Ulystyń uly kúni men Halyqaralyq teatr kúninde Ǵ.Músirepov atyndaǵy Qazaq memlekettik akademıalyq balalar men jasóspirimder teatrynda alǵash ret «Altyn saqa» balalar spektáklderi festıvali ótedi, - dep habarlaıdy «Qamshy» portaly.

«Bala tárbıesi – bul ata-analardyń erekshe azamattyq boryshy» dep N.Á.Nazarbaev aıtqandaı bala tárbıesi qashanda mańyzdy mindetterimizdiń biri bolyp tabylady. Al, erteginiń teatr qoıylymdary arqyly sahnada kórinis tabýy – jas urpaqqa rýhanı, patrıottyq tárbıe berýde mańyzy orasan. Teatrymyzdyń 70 jyldyq mereıtoıy qarsańynda, alǵash ret «Altyn saqa» atty balalar spektáklderiniń festıvali uıymdastyrylyp otyr», - delingen teatr baspasóz qyzmeti taratqan habarlamada.

Festıvál qatysýshylary Baıdildá Qaltaev atyndaǵy «Eń úzdik er adam beınesi úshin», Aqqaǵaz Mámbetova atyndaǵy «Eń úzdik áıel beınesi úshin», Qasym Jákibaev atyndaǵy «Eń úzdik qosalqy róldegi er adam beınesi úshin», Ámıná Ómirzaqova atyndaǵy «Eń úzdik qosalqy róldegi áıel beınesi úshin», «Eń úzdik epızodtyq ról»,  «Epızodtyq róldegi akterlyq sheberligi úshin», «Kórermender kózaıymy», «Eń úzdik debút» nomınasıalary boıynsha marapattalmaq.

     Festıváldiń ashylýyna oraı baspasóz máslıhaty 24 naýryz kúni Ǵ. Músirepov atyndaǵy Qazaq memlekettik akademıalyq balalar men jasóspirimder          teatrynda saǵat 10.00-de ótedi.