Keshe Úkimet quramymen jıyn ótkizgen Elbasy kópti alańdatqan jer daýyna qatysty mańyzdy sheshim shyǵardy. Aqordanyń baspasóz qyzmeti Prezıdenttiń jerge qatysty zańnamalarǵa byltyr engen ózgeristerdi júzege asyrýǵa osy jyldyń aıaǵyna deıin moratorıı jarıalaý týraly Jarlyǵyn taratty. Jarlyqta Memleket basshysy jer reformasymen aınalysatyn arnaıy komısıa qurýdy tapsyryp otyr. Ol komısıany Premer-mınıstrdiń birinshi orynbasary Baqytjan Saǵyntaev basqaratynyn Elbasy keshegi jıynda-aq aıtqan bolatyn.
Prezıdent usynǵan komısıa ataýy aıtyp turǵandaı zań normalaryn túsindirý jumystarymen ǵana shektelmeıdi, tutastaı jer reformasyna qatysty máselelerdi salmaqtap, eldiń usynys-pikirlerin qorytatyn sheshýshi mehanızm bolmaq. Sol sebepti de jer taǵdyryna alańdaýshylyq bildirgen buqara halyq ta, zańgerler men saıasatkerler de, jermen tikeleı jumys isteıtin aýylsharýashylyq salasynyń mamandary da endigi kezekte osy komısıa jumysyna at salysýy qajet.
Óıtkeni, ýaqyt az. Óte az. Moratorıı merzimi jyl sońyna deıin ǵana. Sol sebepti de osy ýaqytqa deıin baspasózde, túrli basqosýlarda aıtylǵan, jazylǵan usynys, tilekter Baqytjan Saǵyntaev basqaratyn komısıaǵa jetýi kerek. Komısıany qurýdaǵy maqsa ta jer máselesin halyqtyń kóńilinen shyǵatyndaı etip sheshý. Kúni keshegi Prezıdent aıtqan «Halyqqa unamaıtyn zańnyń bizge qajeti joq» degen sóz osynyń dáleli.
Saǵyntaev myrza saıasat sahnasynda bir qaraǵanda salmaqty saıasatker kóribegenimen Elbasy komandasyndaǵy senimdi kadrlardyń biri. Prezıdenttiń Úkimettik deńgeıdegi tapsyrmalardy premerge emes, Baqytjan Saǵyntaevqa tikeleı júktep jatatynyna qarap aıtyp otyrmyz muny. Respýblıkalyq masshtabtaǵy, óńirlik deńgeıdegi bolsyn daýly máselelerdiń basy qasynda Baqytjan júretin. 2013 jyly qurylǵan Óńirlik damý mınıstrligine de Prezıdent basqany emes birinshi vıse-premer bolyp júrgen osy Baqytjan Saǵyntaevty taǵaıyndap, aımaqtardaǵy kúrdeli áleýmettik kıkiljińder men mono qalalardyń máselelerin senip tapsyrdy. Tústi metalýrgıa alyby «Qazaqmys» korporasıasy men jumysshylar, Qaraǵandy oblysyndaǵy birqatar mono qala turǵyndary arasynda týǵan áleýmettik shıelenistiń de jigin jatqyzýda osy Baqytjan Saǵyntaevtyń róli erekshe boldy. Munyń barlyǵyn biz sheneýnikke jarnama jasaý úshin emes, jer máselesindegi múddeli toptardy máseleni tıimdi sheshýge kúsh salýǵa, kelissózder jolymen jer reformasyn júzege asyrýǵa shaqyrý úshin aıtyp otyrmyz.
Sonymen, aldaǵy merekelik demalystar ótisimen-aq, ýaqyt ótkizbeı jer reformasy jónindegi komısıaǵa el bolyp, jurt bolyp ózekti degen usynystar men ótinishterdi jetkizý kerek.
Jomart Abdollauly
