Táýelsizdigimizdi alǵashqy bolyp moıyndaǵan Túrkıa – búginde elimizdiń Eýrazıa qurlyǵyndaǵy mańyzdy ári senimdi áriptesi. Eńsemizdi endi tikteı bastaǵan ýaqyttardan beri túbi bir túrkiliktiń negizinde qos el yntymaq pen berekeniń keremet úlgisin kórsetip keledi. 1990 jyldyń jeltoqsan aıynda eki el arasynda bilim berý, ǵylymı jobalar jasaý, ózara tájirıbe almasý, ortaq mádenı sharalar júrgizý jónindegi kelisimge qol qoıyldy,-dep habarlaıdy «Qamshy» portaly.
Bul kelisim uzaq ýaqyt boıy úzilip qalǵan mádenı baılanysty qaıta jandandyrdy.
Ál-Farabı atyndaǵy Qazaq ulttyq ýnıversıteti basshylyǵynyń Ystambul ýnıversıteti ókilderimen kezdesýi osy rýhanı baılanystyń zańdy jalǵasy ispetti. Túrkıa elinen kelgen delegasıa quramynda Ystambul ýnıversıtetiniń rektory, profesor Mahmýt Ak, osy JOO-nyń prorektory, profesor Baıram Mert Savrýn men ýnıversıtettiń bas hatshysy, profesor Metın Kýchýk boldy.
Kezdesý barysynda negizgi máseleler boıynsha eki ýnıversıtet arasyndaǵy yntymaqtastyqtyń damý jospary, atqarylatyn jumystardyń baǵyty qarastyrylyp, yqpaldastyq jónindegi memorandýmǵa qol qoıyldy. Sondaı-aq, QazUÝ rektory Ǵalym Mutanov ulttyq ýnıversıtette Iýnýs Emre atyndaǵy mádenı ortalyqtyń ashylatyndyǵyn jetkizdi.
Joǵary oqý oryndarynyń arasyndaǵy ekijaqty qatynastardyń qarqyndy damýy, ál-Farabı atyndaǵy Qazaq ulttyq ýnıversıteti men Ystambul ýnıversıtetiniń ustanymdarynyń uqsastyǵy kópjaqty yntymaqtastyq máseleleriniń keń aýqymy boıynsha ózara túsinistikti qamtamasyz etýge negiz bolýda. Aldaǵy ýaqytta stýdenttermen jáne oqytýshylarmen almasý belsendi júzege asatyn bolady. Bıylǵy jyly QazUÝ-ǵa Túrkıadan 20 shaqty stýdent oqýǵa jiberiledi dep kútilýde.
Óz kezeginde Ystambýl ýnıversıtetiniń rektory, profesor Mahmýt Ak myrza jaqyn arada ýnıversıtet kóleminde ál-Farabı ortalyǵynyń ashylatyndyǵyn aıtyp, tehnopark máselesine toqtaldy.
«Biz tehnıkalyq ýnıversıtet emespiz. Degenmen, tehnopark máselesi bizde jaqsy damyǵan. Aldaǵy ýaqytta salalyq, naqty tehnoparkter jumysyn qamtamasyz etý josparda bar. Máselen, medısınalyq tehnopark. Bul joba bizdiń elde úkimet tarapynan qoldaýǵa ıe boldy. Búginde ýnıversıtettiń 5 aýrýhanasy jylyna 2 mln 600 myń adamdy emdeıdi jáne QazUÝ-da qyzmetin endi bastaǵan medısınalyq fakúltet úshin bul yntymaqtastyq jaqsy tájirıbe bolmaq», – dedi Mahmýt Ak myrza. Kezdesý sońynda QazUÝ-dyń Ǵylymı keńesi otyrysyna qatysqan Ystambul ýnıversıtetiniń rektory Mahmýt Ak ál-Farabı atyndaǵy QazUÝ-dyń Qurmetti profesory atanyp, QazUÝ dostar klýbynyń músheligine qabyldandy.
