Kórermender rejıser Rústem Ábdirashovtiń "Qazaq Eli" ("Kazahskoe hanstvo") fılmin Táýelsizdik kúnine oraı 16 jeltoqsanda kóre alady, - dep habarlaıdy Qamshy.kz Tengrinews.kz -ke silteme jasap.
"Kópserıaly televızıalyq kórkem fılmniń túsirilimi byltyr aıaqtaldy. Qazirgi ýaqytta "Qazaqfılm" kınostýdıasynda "Qazaq Eli" tolyqmetrajdy fılminiń qosymsha túsirilim jumystary júrip jatyr. Sonymen qatar, túsirilim toby kınony montajdaýǵa kiristi. Kompúterlik grafıkamen de jumys bastaldy. Fılmdi óńdeýge respýblıkalyq búdjetten 1 475 205 myń teńge bólindi", - delingen saýalnamaǵa berilgen jaýapta.
Osyǵan deıin jobanyń prodúseri Arman Ásenov serıaldyń búdjeti senarıdiń qysqartylýyn qosa eseptegende shamamen eki mıllıard teńge bolǵanyn aıtqan edi
Aıta keteıik, fılmniń masshtabty túsirilimderi qarashada Shoshanaı aýylynda (Shonjy aýylyna jaqyn jerde) bolǵan. Fılmge 200 adam, 150 jylqy men 10 túıe túsirilgen. Keıinnen fılmniń túsirilimderi Qapshaǵaı men "Qazaqfılm" aýmaǵynda bolǵan.
Nazarbaevtyń bastaýymen Qazaq handyǵynyń 550-jyldyǵyna "Qazaq Eli" kórkem serıasynyń jobasy qolǵa alynǵan bolatyn. Fılmde qazaq handyǵynyń qazyǵyn qaqqan Kereı men Jánibek tusyndaǵy XV ǵasyrdaǵy kóshpendi qazaq mádenıeti sıpattalady.
Túsirilim tobynyń ókilderiniń aıtýynsha, fılmdi túsirýge demeýshi bolǵandardyń qarajaty teleserıaldyń dýblájyna, sımfonıalyq orkestrmen án jazýǵa jáne kıno nusqa óńdeýge jumsalady. Sondaı-aq, kez kelgen qazaqstandyq bul jobaǵa saıttaǵy kraýdfandıng arqyly kómektese alady. Qazirgi ýaqytta kórermender 101 295 920 teńge jınady. Aqsha jınaý áli de jalǵasyp jatyr.
Kartınadaǵy basty rolderdi Erkebulan Daıyrov (Jánibek), Qaırat Kemalov (Kereı), Aıan Ótepbergenov (Buryndyq), Meıirǵat Amangeldın (Qasym), Bekbolat Tileýhan (Qaztýǵan), Dosqan Joljaqsynov, Dımash Ahımov, Shuǵyla Saparǵalıqyzy (Kereıdiń áıeli), Mádına Ismanova (Jánibektiń áıeli) somdady.
