Jer reformasy boıynsha qoǵamdyq komısıanyń tóraǵasy, QR Premer-Mınıstriniń birinshi orynbasary Baqytjan Saǵyntaev kelesi kezdesýdi Aqmola oblysynda ótkizýdi usyndy, - dep habarlaıdy Qamshy.kz.

Onyń aıtýynsha, óńirlerde komısıa otyrysynda aıtylǵan usynys-keńesterdi halyqqa jetkizip, jergilikti jerdegi adamdardyń oı-pikirlerin jınap alý qajet. «Sosyn onyń barlyǵyn bir júıege keltirý kerek. Sol sebepti kelesi otyrysymyzdy óńirlerge shyǵýdy bastasaq. Kóshpeli keńes deıdi ǵoı. Bárimizge, 75 adamǵa (bir jerge – avt.) barý mindet emes. Ózimiz top-topqa bólinip, árbir óńirge barýǵa bolady. Máselen, bir topty men bastap baramyn. Ekinshi topty Muhtar Abraruly (Qul-Muhammed), úshinshi topty Asqar Isabekuly (Myrzahmetov) bastap alyp barady. Eger bárimiz 75 adam bolyp bir jerde júrsek, (jumystyń – avt.) berekesi ketedi. Sol sebepti keste jasap, jolǵa shyǵyp, barlyq óńirlerde...múmkin maýsym aıynda úsh-tórt oblysty aralap úlgeremiz be. Sońynan bir aqyldasyp alyp, sońynan shilde aıynda taǵy shyǵyp, al tamyzda kelip, qorytyndy jumysqa kirisemiz. Sonda naǵyz sheshim bolady», - dedi B.Saǵyntaev.

Komısıa tóraǵasy kelesi kezdesýdi Aqmola oblysynda ótkizýdi usyndy. Artynan komısıa top-topqa bólinip, arnaıy is-sapar kestesi boıynsha óńirlerdi aralaıtyn bolady. «Halyq ta kútip otyr. Báriniń qolynda Internet bar emes. Aýyldy jerler Inernetti kórip otyrǵan joq endi. Bilip otyrmyz ǵoı. Keshki jańalyqtan bergenin ǵana kóredi. Al eger tikeleı sóılesetin bolsaq, basqasha aqparat beretin edik, basqasha usynys-pikir alyp keletin edik. Osyǵan kelissek, onda bizdiń jumysymyz Aqmola oblysyna shyǵyp, Kókshetaý qalasyndaǵy kezdesýden bastaımyz», - dep atap kórsetti komısıa tóraǵasy B.Saǵyntaev.

Osy oraıda komısıa múshesi, ekonomıs Januzaq Ákim óńirlerde ótetin komısıa keńesterin qoǵamdyq tyńdaýlar úlgisinde ótkizýdi usyndy. "Bizge tele kameralardyń aldynda jyltyrap júrip, jumysty qoparyp jatyrmyz dep kólgirsýdiń qajeti joq. Aýylda mádenıet úıi bolsa, sol jerge halyqty jınap, barlyq máselelerdi keńinen talqylaıyq"- dedi ol.