Jer taǵdyryna alańdaýly halqyn sońǵy eki kúnde Elbasynyń ózi qýantyp otyr. Keshe Úkimet jıynyn ótkizip, jer daýyna núkte qoıatyndaı mańyzdy málimdeme jasady. Daýly zańǵa moratorıı engizdi.

Al, búgin Aqorda jaqtan birneshe kadrlyq aýys-túıis týraly habarlar jetip jatyr. Eki mınıstr aýysyp, jańadan qurylǵan mınıstrlik basshysy taǵaıyndaldy. Aýysatyn kreslolar qatary munymen shektelmeıtin de sıaqty.

Osy rette aýylsharýashylyq mınıstrligi tizginin elge iskreligimen tanylǵan  Asqar Myrzahmetovtyń ustaýy tek osy salaǵa qatysy bar azamattar úshin ǵana emes, bar halyqqa qýanyshty habar boldy. Asqar Myrzahmetovty búginde elge tanystyrýdyń, qyzmet jolyn túsindirip jatýdyń qajeti shamaly. Ony prezıdent eń aýyr, eń jaýapty ýchaskelerge jiberip otyrady.

Úkimet jaqtan jetken endi bir jaǵymdy jańalyq – Aqparat jáne komýnıkasıa mınıstrliginiń qurylýy. Ár jyldary túrli qurylymdyq ózgeristerge túsip, birese mádenıet, birese komýnıkasıa salasymen birigip kelgen aqparat salasy sońǵy jyldary Investısıa jáne damý mınıstrliginiń quramyndaǵy Aqparat, aqparattandyrý jáne muraǵat komıtetine qarap kelgen edi. Osylaısha uzaq jyl jetim balanyń kúıin keship kelgen aqparat salasynyń óz aldyna otaý tigýi, onda da agenttik, komıtet emes, tutastaı mınıstrlik bolyp qurylýy, oǵan zaman talabyna saı komýnıkasıa salasynyń qosa berilýi quptarlyq is boldy. Jańadan qurylǵan mınıstrlik basshylyǵyna da ádettegideı ákim-qaralardyń, ne bolmasa ár salanyń basyn bir ustap júrgen tehnokrattardyń biri emes aqparat salasyna tikeleı qatysy bar, uzaq jyl túrli vedomstvolardyń baspasóz qyzmetin basqarǵan, sońǵy bes jylǵa jýyq ýaqytta Prezıdenttiń Baspasóz hatshysy qyzmetin atqarǵan Dáýren Abaevtyń taǵaıyndalýy óz aldyna bir qýanysh. Aldaǵy ýaqytta Abaev myrza aqparat salasyn tek qana alǵa súırep, buqara men bılik arasyndaǵy senimdi kópir bolady degen úmittemiz.