Ál-Farabı atyndaǵy Qazaq ulttyq ýnıversıtetinde jyl saıynǵy dástúr boıynsha Túlekter kúni atap ótildi. QazUÝ-dyń barsha túlekterine arnalǵan saltanatty shara Qazaqstan Respýblıkasynyń 25 jyldyǵy men Almaty qalasynyń 1000 jyldyq mereıtoıyna arnaldy, - dep habarlaıdy Qamshy.kz .
Barsha QazUÝ túlekteri kúnin toılaý merekesine oraı oqytýshylar, stýdentter men QazUÝ túlekteriniń qoǵamdastyǵy stýdenttik kampýs aýmaǵynda «Máńgilik El» sáýlet keshenin qurý ıdeıasyn usyndy. Mereke basynda atalmysh keshenniń negizgi kompozısıalyq qurylymy – «Máńgilik el» stýdentter men túlekter trıýmfaldy qaqpasy, «Temirqazyq» monýmentaldy kompozısıasy jáne sýburqaǵy bar «Taıqazan» alańynyń tanystyrylymy ótti. Aldaǵy ýaqytta bul joba bitirýshilerdiń ortasynda erikti jarnalar salý negizinde júzege asatyn bolady. Jıylǵan qaýymdy atalmysh jobalarmen tanystyrǵan Túlekter qaýymdastyǵynyń atqarýshy dırektory Kúlǵazıra Nuranqyzy Mesenattardyń qurmet taqtasynyń tusaýyn kesti. Sonymen qatar túlekter Shyǵystyń uly oıshyly Ábý-Nasyr ál-Farabı eskertkishi men akademık Ó.A. Joldasbekov monýmentine qurmetpen gúl shoqtaryn qoıdy.
Túlekter kúnine arnalǵan merekelik jıynda sóz bastaǵan ál-Farabı atyndaǵy QazUÝ rektory Ǵalym Mutanuly: «Ár ýnıversıtet jumysynyń kórsetkishi – túlekteri. Túlekteriniń eńbek jolyndaǵy úzdik jetistikteri – ýnıversıtet úshin zor maqtanysh. Osy oraıda QazUÝ túlekteri qoǵamnyń barlyq salasynda belsendi eńbek etip, aldyńǵy qatardan kórinip júr. Óz isiniń sheberi atanyp, týǵan ýnıversıtetiniń dárejesin kóterip júrgen barsha túlekterimizge úlken alǵysymdy jetkizemin», – deı kele, 2016 jylǵy jas túlekterge aq jol tiledi. Sonymen qatar rektor ýnıversıtettiń damýyna aıryqsha úles qosqany úshin «ál-Farabı atyndaǵy QazUÝ-ǵa 80 jyl» mereıtoılyq medalimen birqatar túlekterdi marapattady. Olardyń qatarynda geologıa-topyraqtaný fakúltetiniń 1954 jylǵy túlegi N.Á. Kalımoldaev, belgili dramatýrg, jýrnalıs 1971 jylǵy túlek S.B. Balǵabaev, hımıa fakúltetiniń 1986 jylǵy túlegi D.J. Núketaeva, hımıa fakúltetiniń 1981 jylǵy túlegi Z.G. Katranova jáne zań fakúltetiniń 1981 jylǵy túlegi B.S. Rahımov boldy.
