Aqtóbede qala kúnine oraı buqaralyq sport túrin qoldaýshylar arasynda velosherý uıymdastyryldy. Velosherýdiń jalpy qashyqtyǵy — 6,5 shaqyrym, - dep habarlaıdy Qamshy.kz Aktobenews.kz-ke silteme jasap.

Sharaǵa qatysýshylar QR Tuńǵysh Prezıdent atyndaǵy saıabaqtan bastap, Ábilqaıyr han dańǵyly boıymen Á.Moldaǵulova dańǵylyna deıin, ary qaraı Á.Moldaǵulova dańǵyly boıymen Eset batyr kóshesine burylyp, Abaı dańǵyly arqyly Ábilqaıyr han dańǵylyna shyǵyp, odan soń QR Tuńǵysh Prezıdent atyndaǵy saıabaqqa oraldy.

Aqtóbe qalasynda velosıped tebetinderdiń qatary jyl saıyn artyp keledi. Biraq arnaıy velojoly joq. Jergilikti bılik bul joly da velosherý ótkizý úshin qalanyń bas dańǵylynda kólik qozǵalysyp shektedi.

«Qalamyzda Táýelsizdiktiń 25 jyldyǵyna arnalǵan túrli sharalar ótkizilip jatyr. Qala kúni de osy mereke aıasynda ótti. Ótken jylǵy velosherýlerge 150 adam qatysqan bolsa, bıyl qatysýshylar sany artty. Bul bizdi qýantady. Biz salaýatty ómir saltyn nasıhattaý arqyly buqaralyq sport túrin damytqymyz keledi. Velojarystardy aldaǵy ýaqytta jıi ótkizýdi oılap otyrmyz», — dedi Aqtóbe qalasynyń ákimi Bekbol Saǵyn.
 

Buqaralyq sportqa qyzyǵýshylardy qala ákimi sporttyq kıimmen kelip qoldady.
 

«Velosıpedtim áli ákelingen joq. Astanadan aldyrtyp jatyrmyn. Ózimdikin aldyrtqan soń sherýlerge qatysatyn bolamyn. Bir jyldan beri velosıped tebýmen turaqty aınalysyp kelemin», — dedi Bekbol Saǵyn.