Turmysqa shyǵýdy armandaǵan dekan, basqarma basshysy, ǵylym kandıdaty, doktor sekildi otyryp qalǵan oqyǵan qyzdar tanysý ortalyǵynan jigit izdeýde jáne olar ózinen 10 jas kishi jigitterge qyzyǵady eken, - dep habarlaıdy «Qamshy» portaly NUR.KZ-ke silteme jasap.

Aqtóbedegi qyz ben jigitti tabystyratyn «Serýen» otbasylyq oqytý ortalyǵy arqyly 68 jup shańyraq kótergen. Jup izdegenderdiń arasynda 26 jastaǵy qyzdardan bastap, 65 jastaǵy er azamattarǵa deıin bar. Olardyń arasynan otbasyn qurmaǵandar men ajyrasqandardy da tabýǵa bolady. Otyz jastan asyp úılene almaı júrgen qyzdar kóp. Qyryqqa kelgende áıeli qaıtys bolǵan er azamattar ortalyqtan kómek surap keledi eken.

«63 jastaǵy áıelder bar. Jalǵyz bolǵysy kelmeıdi, «jastaý azamattar bolsa» dep ótinish bildirip keledi. Bizge meshittegi ımamdardyń da keletini ras. Alpys jastan asqan onyń áıeli qaıtys bolǵan eken. Ol kisiniń ózi túsiniksizdeý boldy. Oǵan qajetti áıel adamdy taýyp bere almadym. Bizge «tek jynystyq qatynas úshin adam izdeımiz» dep mazalaıtyndar da bar. Olar túsinbeıdi, «aqshasyn tóleımin» dep dikeńdep turyp alady. Ásirese, ondaı qońyraýlar er adamdardan bolady. Biz jynystyq qatynas emes, otbasy qatynasyn ornatýǵa jumys istep jatyrmyz dep túsindiremin», - deıdi «Serýen» oqytý ortalyǵynyń basshysy Raısa Jaqypova.
Oqytý ortalyǵy jalǵyz júrgenderdi tanystyryp, berik otbasy bolýdyń qupıasymen tanystyrady. Qyzmet kórsetý aqyly.

«Kelgen adam tirkelý úshin 5000 teńge tóleıdi. Ári qaraı oqytý kýrsyna 100 dollar tóleýge tıis. Buryn bul 300 dollar bolatyn. Dollar baǵamynyń ózgerýine baılanysty azaıttyq. Bizge kez-kelgen adam tirkele almaıdy. İshimdikke salynǵan adamdy jolatpaımyz. Er adamdarǵa qoıylatyn negizgi talap - onyń turaqty jumysy bolýy kerek, nemese kásipker bolýǵa tıis. Rýhanı jaǵynan durys adamdy qaraımyz. Aqyly bolǵannan keıin qarapaıym adamdar kóp jolaı qoımaıdy», - deıdi ortalyq basshysy.

Ortalyq basshysy ózine qaltalylardyń keletinin jasyrǵan joq.

«Munda adamdar irikteledi. Qyzdar da ánsheıin qańǵyp júrgender emes, oqyǵan qyzdar. Ǵylym kandıdattary, doktorlar, munaı kompanıasynda úlken qyzmette isteıtin 2-3 dıplomdy qyzdar bar. Úlken mekemelerdi basqaryp otyrǵan qyzdar senip keledi. Sondyqtan, men olarǵa laıyq er adamdardy izdeımin. Qazir tanysý qıyn emes. Ol úshin ǵalamtordyń ózi jetip jatyr. Men kelgen adamnyń talǵamyna qaraýym kerek» , - deıdi Raısa Jaqypova.

Ortalyqqa kelgen adam aqyly anketa toltyrady, ózin qysqasha tanystyryp, vıdeoǵa jazylady. Qandaı adammen tanysqysy keletinin aıtady. Ortalyqta 68 adam shańyraq qurǵanyn basshy maqtanyshpen jetkizdi. Aıtýynsha, adamdardyń talǵamy ártúrli.

