ەستەرىڭىزدە بولسا، پۋتين "قازاقتا مەملەكەت بولماعان" دەگەن كەزدە، تاريحىمىزدىڭ ۇزاقتا ەكەنىن ەسكە الىپ، قازاق حاندىعىنىڭ 550 جىلدىعىن جاريالادىق. تايشىبەكوۆ پەن ءماسىموۆ تە كوپ قازاقتىڭ نامىسىن وياتىپ ءجۇر. ءبىز، 24 جىل بويى ەڭ ءبىر قاسيەتىمىز تاۋەلسىزدىگىمىزدىڭ قادىرىنە جەتپەي ءجۇر ەدىك. ەلباسى باستاپ، اكىمدەر قوشتاپ جەلتوقساننىڭ بىرىنەن باستاپ، شىرشا جاعىپ، جاڭا جىلعا دايىندالاتىنى ءبىر باسقا، ءار قازاقتىڭ تاۋەلسىزدىكتىڭ قادىرىنە جەتىپ جاتقانى شامالى. ادەتتە، كەپتەلىسپەن جۇرەرگە جول قالمايتىن الماتى كوشەلەرى تاۋەلسىزدىك كۇنىمىزدە بوس قالدى. تاۋەلسىزدىك الاڭىنا دا 40-50 دەن ارتىق ادام جينالمادى. بۇل كۇنى الاڭعا ادام، كوشەگە ماشينا سيماي قالۋى كەرەك ەدى.

ءبىزدىڭ قازاقتار ازاتتىق العان كۇنى دەمالىس دەپ، تۇسكە دەيىن ۇيىقتاپ جاتقاندا، كوشەگە شىعىپ تاۋەلسىزدىك كۇنىمىزدى ەسىمىزگە سالىپ بەرگەن، رەسەيلىكتەرگە رەنجىگەننەن گورى العىس ايتقىم كەلەدى. ىشتەگى بولسىن، سىرتتاعى قازاق بولسىن تاۋەلسىزدىگىنىڭ قادىرىنە جەتۋدى ويلاي باستار دەگەن ۇمىتتەمىن! ءبىز بۇل كۇنىمىزدى قادىرلەي الماعانمەن، كورە المايتىنداردىڭ بار ەكەنىن ءبىلىپ جۇرەتىن بولادى. بۇل ولاردىڭ بىزگە تيگىزگەن پايداسى. ءبىر جاۋابىمىز تاۋەلسىزدىكتىڭ قادىرىنە جەتۋ بولسا، بەرىلۋگە ءتيىس باسقا رەسمي جاۋاپتارىمىزدى سىزدەر دە ايتا وتىرىڭىزدار!

تۇردىبەك قۇرمەتحاننىڭ «فەيسبۋك» پاراقشاسىنان