اقتوبە وبلىسىنىڭ اكىمى بەردىبەك ساپاربايەۆ وبلىستاعى 800-گە جۋىق تۇرعانى بار قايىڭدى اۋىلىنا 10 جىلدان بەرى جارىق تارتپاعان مۇعالجار اۋدانىنىڭ اكىمى مەن ورىنباسارىنىڭ ۇيىنە باراتىن ەلەكتر توعىن قيۋدى تاپسىردى، - دەپ حابارلايدى «قامشى» پورتالى NUR.KZ-كە سىلتەمە جاساپ.
ەندى اۋدان اكىمى سەرىك شاڭعۇتوۆ قايىڭدىنىڭ قيىندىعىن شەشكەندە عانا ۇيىندە جارىق جاعا الادى. مۇعالجار اۋدانىنىڭ اكىمى سەرىك شاڭعۇتوۆ بۇيرىقتى ماقۇلداعاننان باسقا تۇك دەي العان جوق. اۋدانعا قارايتىن قايىڭدى اۋىلىنىڭ تۇرعىندارى XXI عاسىردا قاراڭعىلىقتا ءومىر ءسۇرىپ جاتىر.
«ەنەرگوسيستەما» 35 شاقىرىم جەلىنى مەنشىككە بەرسە، جارىقپەن قامتاماسىز ەتەم دەپ وتىر. سونى شەشە المايسىڭدار ما؟ 10 جىلدان بەرى اۋىل جارىقسىز وتىر. ءسىزدىڭ ۇيدە جارىق بار. باسقاعا باس اۋىرتىپ وتىرعان جوقسىڭدار. وسى جەردە جارىققا جاۋاپتى ادام بار ما؟ بۇگىننەن باستاپ اۋدان اكىمى مەن ورىنباسارىنىڭ ۇيىندەگى جارىقتى ءسوندىرىڭىز. قاشان قايىڭدىداعى جارىقتى شەشەدى، سول كەزدە قوسىڭىز»،- دەگەن وبلىس اكىمى اۋدان باسشىسىمەن وتكىزگەن جيىندا.
مۇعالجاردا 4300 ادام جەر كەزەگىندە تۇر. اقتوبە وبلىسىنداعى جۇمىسسىزدار سانى قىسقارماي وتىرعان اۋدان وسى شاڭعۇتوۆتىڭ ەلى. شاشاۋى شىققان شارۋا شاش ەتەكتەن. اۋداندا جۇمىس جاساپ تۇرعان شاعىن كاسىپورىندار سانى ازايعان، جۇمىسشىلارى قىسقارعان، سالىق تومەندەگەن.
«مەن نەگىزىنەن گاز، سۋ، جىلۋعا كوڭىل ءبولىپ، جول ءسال كەشەۋىلدەپ قالدى. قاندىاعاشتا 32 كوشە بار. ونىڭ 11-نە اسفالت توسەلدى» ،- دەدى شاڭعۇتوۆ.
«11 جىل اكىم بولىپ، 11 كوشەگە جول توسەپسىڭ. ءار جىلعا ءبىر جول. قالعان كوشەنى جوندەۋىڭ ءۇشىن ساعان 30 جىل كەرەك پە؟»، — دەگەن ساپاربايەۆ ساۋالىنان شاڭعۇتوۆ ءۇنسىز قۇتىلعان.
