كەشە الماتىدا قازاقستان جازۋشىلار وداعى مەن «ەر جانىبەك» حالىقارالىق قوعامدىق قورى كورنەكتى جازۋشى جاقسىلىق ءساميت ۇلىنىڭ 75 جىلدىعىنا وراي «قازىرگى قازاق پروزاسىنىڭ وزەكتى ماسەلەلەرى» اتتى عىلىمي-تاجىريبەلىك كونفەرەنسيا ءوتتى، - دەپ حابارلايدى «قامشى» پورتالى.

كونفەرەنسياعا تانىمال ادەبيەتشى عالىمدار مەن اقىن-جازۋشىلار قاتىستى.

كونفەرەنسيا بارىسىندا جازۋشىنىڭ ءىنىسى عىلىمحان قالي ۇلىنىڭ قولداۋىمەن جارىق كورگەن «سارى الا قاز» كىتابىنىڭ تۇساۋى كەسىلدى.

«كونفەرەنسياعا قاتىسۋشىلار اعامىز تۋرالى، جازۋشىنىڭ شىعارماشىلىعى جايلى كەرەمەت ەستەلىكتەرىمەن ءبولىسىپ، قۇندى دەرەكتەردى، زەرتتەۋلەردى ورتاعا سالدى. وسى جيىننىڭ وتۋىنە اتسالىسقان بارلىقتارىڭىزعا العىس بىلدىرەمىن» دەيدى «ەر جانىبەك» قوعامدىق قورىنىڭ پرەزيدەنتى جەڭىس تۇركيا مىرزا. 

جاقسىلىق ءساميت ۇلى 1940 جىلى قىتايدىڭ التاي ايماعىندا دۇنيەگە كەلگەن. 1959-1979 جىلدارى قىتايداعى «مادەنيەت توڭكەرىسى» كەزىندە ۇلتشىل اتانىپ، ءۇرىمجى، تارىم، ت.ب. لاگەرلەردە جازاسىن وتەگەن.

1993 جىلى الماتىعا كوشىپ كەلگەن.

«اتامەكەن»، «تاۋ سامالى»، «اق تىلەك»، «اق ساۋلە»، ت.ب. اڭگىمە، پوۆەستەر جيناعىنىڭ اۆتورى. 2000 جىلى جازۋشىنىڭ «قىتايداعى قازاقتار» مونوگرافياسى، 2010 جىلى «سەرگەلدەڭ» تريلوگياسى «قاھارلى التاي» دەگەن اتپەن باسىلىپ شىققان.