ق ر باس كولىك پروكۋراتۋراسىنىڭ ارنايى پروكۋرورىنىڭ باسشىلىعىنداعى تەرگەۋ توبى 2013 جىلدىڭ قاڭتار ايىندا الماتى وبلىسىندا 16 جولاۋشى مەن 5 ەكيپاج مۇشەسىنىڭ قازا تابۋىنا سەبەپ بولعان «سكات» اۋە كومپانياسى» اق-نىڭ «CRJ-200» ماركالى ۇشاعىنىڭ اپاتقا ۇشىراۋ فاكتىسى بويىنشا سوتقا دەيىنگى تەرگەپ-تەكسەرۋ امالدارىن اياقتادى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.
«قازاقستان رەسپۋبليكاسى ينۆەستيسيالار جانە دامۋ مينيسترلىگىنىڭ كوميسسياسىمەن بىرلەسىپ جانە اۋە اپاتىن زەرتتەۋگە تارتىلعان شەتەلدىك جانە وتاندىق اۋە ماماندارىمەن اپاتتىڭ ورىن الۋ بولجامىنىڭ بارلىق مۇمكىندىگى تەكسەرىلدى. اپاتقا كۇردەلى مەتەرولوگيالىق جاعدايدا ۇشۋ ەكيپاجىنىڭ ەكىنشى اينالىم كەزىندە جەر بەتىنىڭ دۇرىس كورىنبەۋىنە وراي ءتيىستى ارەكەت جاساماۋى، ۇشاقتىڭ جوعارى الۋى ءۇشىن شتۋرۆالدى «وزىنە قاراي» قالىپقا اكەلمەۋى سەبەپ بولعان»، - دەلىنگەن حابارلامادا.
ۆەدومستۆو اقپاراتىنا قاراعاندا، ۇشۋدىڭ سوڭعى مينۋتتارىندا، جەر ۇستىنە جاقىنداعاندىقتى بىلدىرەتىن بورت كومپيۋتەرىنىڭ ەسكەرتۋ دابىلى قوسىلعان ۋاقىتتا، جۇمىس قابىلەتتىلىگىن ءىشىنارا جوعالتقان اۋە كەمەسىنىڭ كومانديرى ۇشاقتى باسقارماعان، ال ەكىنشى ۇشقىش قۇرىلعىلاردىڭ پارامەترلەرىنە باقىلاۋ جاساۋدىڭ ورنىنا، ديسپەچەرمەن راديوبايلانىس ورناتۋمەن الەك بولعان.
كوميسسيا ەكيپاج ارالارىندا ىشكىكابينالىق كوممۋنيكاتيۆتىك ءوزارا بايلانىستىڭ جەتكىلىكسىزدىگىن، ولاردىڭ بورتكومپيۋتەرىنىڭ ەسكەرتۋىنە ارەكەت ەتپەگەندىكتەرىن، سونداي-اق ۇشۋ قۇرامىنىڭ مەديسينالىق تەكسەرۋدەن ءوتۋ تالاپتارىن ورىنداماعانىن اتاپ وتكەن. ايتا كەتەرلىگى، اۋە كەمەسىنىڭ كومانديرى تەكسەرۋسىز جانە وتادان كەيىنگى وڭالتۋ كەزەڭسىز ۇشاقتى باسقارعان.
قوزعالىس قاۋىپسىزدىگى مەن اۋە كولىگىن پايدالانۋ ەرەجەسىنىڭ بۇزىلۋىنا جول بەرگەندەرى ءۇشىن ۇشۋ ەكيپاجىنىڭ مۇشەلەرىنە قاتىستى قىلمىستىق ءىس ولاردىڭ مەرت بولۋلارىنا بايلانىستى قىسقارتىلدى. سونىمەن قاتار، ۇشقىشتاردىڭ جىبەرگەن كەمشىلىكتەرى مەن اۆياكومپانيانىڭ ۇشۋ جۇمىسىن جەتكىلىكسىز ۇيىمداستىرۋىندا دا تىكەلەي سەبەپ، بايلانىس بار.
ۇشۋ ەكيپاجى قازاقستان قولداماعان شەتەلدىك وقۋ ورتالىعىندا ءبىلىم العان؛ ۇشقىشتار الدىن الا دايىندىق جانە بىلىكتىلىك ارتتىرۋ كۋرستارىنان وتپەگەن، اۆياكومپانيا ۇنەمى، سونىن ىشىندە وقيعا بولاتىن كۇنى ۇشقىشتاردىڭ ەڭبەك جانە دەمالۋ رەجىمدەرىن ساقتاماعان.
اتالعان جۇمىس سالاسىنا اۆياكومپانيانىڭ ۇشۋ قىزمەتىنىڭ ديرەكتورى جاۋاپتى. قازاقستان رەسپۋبليكاسى قىلمىستى كودەكسىنىڭ 344 بابىنىڭ 3 بولىگىمەن كۇدىكتى رەتىندە تانىلعان اۆيكومپانيانىڭ ۇشۋ قىزمەتى ديرەكتورىنا قاتىستى قىلمىستىق ءىس 2015 جىلعى 10 جەلتوقساندا الماتى قالاسى المالى اۋداندىق سوتىنا جولداندى.
