۋ قىزمەتتەرىنىڭ باعالاۋىنشا، اتالعان ەكى ەلدە 27 مىڭنان استام سودىر سوعىسىپ جاتىر، - دەپ حابارلايدى «قامشى» پورتالى قازاقپاراتقا سىلتەمە جاساپ.

اقش-تىڭ «سۋفان گرۋپپ» ساراپتامالىق ورتالىعى ءوزىنىڭ دەرەك كوزدەرىنە سىلتەمە جاساپ، ءتۇرلى ەلدەردىڭ يراك پەن سيرياعا شەتەلدىك سودىرلارىنىڭ بارۋىنا كەدەرگى كەلتىرۋ جانە لاڭكەستىك ۇيىمدارعا دەگەن قىزىعۋشىلىقتى ازايتۋ جولىنداعى شارالارى ازىرگە ناتيجە بەرمەي وتىرعانىن حابارلادى.

ولاردىڭ دەرەكتەرىنە قاراعاندا، 86 ەلدىڭ شامامەن 27000-31000 شەتەلدىك سودىرى يراك پەن سيريادا. 2014 جىلدىڭ ماۋسىمىندا بۇل سان 12 مىڭ سودىردى قۇرادى، دەپ ەسەپتەيدى  «سۋفان گرۋپپ».

«يسلام مەملەكەتىنىڭ» قاتارىنا تاياۋ شىعىس پەن ماگريبتەن جىلىنا شامامەن  8000 ادام قوسىلادى ەكەن. شامامەن 5000 ەۋروپادان جانە 4700 ادام بۇرىنعى كەڭەس وداعى رەسپۋبليكالارىنان بارادى.

«سۋفان گرۋپپ» اتاپ وتكەندەي، شەتەلدىك سودىرلاردىڭ 20-30 پايىزى ءوز ەلدەرىنە ورالىپ، ۇلتتىق ارنايى قىزمەتتىڭ جۇمىسىن قيىنداتا ءتۇستى.