Gúlaıymdy Almas tynysh bir kafege shaqyrdy, sebebi áńgimesi uzaq edi. Olar mundaı «qymbatyraq» kafede kezdespeıtin, biraq báriniń jospar boıynsha jaqsy atmosferada ótýi úshin Almas osy jerdi tańdady. Bul joly Almastyń júzinde bir salqyndyqpen qatar qobaljý bar.

Bıik týflı kıip, kishkene ǵana sómkesin appaq qolyna qysyp ustap, óziniń sulýlyǵana senimdi keıippen kafege kirip kelgen sátte erkekterdiń demi aýada qalqyǵan kúıi qaldy. Almastyń betinen súıip amandaspas buryn ernin tilimen bir qaıtara sýlap alǵany erkekterdiń dymyn qurytyp-aq ketti, átteń. Bári Almasty baqytty jigit sanady, sirá. «Talǵamy bar eken»,-dep...

Olar bir-bir bokal kokteılge ǵana tapsyrys berdi.

-Janym, kóńil-kúıiń joq qoı?-dep bastady Gúlaıym onyń solǵyn júzine jymıa qarap. Aldaǵany. Almasqa onyń «janym» dep aıtqany múlde unaǵan joq, sebebi jasandylyqqa jaqyn...

-Sen baqyttysyń ǵoı,-dedi Almas. Sóıtti de, ashýlanyp otyrǵanyn sezdirdi.

-Ne bolyp qaldy, jan?

-Keshe túnde qaıda boldyń?

-Aıgerimdikinde?..

-Aıgerimniń adresi qaıda?

-Abaı men Jarokov kóshesiniń qıylysy...

-A, sen nege Naýryzbaı batyr men Shevchenko kóshesinde júrdiń?

Gúlaıymnyń betine qan lap qoıyp, botadaı kózderi ary-beri oınaqshyp:

-Jan... Prosto Aıgerim...

-Joq, aıtpa, maǵan...

-Jan, joq, biz Aıgerim ekeýimiz ǵana tamaqtandyq kafeden...

-Nege meni aldaısyń?

-Men seni aldamadym... Prosto sen ýaıymdap qalmasyn dedim... Sen qyzǵanshaqsyń ǵoı. –Almas bedireıgen qalpy otyra berdi.  Únsizdik Gúlaıymnyń janyn jep, typyrshytyp jiberdi de, aqyry shydamaı: -Aıgerim ekeýimiz ǵana otyrdyq deımin, janym,-dedi.

-Men nege senýim kerek?

Gúlaıym sabyrsyzdanyp, qolyna telefonyn aldy daǵy, Aıgerimge qońyraý shalyp, «qatty estiletin» rejımge qoıdy.

-Allo, Aıka, keshe túnde kafede kim-kim boldy aıtshy?

-M-m-m?.. Ekeýimiz ǵana otyrdyq qoı,-degen Aıgerim tutqanyń ar jaǵynan sóılegen sózin bitirtpeı baılanysty úze saldy.

-Sen maǵan senbeısiń!-dedi qoly dirildeı bastaǵan Gúlaıym.

Almas mıyǵynan jymıdy da, telefonyn Gúlaıymnyń aldyna ıtere saldy. Sýrette ústel basynda: Gúlaıym, Aıgerim taǵy bir jigit... Sýretti jaqyndatyp qarasaq, Turardy kórer edik.

-Jan?!-dedi Gúlaıym shynaıy jalynyshty únmen. Alaıda Almastyń júzindegi salqyn bir lep onyń betin qaıtaryp tastady. –Ol meniń dosym. Aıgerim ekeýimizdiń dosymyz. Prosto sen meni qyzǵanasyń... Sosyn aıtpadym. Bizdiń aramyzda eshteńe joq. –Almastyń janaryndaǵy ókpeni kórip, júregi dúrsildep ketti. –Jan?! Onymen dos bolyp júrgenimizge úsh jyl boldy. Onyń artyq oıy joq. –Ún joq. –Nege maǵan senbeısiń?

