بۇگىن ەلدىڭ قورعانىس ءمينيسترىنىڭ بۇيرىعىمەن «وڭتۇستىك» جانە «باتىس» وڭىرلىك قولباسشىلىقتارىنىڭ ارنايى ماقساتتاعى جاساقتارى جاۋىنگەرلىك ازىرلىكتىڭ جوعارى دەڭگەيىنە كەلتىرىلدى، - دەپ حابارلايدى «قامشى» پورتالى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
«تەكسەرۋدىڭ نەگىزگى ماقساتى ارنايى ماقساتتاعى جاساقتاردىڭ قويىلعان جاۋىنگەرلىك تاپسىرمالاردى بەلگىلەنگەن ۋاقىت ىشىندە ورىنداپ شىعۋداعى جيناقى ارەكەتتەرىن باعالاۋ»، - دەلىنگەن باسپا ءسوز قىزمەتى تاراتقان حابارلامادا.
دابىل بەلگىسى بەرىلگەن سوڭ اسكەري قىزمەتشىلەر جاۋىنگەرلىك ەسەپكە ساي ارەكەتكە كىرىسكەن. اسكەري-كولىكتىك اۆياسيانىڭ جانە اۆتوموبيل تەحنيكاسىنىڭ قاتىسۋىمەن ارنايى جاساق بولىنىستەرىن جاۋىنگەرلىك تاپسىرما ورىندايتىن ايماققا جەتكىزۋ جۇرگىزىلدى.
«وسىنداي كەزەكتەن تىس شۇعىل تەكسەرۋلەر قارۋلى كۇشتەردىڭ ناقتى جاۋىنگەرلىك ازىرلىگىن، سونداي-اق، اسكەرلەردەگى شىنايى جاعدايدى باعالاۋعا مۇمكىندىك بەرەدى»، - دەلىنگەن حابارلامادا.
