Qazir bıliktegiler áldebir ózekti jáıtqa baılanysty eldiń kózqarasyn bilgisi kelse, orystildi saıttardaǵy kommentterdi oqı salady. Telearnalar men ákimdik qyzmetkerleri de únemi osyndaı tórt-bes saıtta jaryq kórgen aqparattardy shuqshıyp sholyp otyratynyn bilemin. Elimizde orystildi ortanyń pikirin bárinen artyq sanap, solardyń qalaýyn qosh kóretin quldyq psıhologıa qalyptasqan. Al, ondaı ınternet portaldardaǵy pikir jazatyndardyń kóbi - orystyń jaldamaly troldary.

Memlekettik mańyzy bar máseleni talqylaıtyn kezde, olar Reseı ıdeologıacynyń yńǵaıyna keletin kommentter ǵana jazyp, qazaqstandyqtardyń atynan sóılep, ózderinshe qoǵamdyq pikir qalyptastyrǵansyp otyrady. Basshylyqtaǵy kosmopolıtter solardyń shatpaǵyna shynymen de senip, sanasatyn sıaqty áser qaldyrady.

Qazaqstandaǵy ulttyq ıdeologıa dep júrgeni, ultsyzdyq ıdıotızmi ekenine osyndaıda anyq kóziń jetedi eken. Bizde mundaı óte mańyzdy isterdiń barlyǵyn reseılikterge senip tapsyryp qoıǵan. Qazaqstandaǵy bos turǵan ıdeologıalyq vakýmdy solardyń saıası sandyraǵy ústi-ústine toltyryp jatyr. Qudaıǵa shúkir, qazir qazaq jastarynyń arasynda ulttyq problemalardy batyl aıtyp júrgen jýrnalıser kóp. Eń ókinishtisi, olardyń árqaısysy jeke-jeke jazyp júr. «Jalǵyzdyń shańy shyqpas» degendeı, solardyń basyn qosyp, qazaq blogerleri men jýrnalıseriniń lobbılyq tobyn qursaq degen usynys bildirgim keledi.

Ózderińiz bilesizder, qazir qazaq qoǵamynyń tamyryn basyp, ultqa qarsy jymysqy saıasat júrgizetin "ınformasıonnyı vybrostar" jıi jarıalanyp júr. Osyndaıda ultshyl azamattar álgindeı taqyrypty ilip áketip, bir-birimen bólisip, qazaq múddesine saı keletin qoǵamdyq pikir týǵyzyp jatsa, qandaı jaqsy! Feızbýk sońǵy jyldary ultshyldardyń ujmaǵyna aınaldy ǵoı. Bizdiki, áleýmettik jelide álimjettikpen birlesip kúresip, qolymyzdan kelgenshe halqymyzǵa qyzmet etsek degen oı ǵana edi...

Jolymbet Mákishtiń Feısbýktegi paraqshasynan alyndy