Bostandyq aýdanynyń azamattyq ister boıynsha sotynda búginge belgilengen "Qazaqstannyń birinshi arnasyna" ("Pervyı kanal Kazahstana") telearnasyna qarsy shaǵym boıynsha sottyń aldyn ala tyńdaýy keıinge qaldyryldy. Buǵan jaýapker tarap - telearna advokatynyń kelmeı qalýy sebep boldy, - dep habarlaıdy Qamshy.kz Azattyq radıosyna silteme jasap.

Qaraǵandylyq zańger Nurhan Jumabekov buǵan deıin "Qazaqstannyń birinshi arnasy" qaraıtyn "Eýrazıa+ORT" kompanıasynyń ústinen shaǵym túsirip, moraldyq shyǵyn retinde 100 myń teńge talap etken. Shaǵymǵa telearna júrgizýshisi Aımıra Shaýkentaevanyń efırde aıtqan sózi - jer máselesi boıynsha mıtıńterdi ótkizgen adamdarǵa "aqsha tólengeni" týraly taratqan habary sebep bolǵan.

Sýdıa Tatána Chernysh telearna ókilderi habarlasyp, advokattyń issapardan kele almaı qalǵanyn aıtyp, sot tyńdaýyn keıinge qaldyrýdy suraǵanyn jetkizdi. Sýdıa aldyn ala sot tyńdaýyn 8 maýsym kúni tańǵy saǵat 9-ǵa belgiledi.

Budan soń sýdıa Chernysh pen shaǵymdanýshy Jumabekovtiń arasynda az-kem dıalog boldy. Sýdıa Jumabekovke "Siz shaǵymyńyzda moraldyq shyǵyn talap etip otyrǵan aqparatty teristeý týraly talap qoımapsyz. Mundaı talap qoıasyz ba? Shaǵymyńyzdy osyǵan baılanysty tolyqtyrasyz ba, álde solaı qaldyrasyz ba?" dep surady. Zańger azamattyq kodeks pen basqa da ákimshilik zańdarǵa súıenip, telearnadan aqparatty teristeýdi talap etpeıtinin aıtty.