Ońtústikte sybaılas jemqorlyqqa qatysty quqyq buzýshylyq jasaǵan degen kúdikpen birneshe laýazymdy tulǵa ustaldy, - dep habarlaıdy Qamshy.kz Otyrar.kz -ke silteme jasap.

Bul týraly sybaılas jemqorlyqqa qarsy is-qımyl ulttyq búrosynyń OQO-daǵy departamenti aqparat taratqan.

Naqty aıtqanda, 200 000 teńge para alyp jatqan jerinen Á.Qasteev atyndaǵy oblystyq óner jáne dızaın kolejiniń dırektory A.Nıazov ustalǵan. Ol bul parany oqytýshydan kolejge talapkerdiń oqýǵa túsýi jáne pedagogıkalyq saǵatty kóbeıtý úshin almaq bolǵan.

Qazirgi tańda ustalǵan azamat qalalyq ishki ister basqarmasynyń ýaqytsha tergeý abaqtysyna qamaldy. A.Nıazov qalalyq máslıhattyń besinshi jáne altynshy shaqyrylymyna depýtat bolyp saılanǵan.

Buǵan qosa «Aısana ana» jáne «Jas shýaq» balabaqshalarynyń quryltaıshysy men meńgerýshisi ustaldy. A.Bıbolov balabaqshada tárbıelenetin búldirshinderdiń jalǵan tizimin jasaý arqyly «Balapan» memlekettik baǵdarlamasy arqyly bólingen búdjettiń 10 000 000 teńgesin jymqyrǵan.

Qazir bul azamat Maqtaaral aýdandyq ishki ister bóliminiń abaqtysynda qamaýda jatyr. Osy eki fakti boıynsha tergeý-tekserý jalǵasýda.