ۋكراينالىق Forex Club اقپاراتتىق-ساراپتامالىق ورتالىعى قۇنسىزدانعان ۆاليۋتالاردىڭ رەيتينگىندە ءتول تەڭگەمىز ءبىرىنشى ورىنعا شىققانىن جاريالادى. ناقتىراق ايتساق، ساراپشىلاردىڭ ەسەبى بويىنشا، تەڭگە 85،2 پايىزعا دەيىن ديەۆالۆاسياعا ۇشىراعان. ءبىر الاڭداتارلىعى، ءتول تەڭگەمىز سوعىس جاعدايىنداعى مەملەكەتتەردىڭ ۆاليۋتاسىمەن سالىستىرعاندا الدەقايدا قاتتى قۇلدىراعان.

بەلگىلى ەكونوميست تيمۋر يسايەۆ forbes.kz سايتىنا جازعان ماقالاسىندا ءتول تەڭگەگە بايلانىستى تۇيتكىلدەردى ورتاعا سالىپتى. ونىڭ ايتۋىنشا، ۇلتتىق ۆاليۋتانىڭ قۇنسىزدانۋى – ەكونوميكالىق جانە مۇناي باعاسىنا بايلانىستى ەمەس. ويتكەنى، ول مۇناي ءوندىرۋشى جانە سوعىس جاعدايىنداعى مەملەكەتتەردىڭ ۆاليۋتاسىمەن سالىستىرعاندا تەڭگە بىرنەشە ەسە قۇلدىراعانىن العا تارتىپ وتىر.

– ۇلتتىق بانك باسشىلارىنىڭ ايتۋىنشا، تەڭگەنىڭ قۇنسىزدانۋى مۇناي باعاسىنىڭ تومەندەۋىنە بايلانىستى. ناقتىراق ايتساق، ولار جەلتوقسان ايىنىڭ باسىنان باستاپ مۇناي باعاسىنىڭ ءبىر باررەلى $44،4-تەن $37،8-گە دەيىن، ياعني 15 پايىزعا ارزانداعانىن العا تارتىپ وتىر. الايدا، 2014 جىلدىڭ قاڭتار ايىنان بەرى ۇلتتىق ۆاليۋتامىز 125%-عا دەيىن قۇلدىراعان. ال ەندى مۇناي وندىرەتىن باسقا مەملەكەتتەردىڭ ۆاليۋتا ديناميكاسىنا نازار اۋدارايىق. قازىرگى تاڭدا برازيليانىڭ رەالى 65%، نورۆەگتىك كرون – 43%، انگولدىق كۆانزا – 40%، ءازىربايجاندىق مانات – 33%، مەكسيكالىق پەسو مەن مالازيالىق رينگيت – 31%، كانادالىق دوللار – 30%، نيگەريالىق نايرا – 24%، يراندىق ريال – 20%، ليۆيالىق دينار – 13%، كۋۆەيتتىك دينار – 7% ارزانداعان. الايدا ومان، ءباا، ساۋد ارابياسى، باحرەين، كاتار مەملەكەتتەرىنىڭ ۇلتتىق ۆاليۋتاسى وزگەرمەگەن. ال يراكتىڭ دينارى كەرىسىنشە 5% كۇشەيگەن. وسىلايشا مۇناي ءوندىرۋشى مەملەكەتتەردىڭ بىردە-بىرەۋىندە ءدال تەڭگە قۇنسىزدانعانداي قۇلدىراۋ بولماعان. ءبىزدىڭ ۇلتتىق ۆاليۋتانى تەك رەسەيدىڭ رۋبلىمەن سالىستىرۋعا بولادى. الايدا رەسەيلىك ءرۋبلدىڭ ءوزى 113% قۇنسىزدانىپ وتىر، – دەيدى تيمۋر يسايەۆ.

سونداي-اق، ول تەڭگەنىڭ قۇنسىزدانۋى ساياسي جاعدايى تۇراقسىز مەملەكەتتەرمەن سالىستىرعاندا الدەقايدا قۇنسىزدانعانىن العا تارتىپ وتىر. ماسەلەن، سيريالىق فۋنت 67%، ۋكراينالىق گريۆنا 48،7%، اۋعانستاننىڭ افگانيى 20% قۇلدىراعان. وزدەرىڭىزگە بەلگىلى اتالعان مەملەكەتتەر قازىرگى تاڭدا جارتىلاي سوعىس جاعدايىندا. ماسەلەن، سيريانىڭ ويرانىن يسلام اتىن جامىلعان تەرروريستەر شىعارسا، ال رەسەيلىك سەپاراتيستەر ۋكراينانىڭ تۋ سىرتىنان پىشاق ۇرۋدا. بۇدان بولەك، اۋعانستان ەجەلدەن ساياسي جاعدايى تۇراقسىز مەملەكەت. الايدا، سوعان قاراماستان ولاردىڭ ۇلتتىق ۆاليۋتالارى ءبىزدىڭ ءتول تەڭگەمەن سالىستىرعاندا الدەقايدا قۇندى بولىپ وتىر.

بۇل نەنى اڭعارتادى؟ تيمۋر يسايەۆتىڭ ايتۋىنشا، ءتول تەڭگەنىڭ قۇنسىزدانۋىنا ۇلتتىق ۆاليۋتاعا دەگەن سەنىمنىڭ جوقتىعى اسەر ەتىپ وتىر. ناقتىراق ايتساق، قولىنىڭ كىرى بار ازاماتتار ءوز اقشالارىن اقش دوللارىندا ساقتاعاندى ءجون كورەدى. وسىنىڭ سالدارىنان ءتول تەڭگە كۇننەن-كۇنگە قۇنسىزدانىپ بارادى. ال، حالىقتىڭ ۇلتتىق ۆاليۋتاعا دەگەن سەنىمىنىڭ جوعالۋىنا ۇكىمەت پەن ۇلتتىق بانكتىڭ سولاقاي ساياساتى اسەر ەتتى. ايتسە دە، اقشامىز قانشا جەردەن قۇنسىزدانسا دا، ءبىز ءتول تەڭگەدەن باس تارتپايمىز. ويتكەنى قازىرگى جاعدايدا ءتول تەڭەگەگە تونگەن ءقاۋىپ تاۋەلسىزدىككە قاتەر توندىرەدى. سوندىقتان دا قارجىلىق قيىنشىلىقتارعا قاراماستان قاراشا حالىق شىدامدىلىق تانىتۋى مۇمكىن. الايدا، حالىق شىدايدى ەكەن دەپ ۇكىمەت پەن ۇلتتىق بانك ويىنا نە كەلسە سونى جاساي بەرمەۋى كەرەك قوي.

سەرىك جولداسباي

استانا