JANNA D, ARK

Arylarda kekti oıdan,

Aǵarady qıyq Aı...

«...Órtke qarsy órt qoıǵan,

Óreńizdiń bıigi-aı!

Ómir máni – Ómirde!

Óńge odan syı kútpe.

Syımaı qalǵan Senimge,

Sert pe, synyq Túısik pe?

Sonyń jáne quny osy-aq –

Súıý! ( ...emes súıisý!).

Kimge syılar lázzat,

Kúıgen shashtyń ıisi?..

Kúler, kúler qosylyp,

Kúrsiner de, muńdanar...

Alańqaıda shashylyp,

Alaqandaı kúl qalar.

Shydap, shydap, shydar Ar,

Shyńǵyrǵanda shyn, naǵyz:

Kirpigińiz shylanar,

Kózińizdi jumbańyz!!! »

Aıta almady ol kúbirlep,

Aqyrǵy aqyl Adamǵa:

– Alańqaılar túbinde,

Aınalady alańǵa...

ULDARYMA

Erke óssin dep edim,

Erkin óssin dep edim!

Ekeýińnen ótinemin keshirim,

Erteń aıtam sebebin...

Elim desin deıtin em,

Emirensin deıtin em!

Ekeýińnen ótinemin keshirim,

Ertekshiniń keıpimen...

Ekshelenip bilimmen,

Er bolsa dep júgingem...

Ekeýińnen ótinemin keshirim,

Ekijúzdi túrimmen!

...Eńselengen jatyrda,

Ertoqymy taqymda...

«Erteńimiz sondaı  nurly dep edim,

Egemendik qaqynda!

Egeýli úshkir naızasy,

Et pen qymyz maıly asy...

Eldik jaıly, birlik jaıly aıtqanda,

Ekeýińe tısin dedim paıdasy!

Ekilenip otyryp,

Eki ezýim kópirip...

Eń tátti bir arman jaıly syrym da,

Eken... eken ótirik!

Erke óspegen Men edim,

Erte óshken de Men edim...

Ekeýińnen ótinemin keshirim,

Erteń aıtam sebebin!

...Endi qaıttim, ólem be?

El qatarly kónem de...

Eki basty samuryqtyń sheńgeli,

Ekeýińniń tóbeńde!

ULDARYMA – 2

Sol sertim – ólgenshe moıynda,

Senderdi jetkerý – paryzym!

...Mıllıardtan asqany – ýaıym ba,

Memleketimizdiń qaryzy?!.

( ......................................................... ,

............................................................ .

............................................................ ,

...................................... !!!

Qoǵamdyq-saıası sana da,

Qulqynnan jeńildi uıatym..!)

...Amandyqtaryńnan sadaǵa,

Almaǵan syıaqym!!!

Baılyqty, qyzyqty kórmegen,

Barlyǵyn Senderge syıladym!

Kartaǵa syımaıtyn Jer menen

Karkasty úı de, áni...

Eńsemdi túsirmeı sonda da,

Erteńge emeksip es, ıem...

Atańnan qalǵany... keń dala,

Al, menen... nesıe!

Úlkeniń qaraılap kishińe,

Úlgili, ónerli bolyńdar!

Dymdanǵan kózimniń ishi de...

...Dombyra sańyraý!!!

AZA TUTÝ
Kún keshýde qoǵamda:
Aryzy bar aıtpaǵan,
Qaryzy bar qaıtpaǵan,
Hám izi bar ADAMDAR!

Eki ıyqty julyp jep,
Muń arqalap birimiz,
Qun arqalap birimiz,
Bir ortaq án kúbirlep...

Bir atanyń balasy,
Qıyspaıtyn ǵumyrda,
Syıyspaıtyn uǵym bar,
Jıi ustaıtyn jaǵasyn!

Ǵalamsharlyq endikte,
Tańdanýmen túr azsa,
Qamdanýmen kún ozsa,
Aldanýmen keldik pe?

Suqtanýmen juldyzǵa,
Asyl Aıdyń árine...
Osy oıdyń bárine,
Basybaıly qulmyz ba?!

Sary órikteı kógerip,
Saryýaıym, kúdik pen
joly... qaıym úmitten,
Arylaıyq dep edik!

Sheshilerdeı túıinshek:
Úrkip keıin jamanat,
İrkitteıin aǵa ma,
Búrkitteıin shúıilsek?!

Silkinis kerek, sen, sen be...
Aǵartý úshin sanańdy,
Ońaltý úshin qoǵamdy,
Qol artý úshin erteńge!

Habarlamadan oqydyq:
(Men de silkine almadym...
Sen de silkine almadyń...)
Jer silkinipti... aqyry

TRIPTIH

1. KÓSH

Qyran qustyń qumaryn,

Qyzyldatyp ıitip...

Shyqqan Kúnniń shýaǵyn 

Shańyraqqa uıytyp!

Taǵdyryna júginý,

Táńiriniń bir aty...

Judyryq bop jumylý,

Jortqan jurttyń muraty!

At jaly, atan qomynda,

Aıly aspan astynda...

Bostandyqtyń jolynda,

Baǵlan saýǵa, bas qurban!

Shıyr-shıyr izbenen,

Shı qabyǵyn sydyryp...

Erkindikti izdegen,

El keledi shubyryp!

Azynaıdy jel údep,

Alty malta ál bolyp...

...Kereı menen Jánibek,

Kósh basynda sar jelip!

2. QONYS

Qazanynyń qaınaýy,

Qyzýly qara qıdan-dy...

...Qarataýdyń qoınaýy,

Qaptaǵan qos-úı boldy!

Aqsary bas atandy,

Atap basyp taqymǵa...

Talas boıy qatarly,

Toldy shańqan shatyrǵa!

...Samsap qatyn-qalashy,

Sary qaryn balasy,

Sylq-sylq etse: bári osy –

Sarysýdyń saǵasy!

...Qabyl bolǵan sıaqty,

Qalyń eldiń tileýi.

Túlik toldy tuıaqty, 

Týsyrap jatqan Shý edi!

...Qaýymnyń joly, jóni de,

Qubylaǵa buryldy.

...Kereı menen Jánibek,

Kezektesip júgindi!

3. ES

Bataly erge baq qonar,

Bilek eti býyltyq...

...Altynmenen aptalar,

Alǵy kúnge kim yntyq?

Birlikti elge qut keler,

Baǵamda da, baǵala...

Kúmispenen kúpteler,

Keler kúnge ne qalar?

Táýekeldiń kezinde,

Táýba kerek bastaýǵa!

...Iman, senim, sezimge,

Ie bolar Es bar ma?

Alystaǵy alyppen,

Arbasýǵa jaqynmen...

Qaptaldaǵy qaýipten,

Qalqalaǵan dátiń be?

...Eleń-alań áli de,

Eldiń basyn qosýǵa:

Kereı menen Jánibek,

Kúltóbeniń basynda!!!

Qalmahanbet MUQAMETQALI