Ál-Farabı atyndaǵy Qazaq ulttyq ýnıversıteti qabyrǵasynda júrip, talaı ıgi isterge bastaý bolǵan Maıa Muhamedqyzy Baǵyzbaevanyń ǵylymǵa qosqan úlesi óte zor. Ádebıettiń bastaýy bolǵan fólklordy, Jetisý jeriniń aýyz ádebıetin zertteýge on jyldan asa ýaqytyn arnaǵan. Ýnıversıtet qyzmetkerleri, oqytýshylar men stýdentterden ǵylymı-zertteý shyǵarmashylyq klýbyn quryp, zertteý jumystaryn júrgizýde qarajatyn da, qajyr-qaıratyn da aıamaǵan. Tárbıelegen shákirtteri ustazdarynyń qamqorlyǵyn, shapaǵatyn, meıirimin, adamgershligin, qarapaıymdylyǵyn áli kúnge deıin aýyzdarynan tastamaı aıtyp júredi. Ózi basshylyq etken, búginde qyzy Joldasbekova Baıan Ómirbekqyzy basshylyq etip otyrǵan «Orys fılologıasy, orys jáne álem ádebıeti» kafedrasy ujymynyń aǵa býyn ókilderi Maıa Muhamedqyzynyń erekshe uıymdastyrýshylyq qabiletin áli kúnge tamsana da saǵyna eske alady. M.Áýezov, B.Kenjebaev, K.Ahanov, M.Tomanov, T.Nurtazın, Á.Derbisálın, Z.Qabdolov, M.Baǵyzbaeva, A.Qyraýbaeva, R.Nurǵalı, T.Saırambaev t.b. syndy ǵalymdar fakúltet tarıhyn qalyptastyrdy. R.Berdibaev, T.Kákishuly, M.Maǵaýın, M.Joldasbekov, Á.Kekilbaev bastaǵan ǵalym-jazýshylar qazaq ádebıetiniń maqtanyshyna aınalǵaly qashan... Ásirese, fakúltettiń qoǵamdyq ómiri, jarqyn bolashaǵy dep ólsheýsiz eńbek etken tulǵalar murasy ótkenniń ónegesi, keleshekke baǵdar. Bul qatarda ataqty ǵalym, ulaǵatty ustaz, aıaýly jar, ardaqty ana retinde qazaq tarıhynda eleýli oryn alatyn f.ǵ.d, profesor, akademık Maıa Muhamed-Álıqyzy Baǵyzbaevanyń turýy – zańdylyq!
Osy oraıda bıyl da 28 sáýir kúni VIII Baǵyzbaeva oqýlary ótti. «Aktýalnye problemy sovremennoı fılologıı v kontekste obsheı naýchnoı paradıgmy» atty halyqaralyq ǵylymı-praktıkalyq jıynǵa shet elden jáne elimizdiń ár óńirindegi JOO men ǵylymı ınstıtýttarynan ataqty ǵalymdar qatysyp, bir aýyzdan Maıa Muhamedqyzynyń ómiri men ónegeli isterin nasıhattaýdyń stýdentter úshin asa zor mańyzdy ekenin quptady. Sonaý qıly zamanda ata-ananyń qamqorynsyz qalǵan qaısar qazaq qyzy basyndaǵy aýyr qasiretti arqalaı júrip, ǵylym-bilimge degen qushtarlyǵyn joǵaltqan emes. Ákesin «halyq jaýy» dep jalmap, anasyn «halyq jaýynyń áıeli» dep qamaýǵa alǵan shaqta Maıa Muhamedqyzy nebári 5 jasta ǵana eken. Balalyq shaqtyń aıaqtalǵan kezi de osy ýaqyt bolatyn. Óziniń ójettiliginiń, eńbekqorlyǵynyń arqasynda qarshadaı ǵana qarakóz qyz Reseı jerinde bilim alyp, esh qoryqpastan dıplomdyq jumysyn Jambyl shyǵarmashylyǵynan qorǵaıdy. Bul isin Muhtar Áýezov: «...basynan kóp qıamet ótkergen qazaq qyzynyń Máskeýde júrip, Jambyl taqyrybyn tańdaýynyń ózi – patrıottyq» - dep joǵary baǵalaǵan bolatyn. Oqýyn bitire sala Maıa Muhamedqyzy elge kelip eńbek etýdi bastaıdy. Jary Ómirbek Arslanuly Joldasbekov ekeýine meken bolǵan ál-Farabı atyndaǵy Qazaq ulttyq ýnıversıteti shyǵarmashylyǵyna shabyt berip, ǵylymǵa degen talpynysyn shyńdaı túskendeı. Profesor Maıa Muhamedqyzynyń qoǵamdyq sharalarǵa da, aınalasyn rýhanı turǵyda nurlandyrýǵa kosqan úlesi ýnıversıtetpen shektelgen joq. Respýblıka kólemindegi jıyndarǵa qoǵamdyq mańyzy bar utqyr oılary aıtylǵan baıandamalarymen kópshilik nazaryna iligip, Qazaqstan áıelder qaýymdastyǵyna múshe bolǵan. Keıinnen Qazaq ulttyq ýnıversıteti áıelderiniń qaýymdastyǵyn quryp, ózi basshylyq etken. Búgingi kúnde qaýymdastyq jumysyn anasynyń kózindeı kórip Baıan Ómirbekqyzy jalǵastyrýda.
GúljanAınabekova
Ál-Farabı atyndaǵy QazUÝ Fılologıa jáne álem tilderi fakúlteti orys fılologıasy jáne álem ádebıeti kafedrasynyń oqytýshysy