Almas dymyn qurytyp, sóılemeı otyryp aldy dersiń. Gúlaıymdy bezerip alǵan jigitiniń mysy basyp... Qarańǵy bólmege kirip ketkendeı... Tumshalanyp... Tunshyǵyp... Demi bitip...

-Sen maǵan senbeısiń...-dedi ol, dirili bar daýyspen. –Sen meni súımeısiń!

-Súıemin seni.

-Súıseń sener ediń maǵan...

-Súıý bólek... Sený bólek.

-Ol meniń dosym ǵoı. Biz birge kıim satyp alýǵa baramyz, bizge aqylyn aıtyp, kómektesip júredi... Onyń súıgen qyzy bar.

-Ol ózi jigit pe, álde...

-Turar jaqsy jigit, olaı aıtpa.

-Jigit qusap júrmeı me, qyzdardyń «podrýjkasy» bolmaı...

-Sen túsinbeısiń meni,-dep, qyz da qyza tústi. –Qaıdasyń, kimmen júrsiń, ne istep júrsiń dep shyǵasyń. Men de adammyn ǵoı... Qudaı saqtasyn, men ondaı qyz emespin. Ornymdy bilem. Aqyry senbeıdi ekensiń, osymen qoıaıyq bárin.

-Men seni ózińnen jaqsy bilem ǵoı, Gúlaıym... Seniń janyń jyltyrǵa qumar. Kıno, mýzyka, teledıdarǵa ábden toıyp qalǵansyń... «Modna» kıinip, «stılno» júrgiń keledi... Qymbat-qymbat jerlerde otyrǵandy unatasyń. Jigit «dostaryń» bolady, olarmen jasyryn kezdesesiń... Biraq, seniń oıyńsha osynyń bári «normalno» da. Al maǵan unamaıdy. Jaı ǵana ómir súrý degendi túsinbeısiń sen... –Únsizdik. –«Janym» dep ataǵanyńdy jek kóremin, bilesiń be, nege ekenin? Turardy da «janym» deısiń ǵoı. –Gúlaıym selk ete qalyp, kózi sharasynan shyǵyp kete jazdady. – Meniń programmıst dosym bar. Seniń búkil jazǵan hattaryńdy oqyp qoıǵanmyn.

-Biz birimizdi sóıtip ataımyz. Biz dospyz, aramyzda eshteńe joq. Senseń de, senbeseń de – sol. Eger, Turardy jaqsy kórgen bolsam, senimen munyń bárin bastamas edim.

-Men aramyzdyń taza bolǵanyn qaladym. Artyq dos, artyq júris, ótirikti aralastyryp, bárin qıyndatyp alǵan óziń... Joq, men sózimnen taımaımyn, seni súıemin. «Podrýjkań» bolsa, «podrýjkań» shyǵar, biraq men endi saǵan sene almaımyn, keshir...

Gúlaıym ornynan atyp turyp, tákappar júrisinen tanbastan esikke bettedi. Kafedegi erkekter Almasty «aqymaq» dep oılady, sirá...

-Ofısıant, schetti bershi,-degen Almastyń sózin estigen Gúlaıym onyń artynan shyǵatynyna senimdi edi. Keýdesin tik ustaǵan qalpy kóshe boıynan taksı tosyp turǵan sátte artynan Almas kelip qushaqtap alǵanyn kútti... Tipti, qalaı qarsylasatynyn qıaldap, «jiber, meni, sen aqyry senbeısiń maǵan» degen sózderdi de daıyndap úlgergen. Sonda da, óziniń alysqa barmaıtynyn, Almastyń yrqyna baǵynyp qalatynyn sezdi.

Kafeden shyǵyp kele jatqan Almasqa «qarap qoımaıyn» dep, óz-ózin áreń ustady.

Almas kóliginiń esigin tars jaýyp, zýyldaı jóneldi. Gúlaıym jalt burylyp qaraǵanda Almastyń kóligi keri aınalmaıtynyna kózi jetti. Ketti. Kelmeıdi.

Gúlaıym turyp-turyp jylap qaldy.

Álisher RAHAT