Merekelik keshte Qazaqstan Respýblıkasy Joǵarǵy sotynyń tóraǵasy, QazUÝ Túlekter qaýymdastyǵynyń prezıdenti, z.ǵ.d., profesor, zań fakúltetiniń 1981 jylǵy túlegi Qaırat Ábdirazaqulyna sóz berildi. Q. Mámı: «Ál-Farabı atyndaǵy QazUÝ-da jyl saıyn mamyr aıynyń sońǵy senbisinde atap ótiletin este qalarlyq erekshe meıram bar. Ol – Túlekter kúni! Búgingi kezdesýge kelgen barshańyzdy, ýnıversıtet basshylyǵy men ustazdardy, túlekter men stýdentterdi ataýly merekemen shyn júrekten quttyqtaımyn. Bul kúni jınalǵannyń bári birin-biri kórip, tildesip qana qoımaı, qaıta oralmas stýdenttik jyldardyń estelikterin eske alýdyń tamasha múmkindigine ıe bolady. Biz QazUÝ-men, QazUÝ túlekterimen maqtana alady dep senimmen aıta alamyn. Osy jylǵy bitirýshi árbir jas túlek aǵa býynnan úlgi alýy qajet. Qasıetti qara shańyraq qabyrǵasynda alǵan bilimin el ıgiligine jumsaý – árbir túlektiń mindeti», – dep sóz bastap, odan ári Túlekter qaýymdastyǵynyń birjyldyq jumysyn qorytyndylady. Sonymen qatar ol alda jasalatyn jobalarmen tanystyra otyryp, sahnaǵa belgili aqyn, QazUÝ túlegi Oljas Súleımenovti shaqyrdy. Ýnıversıtet basshylyǵy dańqty túlegin «Qazaqstannyń Eńbek eri» ataǵyn ıelenýimen quttyqtaı otyryp, «QazUÝ-dyń № 1 beldi túlegi» medalimen marapattady. Sondaı-aq Oljas Omaruly Túlekter qaýymdastyǵynyń atynan úzdik stýdentterge shákirtaqylar tabystap, bilim jolynda sáttilik tiledi.
Kezdesý barysynda túlekter atynan ózge de úzdik stýdentterge jáne kafedralarǵa baǵaly syılyqtar tapsyrylyp, kópshilik nazaryna alma-mater jetistikteri týraly arnaıy fılm usynyldy. Jıynnyń resmı bólimi aıaqtalǵan soń, sharaǵa qatysýshylar QazUÝ stýdentteri daıyndaǵan merekelik gala-konsertti tamashalady. Ári qaraı dástúr boıynsha saltanatty kezdesý fakúltetterde jalǵasyn tapty. Túlekter óz fakúltetterin aralap, oqytýshylarmen jáne stýdenttermen kezdesip, suhbattasty.
Bir kúnge sozylǵan Túlekter kúnin keremet notada qorytyndylaǵan bal bitirýshilerdiń kóńilin bir serpiltip tastady. Búginde elimizde jastardyń qatysýymen uıymdastyrylatyn keshterde váls bıleý úlken tanymdylyqqa ıe bolyp keledi. Ýnıversıtet stýdentterinen quralǵan debútanttar polonez bıin bılep, artynan Vena válsimen kópshilikti tamsandyrdy.
«Búgin sizder shyn máninde úlken ómirdiń tabaldyryǵyn attaǵaly tursyzdar. Biz sizderge tek sapaly bilim berip qana qoımaı, sonymen qatar árqaısyńyzdyń boıyńyzǵa azamattyq qasıetterdi sińire bildik dep oılaımyz.
Búgin qoshtasý keshi. Alaıda biz sizdermen qoshtaspaımyz. Sizder úshin QazUÝ esigi árdaıym ashyq. Ýnıversıtet bitirýshilerge arnap tıimdi «Túlekter kartochkasyn» jasady. Atalmysh karta ýnıversıtet bitirýshilerine aldaǵy ýaqytta oqý ordasynyń biregeı Ál-Farabı kitaphanasymen, «Keremet» stýdentterge qyzmet kórsetý ortalyǵymen, jaqynda ashylatyn júzý basseıini qyzmetterin esh kedergisiz paıdalanýǵa múmkindik beredi», – dedi QazUÝ rektory, akademık Ǵalym Mutanuly. Quttyqtaý sóz sońynda ýnıversıtet basshysy stýdenttik jyldarda belsendilik tanytqan oqý ozattaryn alǵysqattarmen marapattady.
Qara shańyraqtyń Túlekter kúnine qyzý daıyndyqpen qatysqan, kúni erteń ózderiniń bitirý jumystaryn qorǵap, dıplomdaryn qolǵa ustaǵaly turǵan bıylǵy bitirýshiler úshin bul kesh erekshe tolqýmen ótti. Bul kesh bitirýshi túlekter jadynda máńgi saqtalary sózsiz.
Túlekterdi quttyqtaý úshin qazaq estradasynyń jaryq juldyzy Móldir Áýelbekova arnaıy kelip, saltanatty jıyn sońy jastardyń bı keshine ulasty.
Qalamqas AMANQOSOVA,
Eldana TOQBAI
