«بۇگىن پارلامەنت ءماجىلىسى تارقاتىلىپ، ناۋرىز ايىندا سايلاۋ ءوتۋى مۇمكىن» دەگەن الىپ قاشپا اڭگىمە شىقتى. الايدا، بۇل بولجامنىڭ قانشالىقتى راس-وتىرىگىن ءدوپ باسىپ ايتۋ قيىن. دەسەك تە، جۋىق ارادا پارلامەنت ءوز جۇمىسىن اياقتاپ، ەلىمىزدە جاڭادان سايلاۋ ءوتۋى ابدەن مۇمكىن. ال، سول سايلاۋ وتە قالعان جاعدايدا ودان قاراشا حالىققا قانداي قايىر بار؟

كەزىندە الاش ارىستارى «قازاق» گازەتىندە «دۋمادا قازاقتان دەپۋتات جوق» دەپ ماسەلە كوتەۋمەن ءوتتى. ويتكەنى، پاتشالى رەسەي قازاقتى بۇراتانا دەپ تانىپ، ونىڭ دەپۋتات بولۋ قۇقىعىنان ايىردى. الاش ارىستارى «ەگەر قازاقتان دۋمادا دەپۋتات بولسا، ءبىزدىڭ مۇڭ-مۇقتاجىمىزدى پارلامەنتتە كوتەرەدى» دەپ ەسەپتەدى. الايدا، ءى جانە ءىى دۋمادان كەيىن قازاققا سول كۇيى دەپۋتاتتىق بۇيىرمادى. وكىنىشتى.

ال، قازىرگى تاڭدا اللاعا شۇكىر تاۋەلسىزدىك الىپ، ءوز الدىمىزعا جەكە مەملەكەت بولدىق. مىنە، وسى تاۋەلسىزدىكتىڭ ارقاسىندا ماجىلىستەگى 107 دەپۋتاتتىڭ باسىم كوپشىلىگى قازاقتار قۇراپ وتىر. الايدا، ولاردىڭ ۇلتتىق مۇددەنى تۋ ەتىپ، ماسەلە شەشىپ جاتقاندارى ساۋساقپەن سانارلىقتاي عانا. ال، قالعان دەپۋتتاتتار «اس ءىشىپ، اياق بوساتقاننان» باسقا حالىققا پايدا كەلتىرىپ جاتقان جوق. سوندىقتان دا الداعى سايلاۋدا تاعى دا سول دەپۋتاتتار پارلمەنتتەن ورىن السا، ودان قاراشا حالىق قانداي پايدا كورەدى؟ ەشقانداي. ەندەشە الداعى پارلامەنت سايلاۋىنان ءۇمىت كۇتۋدىڭ ءوزى ۇيات نارسە.

ايتسە دە، بيلىك ەندىگى كەزەكتە ماجىلىسكە دەگەن حالىقتىڭ سەنىمىن كۇشەيتەمىز دەپ ويلاسا ۇلتشىلدارعا مۇمكىندىك بەرگەنى ءجون. ايتالىق جاڭارعان پارلامەنتكە ايدوس سارىم، مۇحتار تايجان، مۇرات ابەنوۆ، ماۋلەن اشىمبايەۆ، بەرىك ءۋالي، راسۋل جۇمالى سىندى ۇلتتىق-دەموكراتيالىق ۇستانىمداعى ازاماتتار وتسە، پارلامەنت تورىندە ۇلتتىڭ ءسوزى سويلەنسە ءماجىلىستىڭ ءمانى ارتار ەدى. ويتكەنى، ماجىلىستە تالقىلانۋى ءتيىس كوپتەگەن ماسەلەلەر قوعامدىق ورتادان ارىعا اسار ەمەس. ال، قوعامنىڭ اشۋ-ىزاسى كۇننەن كۇنگە ءوسىپ كەلە جاتىر. مىنە، وسى اشۋ-ىزانىڭ اسقىنىپ كەتپەۋى ءۇشىن پارلامەنتتە ۇلتشىلدارعا ورىن بەرىلۋى كەرەك. الايدا بيلىك ۇلتشىلدارعا سەنىم ارتا قويارما ەكەن؟ بۇل جاعى بەلگىسىز.

ءبىزدىڭ ءماجىلىس دەپۋتاتتارى قاناتىن كەسىپ تاستاعان بۇركىت سياقتى قاۋقارسىز. قانداي دا ءبىر وتكىر ماسەلەگە بايلانىستى ولاردان پىكىر سۇراساڭ كىبىرتىكتەپ جاۋاپ بەرە الماي جاتادى. ويتكەنى ولار جوعارى جاقتان «دەپۋتتات بولعاننان كەيىن وتكىر ماسەلە كوتەرمەيسىڭ» دەپ تاپسىرما العان. مىنە، سول تاپسىرمانى «حالىق قالاۋلىلارى» بۇلجىتپاي ورىنداپ وتىر. ال ۇلتشىلدارعا مۇمكىندىك بەرىلسە، ولار قانشا تاپسىرما السادا ۇلت ماسەلەسىن كوتەرۋدەن تايسالماس ەدى. ۇزىن ءسوزدىڭ قىسقاسى ۇلتشىلدارعا دەپۋتاتتىق ماندات بەرىلمەسە پارلامەنتتەن ەشقانداي پايدا جوق.

سەرىك جولداسباي

استانا