«Qazir áıelder ózinen jas jigitterdi izdep jatyr. Al, er adamdar qyzdardyń úlken bolǵanyn qalypty dep qabyldaıdy. «Úlken bola bersin» deıdi. Qyzdardyń on jas úlkendigine de mán bermeıdi. Qazirgi jastar ony esh ersiliksiz qabyldaıdy. Biz arqyly on jas úlken qyzdarǵa úılengen er adamdar bar. Olardyń jeke bastaryna yńǵaısyzdyq bolmas úshin jekelep toqtalǵym kelmeıdi. Men ondaı kezde qyz ljigittiń artynan júgiretin shyǵar dep oıdaıtynmyn. Joq, kerisinshe, jigitterdiń úlken qyzdardyń artynan qalaı júgirgenin kózimmen kórdim. Er adamdardy qylmen ustaı biletin qyzdardyń bar bolǵanyna qýanamyn», - deıdi ortalyq basshysy.
Otbasy bolǵysy kelip, ortalyqty jaǵalap júrgenderdiń deni bildeı qyzmettegi adamdar bolyp shyqty.

«Saýatty, úlken qyzmettegi adamdar kóp keledi. Jubyn izdeýshilerdiń arasynda úlken mekemelerdi basqaryp otyrǵan basshylar kóp. Úlken oqý orny dırektorynyń orynbasary, dekan qyzdar bar. Bizge qarapaıym adamdardyń aqshasy jetpeıdi. Men otbasy týraly oqytqanda ár nárseni óz ómirimnen alamyn. 35 jasymda turmysqa shyqsam da, bárine úlgerdim. Men otyz jasqa deıin adam úılenip bolý kerek dep oılaımyn. Ómir qysqa, bárine úlgerý kerek», - deıdi Raısa Jaqypova.

Óz ómirinen alǵan tájirıbesin ózgelerge úıretip júrgen ortalyq basshysy bul qyzmetti qalaı bastaǵanyn da aıtyp berdi.

«Men ózim psıhologpyn, 35 jasymda kesh turmysqa shyqtym. Shúkir, joldasymmen birge 40 jyldan beri birgemiz. Múmkin, aqshaǵa qunyǵyp ketken bolýym kerek, bir kezderi qatty syrqattanyp qaldym. Aýrýdan turǵannan keıin «Serýen» ortalyǵyn 15 jyl buryn adamdarǵa saýap jasaý maqsatynda ashtym. Ol kezde qyzdar jumys istedi. Olar tek aqsha tabýdyń jolyn izdedi. 2000 teńgege tirkep, adamdardy tanystyrdy. Ol kezde qońyraýǵa da esikke de tynym bolmaıtyn. Alqashtar az bolǵan joq. Qyz izdep túrmeden shyqqan adamdar da júrdi», - deıdi «Serýen» oqytý ortalyǵynyń dırektory.

Eń alǵashynda ortalyq toı uıymdastyrý jumystarynan bastaǵan. Toıdy bezendirýden, jas jubaılarǵa bal aıyn uıymdastyryp berýmen aınalysady. Keıin qyzdar men jigitterdi tanystyratyn shaǵyn agenttik qyzmetin atqarady

«Alty jyl ortalyqta tanysý keshterin uıymdastyrdym. Adamdardyń oıyn bilgim keldi, qoǵam qalaı qabyldar eken dep oıladym. Úılenbeı júrgen adamdar kimder? Olar ne sebepti otbasyn qurmaı jalǵyz júrgenin bilgim keldi. Bı keshteri arqyly jalǵyz júrgenderdi tanystyrdym», - deıdi ol.

Ortalyqta adamdardyń jeke otyryp kezdesetin orny da bar. Olar shaı iship otyryp, úsh saǵattaı erkin sóılesedi.