بۇگىن ءماجىلىستىڭ جالپى وتىرىسىندا دەپۋتات تۇرسىنبەك ءومىرزاقوۆ جۇرگىزۋشىلەر ءۇشىن باعدارشامنىڭ «قىزىل» بەلگىسىندە وڭعا بۇرىلۋعا رۇقسات بەرۋ ەرەجەسىنىڭ قاجەتتىلىگى تۋرالى ماسەلە كوتەردى، - دەپ حابارلايدى «قامشى» پورتالى قازاقپاراتقا سىلتەمە جاساپ.
ەسكە سالايىق، جالپى وتىرىستا پالاتا دەپۋتاتتارى «جول ءجۇرىسى تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدانعان بولاتىن.
«ۇلى داعدارىس جىلدارىندا اقش كولىك جۇرگىزۋشىلەرىنە باعدارشامدا تۋرا جۇرۋگە تىيىم سالاتىن «قىزىل» جانىپ تۇرعان ساتتە وڭعا قاراي بۇرىلۋعا بولاتىن ەرەجەنى بەكىتىپ بەردى. بۇل ادامدار ءتيىمدى بولعان ەدى، ويتكەنى بەنزيندى دە ۇنەمدەۋگە، ۋاقىتىن دا ۇنەمدەۋگە سەپتىگىن تيگىزدى. ەكىنشى جاعىنا، بۇل ەرەجە قازىرگى تاڭدا كەپتەلىستەر كوپ ورىن الاتىندىقتان، ءبىزدىڭ كولىكتەرىمىزدىڭ وتكىزۋ قابىلەتىن 5 جانە ودان دا جوعارى پايىزعا ارتتىراتىنى ءسوزسىز. جول ءجۇرۋ ەرەجەسىنىڭ بۇل جاڭا نورماسىن ەنگىزۋگە ءسىز قالاي قارايسىز؟»، - دەپ سۇرادى دەپۋتات تۇرسىنبەك ءومىرزاقوۆ ىشكى ىستەر مينيسترىنەن زاڭ جوباسىن تالقىلاۋ بارىسىندا.
ءوز كەزەگىندە قالمۇحانبەت قاسىموۆ بۇل ماسەلە بىلتىر دا زاڭ جوباسىن تالقىلاۋ بارىسىندا كوتەرىلگەنىن ەسكە سالدى. «ءبىز بۇل تاجىريبەنىڭ قولدانىلۋىن، تيىمدىلىگىن زەرتتەۋ ۇستىندەمىز. ياعني، باعدارشامنىڭ «قىزىل» شامىندا وڭعا بۇرىلىسقا رۇقسات بەرۋ جۇيەسىن ءالى قاراستىرامىز. ونى اسىقپاي تالدايمىز، نەگىزدەيمىز، سوسىن الدارىڭىزعا كەلۋىمىز دە مۇمكىن»، - دەدى مينيستر ق. قاسىموۆ.
