«جولاۋشىلار تاسىمالى» اق مەنەدجەرلەرى جولاۋشىلار پويىزدارىندا جولسەرىك رەتىندە قىزمەت اتقاراتىن بولادى، - دەپ حابارلايدى «قامشى» پورتالى كومپانيانىڭ باسپا ءسوز قىزمەتىنە سىلتەمە جاساپ.
كومپانيا باسشىلارى جولاۋشى كولىكتەرىندە كورسەتىلەتىن قىزمەت ساپاسىن ارتتىرۋ ماقساتىندا وسىنداي باستاما كوتەرىپ وتىر. قاڭتار ايىندا كومپانيانىڭ باسقارما باسشىسى نۇرداۋلەت قيلىبايەۆ باستاعان مەنەدجەرلەرى پويىزداردا جولسەرىك رولىندە قىزمەت كورسەتپەك.
«جولاۋشىلار تاسىمالداناتىن 17 باعىت بويىنشا كومپانيانىڭ 30 مەنەدجەرى جولسەرىك رەتىندە قىزمەت كورسەتەدى. ولار ءار رەيس الدىندا تالاپقا ساي نۇسقاۋلىق وتەدى، ۆاگونداردىڭ سۋمەن، وتىنمەن، توسەك ورىنمەن قامتاماسىز ەتىلۋىن، تەحنيكالىق جاعدايىن باقىلايدى» دەلىنگەن كومپانيا تاراتقان حابارلامادا.
