عىلىمدى قارجىلاندىرۋ جىلدان-جىلعا ۇلعايىپ كەلە جاتقانىنا قاراماستان وتاندىق عىلىم ازىرگە ەل ەكونوميكاسىنىڭ مۇددەسى ءۇشىن جۇمىس ىستەمەي تۇر. عىلىم مەن ءوندىرىستىڭ اراسى الشاقتاپ كەتتى. بۇل پىكىردى «نۇر وتان» پارتياسىنىڭ باسپا ءسوز ورتالىعىندا وتكەن بريفينگتە پارلامەنت ءماجىلىسىنىڭ دەپۋتاتى ءۋاليحان بيشىمبايەۆ ايتتى، - دەپ حابارلايدى «قامشى» پورتالى Baq.kz-كە سىلتەمە جاساپ.

 ءقازىر ەلىمىزدە 392 عىلىم ۇيىم تۇراقتى جۇمىس ىستەپ تۇر. الايدا، جاسالىپ جاتقان زەرتتەۋلەردىڭ ناتيجەلەرىنە، عىلىمي جاڭالىقتارعا، جاڭا تەحنولوگيالارعا بيزنەس تاراپىنان ءالى سۇرانىس جوق. كوپتەگەن عىلىمي زەرتتەۋلەر زەرتحانالاردان اسپاي جاتىر. عالىمدارىمىز ويلاپ تاپقان جاڭا تەحنولوگيالاردىڭ كوبى تاجىريبەدەن وتكىزىلمەستەن، كەزەكتى عىلىمي جاڭالىق رەتىندە تىركەلەدى دە، قاعاز جۇزىندە قالىپ قويادى. بۇل جاعداي يننوۆاسيالاردى كوممەرسيالاندىرۋعا دا مۇمكىندىك بەرمەي وتىر. ەندى مۇنداي ولقىلىقتى جويۋ ءۇشىن ارنايى زاڭ جۇمىس ىستەمەك.

«عىلىمي جانە (نەمەسە) عىلىمي-تەحنيكالىق قىزمەت ناتيجەلەرىن كوممەرسيالاندىرۋ تۋرالى» قازاقستان رەسپۋبليكاسىنىڭ زاڭىن تانىستىرعان دەپۋتات بۇدان بىلاي عىلىمعا بولىنەتىن قارجى بوسقا كەتپەيتىندىگىنە سەنىمدى. ويتكەنى، عىلىمدى كوممەرسيالاندىرۋ زاڭ ارقىلى رەتتەلىپ، بولىنگەن قارجىنىڭ سۇراۋى دا بولادى. سونىڭ ناتيجەسىندە عىلىم مەن ءوندىرىستىڭ بايلانىسى كۇشەيۋى ءتيىس. دەپۋتاتتاردىڭ جاڭا زاڭنان كۇتىپ وتىرعان ءۇمىتى دە وسى.