Tergeý ızolátoryna túsken kúdiktini adam tózgisiz ádispen azaptady degen aıyppen búgin úsh polıseıge qatysty sot úkimi shyqty. Almaty oblysy Qarasaı aýdandyq İshki ister basqarmasynyń polıseılerine 2 jyldan 2 jyl 6 aıǵa deıin jaza kesildi. Biraq aıyptalýshy tarap bul úkimmen múlde kelispeıdi, Qamshy.kz 31 arnaǵa silteme jasap.
Úsh polıseıge qatysty qylmystyq qýdalaý úsh jyl boıy bir toqtap, bir jandanyp otyrǵan. Qylmystyq is materıaldary boıynsha 2013 jyldyń naýryz aıynda polısıa qyzmetkerleri Qarasaı aýdanynyń 39 jastaǵy turǵynyn esirtki taratýmen aınalysady degen kúdikpen ustaǵan. Birneshe kúnnen soń kúdikti ızolátorda óz-ózine qol jumsaǵan. Artynsha tártip saqshylaryna qatysty tergeý isi bastalypty. Mamyr aıynda bastalǵan sot otyrysynyń úkimi shyqty.
ULAN ESBERGENOV, Naýryzbaı aýdandyq sotynyń tóraǵasy:
- Jábirlenýshi Iý En Gınǵa keltirilgen azaptaý áreketteri úshin kináli dep tanylyp, 2 jyldan 2 jarym jylǵa deıin bas bostandyǵynan aıyrý jazasy olarǵa taǵaıyndaldy.
Alaıda bul úkimmen jábirlenýshi tarap ta, aıyptalýshy tarap ta kelispeıtinderin bildirdi. Jábirlenýshiler jaza jeńil boldy dese, aıyptalýshy jaq negizsiz, dálelsiz jaza kesildi deıdi.
ÁLİMJAN ORALBAI, Qorǵaýshy:
- Úkimmen kelispeımiz. Mindetti túrde shaǵym túsiremiz. Naqty dálel joq, tek janama dálelder ǵana keltirildi. Tergeý isinde qatelikter kóp boldy. Ony sýdıa da atap ótti. Memlekettik aıyptaýshyǵa qatysty jeke qaýly da shyǵaryldy.
Sot tek jábirlenýshiniń túsiniktemesin negizge aldy degen qorǵaýshy onyń buryn qylmystyq jaýapqa tartylyp, narkologıalyq esepte turǵanyn aıtty. Al sotqa shaǵymdanyp, 3 mıllıon teńge ótemaqy talap etken jábirlenýshi tarap marqumdy aqtaýǵa tyrysady.
NATALÁ GÝSEVA, Jábirlenýshi:
- İstiń basynan bastap ádil júrgizilýin talap ettim, baqyladym. Baýyrym jaıdan jaı qol jumsamady ózine. Zańsyzdyq ony sýısıdke ıtermeledi.
Polıseılerge qatysty "kúdiktini zańsyz ustady" degen aıyp qysqartylyp, "azaptady" degen aıyp boıynsha jaza kesildi. Úkim áli zańdy kúshine engen joq.
