Taıaýda elimizdegi bir saıttan jezókshelikti zańdastyrýǵa qatysty bir aqparatty kózim shaldy. Osydan birneshe jyl buryn ózin zıaly sanaıtyn bir zıandy kisi de maǵan dál osy usynysty aıtqan bolatyn. "Qoǵamda bul is qalaı bolǵanda da júzege asyp jatyr. Sender haram degenmen ol toqtap qalmaıdy. İsteıtin adam áıteýir bir amalyn taýyp, báribir jasaıtynyn jasaıdy. Endeshe, ony zańdastyrý qajet. Esesine qazynamyzǵa salyq tólenedi. Qyzdar medısınalyq baqylaýda bolǵandyqtan, aýrý taramaıdy" - degen ýájin keltirdi, qazynanyń qamyn oılap, halqymyzdyń deniniń saý bolǵanyn tilegen adam bolyp.
Men oǵan: "Birinshiden, zańdastyrý degenimiz ol - haram qylyqty aqtap alý degen sóz. Allanyń haram etken nársesin eshkim adaldaı almaıdy. Ekinshiden, zańdastyrý kisiniń júreginen kúnáǵa degen jekkórinishti joıyp jiberedi. Jaman qylyq qaı kezde de jekkórinishti bolyp, solaı qalýy kerek. Zańdastyrǵan jaǵdaıda, jezóksheler kúná jasap jatyrmyn dep emes, kerisinshe, ózderin belgili bir mamandyq ıesi sezinip, qoǵamǵa paıdam tıip, qazynaǵa aqsha quıylyp jatyr degen oıda bolady. Al onda baratyn erkekter de kúná isteýge emes, aqshasyn kasaǵa tólep, tólendi degen túbirtegin qolyna alyp, beınebir bılet alyp, kınoǵa kirgendeı kúıde bolady. Haram qylyq mádenıetti iske aınalady. Kisiniń júreginen uıat sezimi joǵalady. Haramǵa kúná istep jatyrmyn degen psıhologıamen emes, quddy saýapty is tyndyryp jatqandaı kúıde barady.
Alla elshisisi (s.a.ý.) bir hadısinde: "Tyıylǵan isti kórseńder, ony qoldaryńmen túzetińder, al eger oǵan shamalaryń jetpese, tilderińmen túzetińder. Al eger oǵan da shamalaryń kelmese, onda eń bolmasa, júrekterińmen sol isti jek kórińder. Jek kórýdiń ózi ımannyń eń álsizi" - degen. Nege ımannyń eń álsizi? Sebebi qandaıda bir tyıym salynǵan isti jek kórmeý ony quptaý, qoldaý degendi bildiredi. Allanyń haram etken nársesin quptaý kisini ımannan jurdaı etedi. Iaǵnı, eń bolmasa haramǵa aram kózimen qaraı almaǵan kisiniń álsiz de bolsa, ımany joq degen sóz.
Úshinshiden, qazynaǵa túsken aram aqshanyń halyqqa qajeti qansha? Musylman halyqtyń aýzyna haram as, aram ıgiliktiń zardabyn oıladyq pa? Mekteptegi balańa beriletin astyń bir parasy sol haram aqshadan quıylatyn aram as bolmaı ma? Qazynamyzdy solaı arammen tolyqtyrýǵa zárýmiz be? Tórtinshiden, "medısınalyq baqylaý bolǵandyqtan, aýrý taramaıdy" - dep kúnáharlarǵa janymyz ashymaı-aq qoısyn! Ol Allanyń kúnáharlarǵa jazǵan myna dúnıedegi jazasy bolmaq!" - dep jaýap berdim. Ol úlsiz oıǵa batty. Quptady ma, joq álde jaýabyma qarsy jaýap izdedi me, ol jaǵy bir Allaǵa aıan.
Derekkóz: islam.kz
