Aqmola  oblysy, Kalachı aýylynda dárigerlerge beımálim, túsiniksiz dert buryn ýran ón­diretin shahtanyń mańynda ornalasqan aýyl turǵyndaryn jaılap barady. Ótken aptada, dárigerler «ensefalopatıa» dep atap júrgen belgisiz derttiń bel­gileri bar taǵy bes adam aýrý­hanaǵa jatqyzyldy. Onyń naqty dıagnozy da, sebebi de, emi de áli naq­ty anyq­talǵan joq. Aty da bel­gisiz, jurt ony «uıqy aýrýy» dep atap júr. Uıqy aý­rýyna shaldyq­qandardyń sany búginde qyryqty shamalap qaldy. Kalachı aýylynyń turǵyndary byltyrǵy kók­temde jappaı medısınalyq tekse­rýden ótkizilgen, uıqy aýrýynyń bel­gileri turǵyndardyń barlyǵynan derlik baıqalǵan.

   Belgisiz  dertke  baılanysty  Parlament  depýttattary  da  ún  qatty.  Parlament depýtaty Aıqyn Qońyrov  óziniń  sol aımaqta týyp-óskenin aıta kelip, bul  derttiń aýmaqtyń tabıǵatymen tyǵyz baılanysty ekenin alǵa tartty. Derttiń sebebin anyqtaı almaǵan soń, endigi  rette  Reseıden  de arnaıy mamandar  shaqyrylǵan kórinedi. Depýtat myrzanyń  aıtýyna qaraǵanda, Aqmola  oblysynyń  terıtorıasynda radon keni  bar, sol tóńirektegi basqa  elementtermen aralasýy  nátıjesinde turǵyndarǵa áser etken.

Al, parlamenttiń "Aqjol" fraksıasynyń  basshysy Azat Perýashev bul máselege tez arada  sheteldik  mamandardy shaqyrý kerektigin aıtady. "Bizdiń elde  mundaı úlken jaýapkershilikti  moınyna  alatyn eshkim  joq. Bul epıdemıaǵa aınalyp  bara  jatqan kúrdeli  másele", - dedi kóshbasshy.

Eń qyzyǵy, Tótenshe  jaǵdaı mınıstri  V.Bojko bul  onyń  quzyrynda  emestigin kesip aıtty: "Bul meniń  problemam emes,  Densaýlyq saqtaý Mınıstrligine aıtyńyzdar! Bireý  órtenip,  sýǵa  batyp,  bolmasa  naızaǵaı  túsip  jatsa, maǵan  aıtsańyzdar bolady," -  dep  at -tonyn ala  qashty.

Densaýlyq saqtaý mı­nıstri Salıdat Qaıyrbekovanyń pikirinshe, Kalachı aýylynyń tur­ǵyndary shaldyqqan ensefalopatıa aý­rýynyń belgileri bul jerdegi epı­de­mıologıalyq jaǵdaımen baıla­nysty emes dep otyr.

Bıliktegilerdiń belgisiz aýrý  týraly  pikiri  osyndaı. Aýrýdyń sebebi men saldary, emi  týraly  naqty  aqparat  áli joq. Aýrýdyń  taralǵanyn  toqsannan  astam  ýaqyt ótti. Sonda,  Kalachıde qyrylǵaly  jatqan  qyryq adamnyń  taǵdyryna  kim  jaýapty?